زەينەتكەرلiك جاسىن ۇزارتۋ كiمگە تيiمدi؟ قاراپايىم حالىققا ما، الدە بيلiككە مە؟ الدە مارچەنكو زەينەتكەرلiك الىستاسا، ايەلدەر قارتايمايدى دەپ ويلاي ما؟  مۇمكىن،ايەلدىڭ زەينەتتىك جاسىن ۇلعايتۋ -بۇل مايلى كرەسلودا ءالى دە وتىرا تۇرساق دەگەن نازىك جاندىلاردىڭ ارمانىنان تۋىنداعان يدەيا بولار. ءبىراق، 63 جاس ءومىر بويى اۋىر ونەركىسىپتە ىستەپ، زەينەتكە زارىعىپ جۇرگەندەرگە وڭاي ەمەس قوي. ءسوز داۋرەن قۋاتتا. ايەل تەڭدىگى تۋرالى ماسەلە قازاق قوعامىندا ءالى جالعاسىن تابۋدا. بولشيەۆيك-كوممۋنيستەر «قازان توڭكەرىسىن» جاساعاننان بەرى قازاق ايەلى ارباعا دا وتىرىپ باستادى، باسىنان اق جاۋلىقتى سىپىرىپ تا تاستادى. «راۋشان كوممۋنيست» بەينەسىندە ەل باسقارۋ ىسىنە دە ارالاسىپ كەلەدى. شاحتاعا دا ءتۇسىپ جاتىر. تەمىركولىكتەردى تىزگىندەپ، ەركەكتەردىڭ ءتىز كيىمىنە دەيىن كيىپ ۇلگەردى. وسىدان بولىپ بىزدە ءقازىر نە ايەل، نە ەر دەۋگە كەلمەيتىن ءبىرتۇرلى ادامدار قاۋىمى قالىپتاسىپ ءبىتتى. كەيىنگى 7-8 جىلدىڭ اۋقىمىندا گەندەرلىك ساياسات دەپ سايراپ ءجۇرمىز. ەندى مىنە، ايەلدەردىڭ زەينەتكە شىعۋ جاسىن ەرلەرمەن تەڭەستىرۋ كەرەك دەسىپ ەلىرۋدەمىز. بۇل ۇسىنىس ەڭ الدىمەن ۇلتتىق بانكىمىزدىڭ ءتوراعاسى مارچەنكو دەيتىن كىسىنىڭ اۋزىنان شىققان-دى. «قىرىق كىسى ءبىر جاق، قىڭىر كىسى ءبىر جاق» دەمەكشى، ۇنەمى قىڭىرايىپ، قىرىن تارتىپ جۇرەتىن مارچەنكو مىرزا: «ءبىزدىڭ ۇلتتىق بانك قىزمەتكەرلەرىنىڭ 67 پايىزى ايەلدەر. بىزدە ايەلدەردىڭ اجەتحاناسى ەركەكتەردىكىنەن 2 ەسەگە ارتىق» دەپ سالعان ەدى ءوز ۇسىنىسىن وتكىزۋ ءۇشىن. مارچەنكو شاماسى، بانكتەردە سۇرلىگىپ ىستەيتىن جۇمىسى بولماعاندىقتان، سۇرمەلەنىپ قانا وتىراتىن قىز-كەلىنشەكتەر سياقتى قازاق ايەلدەرىنىڭ ءبارى جاقسى اقشا، جايلى تۇرمىستىڭ ۇستىندە دەپ ويلايتىن بولسا كەرەك. ايتپەسە الگىندەي ۇسىنىستى ايتا قويماس ەدى. ارينە، كاسىبىن تەرەڭ مەڭگەرگەن ايەل-انالار بىزدە جەتىپ ارتىلادى. سولاردىڭ قابىلەت قارىمىن سارقا پايدالانۋ ءۇشىن زەينەت جاسىن 63-كە دەيىن ۇزارتۋ قانشالىقتى مۇمكىن؟ ەرتەلى كەش مەكتەپتىڭ ۋ-شۋىنان قۇلاعى تۇناتىن ءمۇعالىم ايەل 63 جاسقا دەيىن زەينەت جاسىن كۇتىپ جۇرە الادى ما؟ دەنساۋلىققا قاتەرى مول ونەركاسىپ ورىندارىندا جۇمىس ىستەيتىن ايەلدەر شە؟  حالقىمىزدىڭ 43 پايىزى اۋىلدى جەرلەردە تۇرادى. ونداعى تىرلىكتىڭ وڭىپ تۇرعانى شامالى. ۋربانيزاسيا مادەنيەتى قازاق اۋىلدارىن كۇنى بۇگىنگە دەيىن تولىق قامتي الماي تۇر. قالاداعى قارا بازارلاردا الاقاپ سۇيەرتكەننىڭ ءبارى ايەل.  دەمەك، ءبىز ايەلدەردىڭ زەينەت جاسىن ۇلعايتۋدان بۇرىن قازاقستان حالقىنىڭ  الەۋمەتتىك تۇرمىسىن ەۋروپالىق دەڭگەيگە جەتكىزىپ الۋعا ءتيىسپىز. دامىعان ەلدەردە، مىسالى ۇلىبريتانيادا، فرانسيادا، يتاليادا ايەلدەر زەينەتكە 60 جاسىندا شىعادى. ءوزىمىز كۇندە ۇلگى تۇتىپ، ءاربىر قادامىنا ءۇڭىلىپ قاراپ وتىراتىن رەسەيىمىزدە ەرلەر ءتىپتى 60 جاسىندا، ال، ايەلدەر 55-56 جاسىندا زەينەت جاسىنا يەك ارتادى. بەينەت ءتۇبى - زەينەت. سول زەينەتكە زارىقپاي جەتكەن ادامدا ارمان بار ما؟ "31" ارنا