اقتوبەدە ورالماندارعا ارنالعان قاراجاتتى جىمقىرعان قىلمىستىق توپ سوتتالدى. ايماقتاعى كوشى-قون پوليسيا باسقارماسى قىزمەتكەرلەرىنىڭ قاتىسى بار بۇل ءىس ءۇش جىل بويىنا تەرگەلدى. سوت وتىرىسى دا بىرنەشە مارتە كەيىنگە شەگەرىلىپ، ايىپتالۋشىلاردىڭ كوپتىگىنەن جانە تاعىلعان ايىپتاردىڭ دەڭگەيىنە وراي ەكىگە بولگەن ەدى. 2010 جىلى موڭعوليادان اتامەكەنىنە ورالعان 26 وتباسىنا مەملەكەتتىك باعدارلاما بويىنشا كۆوتا رەتىندە 43 ميلليون تەڭگە بولىنگەن. تاعى ءبىر وتباسىنا بولەك ميلليون تەڭگەدەن استام قاراجات بەرىلىپتى. ءبىراق شەتتەن كەلگەن 228 قانداسىمىز ومىردە مۇلدەم جوق بولىپ شىقتى. سەبەبى، الماتى وبلىسىندا تۇراتىن ەرلى زايىپتى مۇراتبايەۆ پەن بەكەتوۆا ورالمان كەلىنشەكتى ەرتىپ الىپ، موڭعوليانىڭ پاسپورتىن الىپ كەلەدى. وعان جالعان سۋرەتتەر جابىستىرىپ، كوشى-قون پوليسياسىنا تاپسىرادى. وندا ىستەيتىن گۇلۆيرا تانبەكوۆا مەن گۇلميرا بەكسۇلتانوۆا جالعان قۇجات ازىرلەۋگە كومەك بەرەدى. ءتىپتى، ەلگە اياعى تيمەگەن ورالمانداردىڭ دەنساۋلىعىنا قاتىستى سپيد ورتالىعىنان انىقتاما دا الادى. ال اقشانى قولما-قول ءتۇسىرۋ ءۇشىن جالعان سەنىمحات ازىرلەيدى. وسىلايشا قىرۋار قارجىنى قولدى قىلعان. «كوشى-قون پوليسياسىنىڭ ەكى قىزمەتكەرى تانبەكوۆا مەن بەكسۇلتانوۆا، اقتوبەدە تۇراتىن ورالمان كەلىنشەك بايان كۇلشاروۆا ءۇش جىلعا شارتتى تۇردە باس بوستاندىعىنان ايرىلدى. سونىمەن قاتار پوليسيا قىزمەتكەرلەرى ءبىر ايلىق ەسەپتىك كورسەتكىش بويىنشا، ياعني 1 ميلليون 512 مىڭ تەڭگە ايىپپۇل تولەيدى. ال ەرلى-زايىپتى مۇراتبايەۆ پەن بەكەتوۆا الاياقتىق ءۇشىن جانە وزگە دە قىلمىستارىنا وراي 4 جىلعا تۇرمەگە وتىرادى. كۆوتاعا بولىنگەن العاشقى 1 ميلليون 716 مىڭ تەڭگەنى ايىپتالۋشىلاردىڭ بەسەۋى ءبولىپ تولەيدى، ال قالعان قىرىق ءۇش ميلليون تەڭگەنى مەملەكەتكە قايتارۋ مۇراتبايەۆ پەن بەكەتوۆاعا ارتىلىپ وتىر»، – دەيدى №2 اقتوبە قالالىق سوتتىڭ سۋدياسى زينايدا شميروۆا.