ءاليحان بوكەيحان كوشەسىنە بارىپ قايتساڭىز...

بۇگىن الماتى قالاسىنداعى ءاليحان بوكەيحان اتىنداعى كوشەگە بارىپ قايتتىم. كوشەنىڭ باسىنان ءتۇسىپ قالىپ، 3950 مەتر ۇزىندىقتا جاتقان كوشەنى جاياۋ ارالاپ شىقتىم.

3950 مەتر دەگەنگە «جاقسى» دەمەڭىز، جارتىسى جول، جارتىسىن اينالمالى كوپىرلەر الىپ جاتىر. ال كوشەنىڭ اتى ابىروي بولعاندا ءاليحاننىڭ اتىمەن اسقاقتاپ تۇرماسا: «بۇل جەردە نە بار؟» دەگەن سۇراققا جاۋاپ بەرە الماس ەدىم...

جاياۋ جۇرگىنشىلەردىڭ جولىمەن ءجۇرىپ كەلەم. شاڭ-شاڭ بولعان اياققا قاراپ، الماتىنىڭ جوعارى جاعىندا اسفالتپەن ءجۇرىپ جاتقانداردى ويلادىم. باقىتتى ەكەن! جول بويى كورگەنىم قيراعان ۇيلەر. عيمارات سالۋعا نەمەسە «ەسەنتاي» سەكىلدى اينەكتەن ءزاۋلىم ساراي تۇرعىزۋعا ارلانعان بولار. ونىڭ ۇستىنە قالانىڭ شەت جاعى: جەتىسۋ اۋدانىندا ورنالاسقان. رايىمبەك داڭعىلىنان باستاپ سولتۇستىك اينالىمعا دەيىن سوزىلىپ جاتىر. رىسقۇلوۆ داڭعىلىن قيىپ وتەدى.

ۇلت كوسەمى «ماعان كوشە بەرىڭدەر!» دەپ سۇراعان جوق، الايدا حالىق قۇرمەتتەپ كوشەنىڭ اتىن بەرگەن ەكەن، وعان دا شۇكىر دەمەسەك، بۇل ناعىز ۇيات نارسە! كوپىر ودان قالا بەردى اينالاسىندا دەمالاتىن بىردە-بىر ورنى جوق كوشەنى ءاليحان بوكەيحاننىڭ اتىنا بەرە سالعانشا، بوستاندىق نەمەسە مەدەۋ اۋدانى جاقتاعى شاعىن ءبىر كوشەنىڭ اتىن اتاي سالعان بەك جاقسى ەدى. كوشەنىڭ ۇزىندىعىمەن دە جارىساتىن قوعامعا كەلدىك قوي...

سۋرەتتە كورىپ تۇرعاندارىڭىزداي، كوشە اتاۋىنا دەگەن قۇرمەت جوق. بىرىندە «بوكەيحانوۆ»، بىرىندە «بوكەيحانوۆ»، بىرىندە اتىمەن جوق. ال ءبىر سۋرەتتە كورىپ تۇرعانداي استىنا: «بىۆ.اەرودرومنايا» دەپ بەرگەن. تاڭ قالاتىن ەشتەڭەسى جوق، تاكسي كوكەلەرگە «ناۋرىزباي باتىردى» ءۇش رەت ايتىپ ارتىنان امالسىز «دزەرجينسكيي» دەيمىز.

كوشەنىڭ شاڭىن تۇرعان كولىكتەردەن-اق كورۋگە بولادى. جالپى ۇلت كوسەمى كەزىندە كولىك شىعاراتىن زاۆود اشقان ادامداي ەستە قالا ما دەيسىڭ... سەبەبى، كوشەنىڭ ەكى جاق بويى تولعان ستو. كولىك جوندەيتىن جەرلەردەن كوز الىپ ءجۇرۋ مۇمكىن ەمەس. كورىپ تۇرعاندارىڭىزداي «نۋر ستو» دا بار.

اناۋ سۋرەتتەگى وسى كوشەنىڭ بويىنداعى شاعىن اجەتحانانىڭ كورىنىسى.

تيميريازيەۆ كوشەسىنەن باستاپ وزگەرتۋ جاساعان قالا اكىمى باۋىرجان بايبەك مىرزا، وسى ءبىر ۇلت كوسەمىنە بەرىلگەن كوشەنى كوگالداندىرۋعا، اينالاسىن جاساۋعا جانە دەمالىس ورىندارىن دا (ساياباق) اشۋعا كوڭىل بولسە دەيسىڭ. دەيسىڭ-دەيسىڭ...

ايتپاقتاي، استانادا... وي، نۇر-سۇلتان قالاسىندا مەشىت سالۋ تۋرالى شۋلاپ ەدىك قوي. مىناۋ ءاليحان بوكەيحان كوشەسىنىڭ بويىنداعى «امين» مەشىتى. جەتىسۋ اۋدانىنا قاراستى ەكەن...

الاش ءۇشىن «انت» ەتىپ، الاش ءۇشىن ءولىپ كەتكەن ءاليحان بوكەيحانعا دەگەن قۇرمەت وسى بولسا، جەتىسكەن ەكەنبىز. وتكەنىڭدى ۇلىقتاۋ، وتكەنىڭە ءۇڭىلۋ، ولاردىڭ ەرلىگى تۋرالى ۇرپاققا جەتكىزۋ پارىز دەيمىز عوي. ەرتەڭ بالاڭدى ەرتىپ وسى كوشە بويىمەن ءجۇرىپ جاتساڭ: «بالام، مىناۋ ءاليحان اتاڭنىڭ كوشەسى» دەپ قايتىپ ايتاسىڭ؟!

باس-باسىنا ەسكەرتكىش سالاتىن، ءتىپتى جەكە رۋىنا كوشە بەرىپ، ودان قالا بەردى رۋىنا دەگەن قۇرمەتىن كول-كوسىر بايلىقپەن ەسەپتەپ جاتاتىن كاسىپكەر مىرزالار! مىنا تۇرعان الماتىداعى كوشەنىڭ بويىن جاساۋعا سىزدەر دە ات سالىسىپ جىبەرسەڭىزدەر. ءاليحان «رۋىم» دەپ ولگەن جوق «الاشىم» دەپ ولگەن. اقىرى جوعارى جاقتان كوشە بەرە المايدى ەكەنبىز، بار كوشەنى گۇلدەندىرىپ جىبەرسەك نەسى جامان؟! ەڭ اقىرى ءارۋاعى رازى بولماي ما!

مارعۇلان اقاننىڭ فەيسبۋك پاراقشاسىنان الىنعان

ۇسىنعان: اسەل بولات قىزى