رەسمي مالىمەت بويىنشا قوستاناي، اقمولا جانە اقتوبە وبلىستارىندا قىرىلعان بوكەندەردىڭ سانى 85 000نان اسقان. رەسمي ورگاندار بوكەننىڭ قىرىلۋى پاستەرەللەز اۋرۋىنىڭ سالدارىنان دەپ وتىر. الايدا قىرىلعان بوكەندەردەن بۇل اۋرۋدىڭ بەلگىلەرى بايقالمايدى دەيدى كەيبىر ماماندار.

سونىمەن بىرگە اۋىل تۇرعىندارى بوكەندەردىڭ عانا ەمەس، سۋداعى باقالاردىڭ، مالدىڭ ءولىپ جاتقانى تۋرالى حابارلاۋدا.

قوستاناي وبلىسىندا ەڭ كوپ كيىك قىرىلعان (40 000نان اسا) اۋماقتان عارىش زىمىرانى بولشەگىنە ۇقسايتىن شار تارىزدەس تەمىر زات تابىلدى دەپ حابارلايدى قوستاناي وبلىستىق پروكۋراتۋراسىنىڭ ماماندارى. كيىكتەر قىرعىنىنا گەپتيلدىڭ قاتىسى بولۋى ابدەن مۇمكىن. وسى جىلدىڭ 16-مامىرى كۇنى بايقوڭىردان ۇشقان رەسەيدىڭ پروتون زىمىرانى جەردەن كوتەرىلگەن سوڭ 500 سەكۋنتتان كەيىن اپاتقا ۇشىرادى.

ال ق ر اۋىل شارۋاشىلىق مينيسترلىگىنىڭ رەسمي اقپاراتى بويىنشا 17-مامىر كۇنى، ياعني زىمىران قۇلاعاننىڭ ەرتەسى بەتپاقدالاداعى "ىرعىز-تورعاي" تابيعي رەزەرۆاتىندا العاشقى 4 كيىكتىڭ ولىگى تابىلعان.

كيىكتەر ولىمىنە پروتوننىڭ سەبەبى بولۋى مۇمكىن ەكەنىن مارعۇلان سەيسەنبايەۆ بىلاي تۇسىندىرەدى: «پروتوننىڭ ۇشۋ باعىتى زىمىراندى ۇشىرۋ الاڭى ورنالاسقان تورەتام بەكەتىنەن باستالىپ، ودان ءارى قوسكول بەكەتىنىڭ باتىسىنان ءبىرالى اۋا رايىن زەرتتەۋ بەكەتىن باسىپ ءوتىپ، ارقالىق قالاسىنىڭ وڭتۇستىك-شىعىسىن باسىپ ءوتىپ، اقمولا وبلىسىنىڭ وڭتۇستىك شەتىنەن ءارى قاراي قاراعاندى وبلىسىنىڭ سولتۇستىگىنەن ءارى قاراي التاي ايماعىنا، زابايكاليە تاعى باسقا اۋماقتى باسىپ وتەدى. GoogleMap ارقىلى قاراساڭىزدار جانە ءبىرالى بەكەتىن تابىڭىزدار. سول جەردەن باتىسقا قاراي 70-80 شاقىرىم جەردە ۇرپەك قىستاعى ورنالاسقان. بۇل ۇلكەن كيىكتەر تولدەيتىن اۋماق. قاراساڭىزدار ءدال سول جەردە اقتوبە، قوستاناي، قاراعاندى جانە قىزىلوردا وبلىستارىنىڭ شەندەسەتىنىن بايقايسىزدار. بۇل كيىكتەردىڭ جاپپاي قىرىلعان ورتالىعى. وسىندا كوپ كيىكتى «پروتون» ارقىلى ۋلاۋ ءۇشىن گەپتيلدى بۇكىل قازاقستان اۋماعىنا شاشۋ قاجەت ەمەس. ودان ءارى تروەكتوريا بويىنشا ازداعان كيىك ولگەن اقمولا وبلىسى جاتىر».

قاراعاندى وبلىسىنىڭ تۇرعىندارىنىڭ مالىمدەۋى بويىنشا كيىكتەردىڭ جاپپاي قىرىلۋىنا قاراعاندى وبلىسى بالقاش كولىنىڭ باتىسى مەن بەتپاقدالا اۋماعىن قامتىپ جاتقان سارىشاعان اسكەري- جاتتىعۋ پوليگونىندا جاسالعان سىناقتىڭ سەبەبى بولۋى مۇمكىن.

وسى جاعدايلارعا قاراپ، 85 000 كيىكتىڭ قىرىلۋىنا «پروتون» زىمىرانىنىڭ قۇلاۋى نەمەسە اقتوبە وبلىسىندا جانە قاراعاندى وبلىسىنداعى بەتپاقدالادا ورنالاسقان رەسەيدىڭ اسكەري-جاتتىعۋ پوليگونىنىڭ اسەرى بولۋى ابدەن مۇمكىن دەپ ويلايمىز.

سول سەبەپتى، «بايقوڭىر» عارىش ايلاعىنان «پروتون» زىمىرانىن ۇشىرۋدى تەز ارادا، ۇزىلدى-كەسىلدى توقتاتۋدى جانە ەلىمىزدەگى رەسەي فەدەراسياسىنىڭ اسكەري-جاتتىعۋ پوليگونىن شۇعىل جابۋدى تالاپ ەتەمىز.

«انتيگەپتيل» ەكولوگيالىق ازاماتتىق قوزعالىسىنىڭ مۇشەلەرى جانە قازاقستاندىق ازاماتتار...