بىلتىر عالامتوردى  دۇرلىكتىرگەن كارىس  پسايدىڭ   «گانگام ستايلىنا»  ەڭبەكتەگەن بالادان  ەڭكەيگەن  قارتقا  دەيىن شوشاڭداپ  بيلەگەنى  ءالى  ۇمىتىلا  قويعان جوق.  ءتىپتى  الەمدىك  مادەنيەتكە  قۇبىلىس  بولىپ  ەندى. ەسەرسوقتار  توبىن  جيناپ  الىپ،  ەبەدەيسىز قيمىل جاساپ  بيلەۋدى  ونەردىڭ «زاماناۋي» ءبىر تۇرىنە  اينالدىرىپ بەردى.  ال بيىل، قاڭتار  ايىنان  باستاپ  سول  «گانگام ستاي­لىندىڭ»  ءىزباسارى  ىسپەتتى «Harlem Shake»  اتتى  بي  عالامتوردى  جاۋلاپ،  ەلىكتەۋشى توپتاردىڭ  بيلەرى  الەمدىك  جەلىدە   جاڭبىردان  كەيىنگى  ساڭىراۋقۇلاقتاي قاپتاپ شىقتى. بۇل «Harlem Shake»  ءبيىنىڭ  نەگىزگى  «ەرەكشەلىگى» تىنىش  وتىرعان  ءبىر  توپ  ادامنىڭ  ىشىندەگى  بىرەۋى اياق-قولىن وڭدى-سولدى  سەرمەپ، بيمەن  اتتاس تۇسىنىكسىز اۋەنگە بيلەي  باستايدى.  ارتىنشا  ماڭايىندا وتىرعاننىڭ بارلىعى  الگىنىڭ  قيمىلىن  قايتالاپ، بي  بيلەيدى. ءتىپتى  بي  دەپ  تە  ايتۋعا  اۋزىڭ  بارمايدى.  ءتانىن  جالاڭاشتاپ، ءۇستى-باسىن  بوياپ، كوزگە  وعاش كورىنەتىن  ەروتيكالىق قيمىلدار مەن  ادام كورمەگەن قىلىقتاردى كەلتىرىپ  بيلەيدى. قۇددى  جىن-شايتاننىڭ  ورداسى ما دەرسىڭ؟! جانە مىندەتتى تۇردە بي  بەينەگە  ءتۇسىرىلىپ، عالامتورعا  جاريالانادى. بۇل ءۇردىس وزگەنىڭ قاڭسىعىن تاڭسىق كورەتىن    ءبىزدىڭ ەلدىڭ جاستارىن دا اينالىپ  وتپەدى.  جوعارعى  وقۋ ورنىنىڭ  ستۋدەنتتەرى  مەن  وقۋشىلار «Harlem Shake»-كە  جارىسا  بيلەپ،  عالامتور بەتىن تولتىرىپ جاتىر. ءسويتىپ وسىنداي ويىننان وت  شىقتى. قاراعاندى مەم­لەكەتتىك تەحنيكالىق ۋنيۆەرسيتەتىنىڭ ءبىر توپ ستۋدەنتى وقۋ عيماراتىنىڭ ىشىندە بي بيلەپ، وي­ران سالعان.  جاستار  ۇلتتىق  ناقىشتاعى ستەندتەرگە دە،  ەلباسىنىڭ  پورترەتىن كوزگە  دە  ىلمەي،  ءتىپتى  جارتىلاي جالاڭاشتانا  بيلەگەن. مۇنداي  بەيبەرەكەتسىزدىكتى جازالاۋ ماقساتىندا  وقۋ  ورنى باسشىلىعى  ءبيدى  ۇيىمداستىرعان  ءبىرىنشى  كۋرستىڭ  ەكى  ستۋدەنتىن  وقۋدان  شىعارعان. ارينە، جازا – ورىندى. الايدا جىر وسىمەن بىتسە يگى.  وسى  وقيعانىڭ ءىزىن الا ستۋدەنتتەرگە قاتىستى  مۇنداي شەشىمگە قارسى  شىققان  بۇرىنعى  دەپۋتات  باقىت سىزدىقوۆا  الگى ەكى ستۋدەنتتى  قايتارۋ  ءۇشىن  جىندى ءبيدى  قايتا بيلەۋگە  شاقىردى. ايدا اسپاننان  شىعارعان  سىزدىقوۆا تەك  ءوزى  عانا ەمەس،  باسقا  دەپۋتاتتاردى  دا  ەكى ستۋدەنتتىڭ جولىندا ۇلت پەن  ۇياتتى  قۇربان ەتىپ، حارام ءبيدى بيلەۋگە  ۇندەپتى. ءبىراق باسقا شەندى-شەكپەندىلەر ۇيالعان  بولۋى كەرەك،  بۇل ۇسىنىستى  قولداي قويمادى.  ەسەسىنە  سىزدىقوۆا  حانىم «كوزسىز» باتىرلىققا  بارىپ، 14 ناۋرىز  كۇنى  استانادا  حارلام شەيككە  ءوزى  بيلەپ  بەردى.

سىزدىقوۆا: «ءبىزدىڭ  پەتيسيامىزعا  مينيستر  جۇماعۇلوۆ  نازار اۋدارادى  دەگەن ۇمىتتەمىن.  ول وقۋدان  شىعارىلعان ستۋدەنتتەردى  قولداۋى  ءتيىس. جانە  جوو باسشىلىعىنان  ستۋدەنتتەردى  اراشالاپ الۋى  كەرەك»، -دەيدى. ونىڭ  ايتۋىنشا،  ءالى  ءۇمىت بار، سەبەبى  مينيستر  دەپۋتات  حانىمنىڭ  ۇندەۋلەرىن  قالت  جىبەرمەي،  مىندەتتى تۇردە  جاۋاپ قاتادى  ەكەن. قارعا قارعانىڭ كوزىن  شۇقىمايدى ەمەس  پە؟  دەپۋتاتتار دا  بۇرىنعى ارىپتەستەرىنىڭ  قادامىنا  وڭ كوزقاراس ءبىلدىردى.  ماسەلەن، كوممۋنيست ۆلاديسلاۆ كوساريەۆ وقۋ ورنىنىڭ جازاسى  ورىنسىز ەكەندىگىن العا تارتىپ،كىنانىڭ  بارلىعىن  وقۋ ورداسىنداعى تاربيەنىڭ جوقتىعىنا ارتسا،  دەپۋتات احمەد مۋراتوۆتىڭ پىكىرىنشە،  قوعام قايراتكەرلەرى  ازاماتتاردى  قورعاۋى ءتيىس. جانە ستۋدەنتتەردىڭ  وقۋ  بولمەسىندە Harlem Shake بيلەۋلەرىنىڭ ەش  سوكەتتىگى  جوق.  بۇل  تەك  بالالىق.  ناقتىراق ايتقاندا، كوكتەم  بارلىعىنا اسەر ەتىپ  جاتىر. راسىندا، كوكتەمنىڭ  «بارلىعىنا» اسەر ەتىپ جاتقانى بايقالىپ تۇر. سوندا  بۇل  قالاي بولعانى؟  ۇلگى  الار  ۇلكەندەرىمىز جاستارعا  ءتالىم بەرۋدىڭ ورنىنا تارتىپسىزدىككە، ويسىزدىقتىڭ الدىن الۋدىڭ  ورنىنا  وسپادارلىققا، ءجون  ايتۋدىڭ  ورنىنا جۇگەنسىزدىككە باستاعانى ما؟  ال ءسىز نە  دەيسىز،  وقىرمان؟

سۋرەت zakon.kz سايتىنان