دارىگەرلەر كومەككە جۇگىنگەن ايەلدىڭ كوزىنەن بىرنەشە ارانى تاۋىپ العان. ءيا، كادىمگى ۇشىپ-قونىپ جۇرەتىن، شاقسا جانىڭدى كوزىڭە كورسەتەتىن ارا. ارالار ايەل ادامنىڭ كوزىندەگى جاس وزەكتەرىمەن، دەنەدەن، كوزدەن بولىنەتىن سۇيىقتىقتارمەن قورەكتەنىپ كەلگەن.

تايۆان ەلىندە ارانىڭ ەڭ كىشكەنتاي دەپ ەسەپتەلىنەتىن ءتۇرى ءومىر سۇرەدى. ونى عىلىمدا دا، جەرگىلىكتى ايماقتاردا دا «تاي اراسى» دەپ اتايدى. ارانىڭ اتالعان ءتۇرى سوڭعى ۋاقىتتاردا جەر بەتىنەن اسا ۇلكەن قارقىنمەن جوعالىپ بارا جاتىر. ال عالىمداردىڭ ايتۋىنشا، ارالار جوعالسا، ەكوجۇيەنىڭ بۇزىلۋى ورىن الماق.

ارالار جاپپاي قىرىلماعان ەكەن...

عالىمدار ارالاردىڭ اتالمىش ءتۇرى ادام اعزاسىن جانە ودان بولىنەتىن ءتۇرلى سۇيىقتىقتارعا اسا قۇمار ەكەنىن دالەلدەپ وتىر.

29 جاستاعى تايۆاندىق ايەلدىڭ جانارىنان دارىگەرلەر ءتورت بىردەي ارانى تاپقان. ولار وسى ۋاقىتقا دەيىن كوز جاسىنىڭ وزەگىمەن قورەكتەنىپ كەلىپتى. ال كوزىنە ارا ۇيالاعان دەگەن وي ايەلدىڭ ءۇش ۇيىقتاسا تۇسىنە كىرمەگەن. كوزىنە قاتتى نارسەنىڭ تۇسكەنىن بايقاپ، سودان كەيىنگى جانىنا باتقان اۋرۋ مەن توقتاماي اققان جاس جەتەلەپ كەلگەن-مىس ايەلدى دارىگەرلەرگە.

ايەلدىڭ جانارىنا وتا جاساعان دارىگەر حۋنگ: "ميكروسكوپپەن قاراعاندا، مەن كوزدىڭ جيەگىندەگى جاندىكتەرگە ۇقسايتىن ءبىر نارسەنى بايقاپ قالدىم. مۇقيات، كوز الماسىنا زالال كەلتىرمەي، ولاردى الىپ شىعۋعا تىرىستىم"، - دەيدى.

ناتيجەسىندە كوز ۇياشىعىنان الىنعان ارالاردىڭ بارلىعى ءتىرى بولىپ شىققان. ايەلدىڭ دە دەنساۋلىعى ءبىرقالىپتى دەڭگەيدە ساقتالدى.