قازاقستان رەسپۋبليكاسىنىڭ سولتۇستىك وبلىستارىندا قىزىل كىتاپقا ەنگەن، مەملەكەتتىڭ ايرىقشا قورعاۋىنا الىنعان كيىكتەر جاپپاي قىرىلۋدا. وسىعان قاتىستى، رەسمي مەكەمەلەر تاراتقان مالىمەتتەرگە سۇيەنسەك، قىرىلعان بوكەندەردىڭ سانى قوستاناي، اقمولا جانە اقتوبە وبلىستارىندا 85 سىڭنان اسىپ جىعىلعان.
- اقتوبە وبلىستىق ىشكى ىستەر دەپارتامەنتى 18 مامىر كۇنى "ىرعىز- تورعاي" مەملەكەتتىك تابيعي رەزەرۆاتىنىڭ اۋماعىنان 68 كيىكتىڭ ولىگى تابىلعانى تۋرالى اقپارات تاراتقان بولاتىن. ايماقتا جانۋارلاردىڭ جاپپاي قىرىلۋىنىڭ سەبەپتەرىن انىقتاۋ ءۇشىن ارنايى كوميسسيا قۇرىلىپ، زەرتتەۋ جۇمىستارى جۇرگىزىلگەنىمەن، ءالى كۇنگە دەيىن ناقتى سەبەپتەر ايتىلمايدى. ال 21 مامىر كۇنى ايماقتاعى قىلىرعان كيىك سانى 1000-نىڭ ۇستىنە شىققان.
- ال قوستاناي وبلىسىندا قىرىلعان كيىكتىڭ سانى 30 مىڭنان اسىپ جىعىلعان. بەتپاقدالانىڭ جەر-جەرىنەن تاۋ-تاۋ بولىپ ۇيىلگەن كيىك ولەكسەلەرى ءالى تابىلۋدا.
- اقمولا وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنىڭ حابارلاۋىنشا، 21 مامىر كۇنى جارقايىڭ اۋدانىنىڭ قۇمسۋات اۋىلدىق وكرۋگى مەن جاقسى اۋدانىنىڭ تەرىساققان اۋىلدىق وكرۋگى قيىلىسىنداعى تەرريتوريادان شامامەن ءبىر مىڭعا تارتا كيىك قىرىلعانى انىقتالعان. ءقازىر قىرىلعان كيىكتەردىڭ ناقتى سانى ەسەپتەلىپ جاتىر. جاقسى اۋدانىنىڭ سانيتارلىق-ۆەتەرينارلىق قىزمەتى كيىكتەردىڭ ولەكسەسىنە جانۋارلاردىڭ نەدەن قىرىلعانىن انىقتاۋ ءۇشىن ساراپتاما جاساپ جاتىر.
كيىك "گەپتيلدىڭ» ۋىنان قىرىلۋى مۇمكىن
قازاقستاننىڭ ءۇش بىردەي وبلىسىندا كيىكتەردىڭ جاپپاي قىرىلۋىنىڭ سەبەبىن انىقتاۋعا ارنايى كوميسسيا قۇرىلعانىمەن، زەرتتەۋ جۇمىستارى ازىرگە ناتيجە بەرەر ەمەس.
- 22 مامىر 2015 جىل. قوستاناي وبلىسىنداعى كيىك ولەكسەلەرىن ۋتيليزاسيالاۋمەن اينالىسىپ جۇرگەن قىزمەتكەرلەر، ايماقتان عارىش كەمەسىنىڭ شار تارىزدەس بولشەگىنىڭ تابىلعاندىعى تۋرالى ايتقان. بۇل فاكتىنى وبلىستىق پروكۋراتۋرا قىزمەتكەرى اسقار سىزدىقوۆ راستاعان. "اتالمىش زاتتىڭ تابىلعانى راس. ول ديامەترى سانتيمەترلىك عارىش كەمەسىنىڭ بولشەگى بولۋى ابدەن مۇمكىن. ءقازىر تابىلعان زاتقا راديولوگيالىق زەرتتەۋ جۇرگىزۋى ءۇشىن زەرتحاناعا جىبەرىلدى"،-دەيدى اسقار سىزدىقوۆ.
- وسىعان قاتىستى بەلگىلى زاڭگەر ماقسات ءىلياس ۇلى ءوزىنىڭ الەۋمەتتىك جەلىدەگى پاراقشاسىندا بىلاي دەپ جازدى. "كيىكتەردىڭ العاشقى ولىگى پروتون قۇلاعاننىڭ ەرتەسى تابىلعان... وسى جىلدىڭ 16-مامىرى كۇنى بايقوڭىردان ۇشقان رەسەيدىڭ پروتون زىمىرانى جەردەن كوتەرىلگەن سوڭ 500سەكۋنتتان كەيىن اپاتقا ۇشىرادى. ال ق ر اۋىل شارۋاشىلىق مينيسترلىگىنىڭ رەسمي اقپاراتى بويىنشا 17-مامىر كۇنى بەتپاقدالاداعى "ىرعىز-تورعاي" تابيعي رەزەرۆاتىندا العاشقى 4 كيىكتىڭ ولىگى تابىلعان. ارينە، مۇنى كەزدەيسوقتىق دەپ ايتا المايمىز..."
بوكەندەردىڭ جاپپاي قىرىۋى سەبەبىن انىقتاپ بەرۋ ءۇشىن شەت ەلدەن مامان الدىرتتىق
- ق ر اۋىلشارۋاشىلىق ءمينيسترى اسىلجان مامىتبەكوۆ مىرزا حالىقارالىق جويىلۋ ءقاۋىپى تونگەن جانۋارلاردى قورعاۋ ۇيىمىنا (بونن كونۆەنسياسى)، قازاق دالاسىنداعى كيىكتەردىڭ جاپپاي قىرىلۋىنىڭ سەبەبىن انىقتاۋ ءۇشىن ارنايى ەكسپەرتتەر (ساراپشىلار) جىبەرۋىن وتىنگەن. ق ر اشم باسپاسوز-قىزمەتىنىڭ رەسمي مالىمەتىنە سۇيەنسەك، ۇلىبريتانيا قورولدىك ۆەتەرەناريالىق كوللەدجىنەن پروفەسسور ريچارد كوح پەن گەرمانيادان فرانكۋرتتىق حايۋاناتتار ورتالىعىنىڭ پرەزيدەنتى، پروفەسسور شتەفان سۋتار ارنايى استاناعا كەلگەن.
- 2012-2014 جىلدارعا ارنالعان باعدارلاما بويىنشا ق ر ءبىلىم جانە عىلىم مينيسترلىگى «قازاقستان رەسپۋبليكاسىنىڭ اۋماعىندا مەكەندەيتىن كيىكتەر تارالىمىندا جۇقپالى اۋرۋلاردىڭ تارالۋىنىڭ ەپيزووتيالىق مونيتورينگى جانە الدىن الۋ ادىستەرىن ازىرلەۋ» دەگەن اتاۋمەن جالپى سوماسى 332 ملن. تەڭگەنى قۇرايتىن باعدارلامانىڭ تاپسىرىس بەرۋشىسى بولعان.
باعدارلامانى ورىنداۋشى بولىپ ق ر بعم بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ايقىندالادى. مەملەكەت قازىناسىنان ءبولىنۋ ءتيىس قاراجات بولىنگەنىمەن، جۇرگىزىلۋى ءتيىس پروفيلاكتيكالىق جۇمىستار اياعىنا دەيىن جۇرگىزىلمەگەن.
سونىمەن، قازاق دالاسىنداعى سانى ازدىعىنان جويىلىپ كەتۋ ءقاۋپى تونگەن جانۋارلار ساناتىنا جاتاتىن كيىكتەردىڭ جاپپاي قىرىلۋىنا كىمدەر جاۋاپتى؟
قوڭىر اڭ «گەپتيلدىڭ» ۋىنان قىرىلىپ جاتسا، ونىڭ جاۋابىن رەسەيدەن كىم سۇرايدى؟
نۇرگەلدى ءابدىعاني ۇلى
