قازاق ءتىلى مەن... قۇلپىناي بۇگىن سەنبى. ەسىك الدىندا تاڭەرتەڭمەن ماشينامەن كەلىپ، قۇلپىناي ساتىپ جاتىر. -كلۋبنيكا! مەستنايا! كاسكەلەنسكايا! نە دوروگو! داۋىستارى جەر جارادى.
اۋلاعا شىقتىم. قاراسام، قازاقتىڭ ەكى جىگىتى. ورىسشا حابارلاعاندا، اكسەنتتەرى وزىمىزدىكى، اۋىلدىكى، تولستوي ءتىلىنىڭ ءتۇبىن تۇسىرەدى. ساۋدا ونشا ءجۇرىپ جاتپاعان سەكىلدى. ادام از. مۇمكىن، سەنبى كۇنى ەرتەمەن ەل ءالى ۇيقىسىن اشا قويماعان شىعار، كىم بىلگەن. ايتتىم: -وسى اۋلادا تۇراتىنداردىڭ كوبىسى - ءوزىمىزدىڭ قارا كوز. كوبىسىن تانيمىن، بايقايمىن، نامىسشىل ءبارى. سەندەر قازاقشا حابارلاساڭدار، بالكىم، ساۋدالارىڭ دوڭگەلەنە تۇسەر... ءبىراز ۋاقىتتان سوڭ ۇيگە قايتىپ كەلە جاتسام، ماناعى جىگىتتەردىڭ ءبىرى جۇگىرىپ كەلىپ، راحمەتىن جاۋدىرىپ جاتىر. -اعا! ءسىز ايتقان سوڭ قازاقشا شاقىرىپ ەدىك، ادامدار كەلە باستادى. ءبىرازى ءبىزدى: "كلۋبنيكا" ەمەس، "قۇلپىناي" دەگەندەرىڭە، تازا قازاقشا شاقىرعاندارىڭا راحمەت!"، - دەپ ماقتاپ جاتىر. قۇلپىنايىمىزدى دا ساتىپ الىپ جاتىر... ءتۇيىن: تىلگە دەگەن قۇرمەت اۋلادا ساتىلاتىن قۇلپىنايدان باستالادى!ءامىرجان قوسانوۆ، facebook
