30 جىل بويى بيلىكتىڭ بيىك شىڭىندا جۇرگەندە مىعىم مىنەزىنەن ءبىر تايماعان نۇرسۇلتان نازاربايەۆ "Nur Otan" سەزى اياقتالار ساتتە ەرەكشە تولقىپ، كوز جاسىنا ەرىك بەردى. ەلباسىنىڭ ءبىر ساتتىك ەموسياسىن بۇكىل الەۋمەتتىك جەلى لەزدە ءىلىپ اكەتتى. ۇنەمى ءوزىن جيناقى ۇستايتىن تۇڭعىش پرەزيدەنتتىڭ بۇل جولى كوڭىلى نەگە بوسادى؟ بۇل جايىندا Qamshy.kz اقپارات اگەنتتىگى ەۋرازيا ارناسىنىڭ دەرەگىنە سۇيەنىپ حابارلايدى. 

ءبىر اي بۇرىن توگىلگەن كوز جاسى. ەلباسى پرەزيدەنتتىك وكىلەتتىگىن توقتاتامىن دەگەندە شىعىپ ەدى. باسقانى قايدام، كەي دەپۋتاتتىڭ كوڭىلى بوساپ، كەمسەڭدەگەنى قوعامدا قىزۋ ءسوز بولعان ەدى.

ال كۇنى كەشە وتكەن «Nur Otan» پارتياسىنىڭ سەزىندە ەلباسىنىڭ قاتتى تولقىپ، كوز جاسىنا ەرىك بەرىپ، كوڭىلى بوساعانىن كوردىك.

ءبىر ساتە كوز جاسىنا ەرىك بەرگەن ليدەرلەر بۇعان دەيىن دە بولعان. ماسەلەن، امەريكانىڭ بۇرىنعى پرەزيدەنتى جۋرناليستەر الدىندا ەموسياسىن تىيا الماسا، رەسەي باسشىسى پۋتين سايلاۋدا جەڭىسكە جەتكەندە تاماعىنا وكسىك تىعىلىپ، كوزىنەن جاس پارلاعان ەدى. 

پسيحولوگ مامانداردىڭ پىكىرىنشە،  بۇعان اتقارىلعان قىزمەتتىڭ اسەرى زور. سەبەبى، ەل باسقارىپ وتىرعان ادام ءوزىن تەمىردەي مىعىم ۇستاي الماسا حالىق سەنۋدەن قالاتىنىن ايتادى. ال، ساياساتتان الشاقتاماسا دا، اتقارعان ەڭبەگىنىڭ جەمىسىن كورىپ، ءبىراز جۇگى جەڭىلدەگەن ادامنىڭ ەموسياعا بەرىلۋى زاڭدى قۇبىلىس دەيدى. 

«ەگەر سەزىمىن بىلدىرە بەرسە،  قوبالجىسا، رەنجىسە، جىلاسا ، وندا حالىق وعان سەنىمسىزدىكپەن قارايدى. ويتكەنى بيلىك باسىندا وتىرعان ادام حالىقتىڭ سەنىمىن ۇيالاتۋ ءۇشىن ول بار ەموسياسىن سىرتقا كورسەتپەيدى. سونشاما ىشتە ۇستاعان باستان كەشۋلەرىن، سەزىمدەرىن مۇمكىن وسى ءبىر قيماستىق سەزىمىمەن سىرتقا شىعارعان دا بولۋى مۇمكىن»، - دەيدى پسيحولوگ گۇلزيرا اقىنبەك.

تاريحشىلاردىڭ دا پايىمى وسىعان جاقىن. ءبىراق داعدارىستان الىپ شىعىپ، ەلدىڭ ەڭسەسىن كوتەردىم، ماقساتىما جەتتىم،- دەپ قۋانىشتان جىلاۋى دا مۇمكىن دەيدى. 

«سوناۋ 91ء-شى جىلدارى «مەن ءوز حالقىما التىن تاۋلاردى ۋادە بەرە المايمىن، بىر-ەكى ايدىڭ ىشىندە ءومىرىمىز جاقسارىپ قالادى دەپ ۋادە بەرە المايمىن، ءبىراق ءوز حالقىم ءۇشىن باسىمدى تىگۋگە دايىنمىن»دەگەن ۋادەسىنەن. بۇل ءوزىنىڭ ەڭبەگىن تولىعىمەن ءوزىنىڭ ءومىرىن قازاقستاننىڭ بولاشاعى ءۇشىن توككەن ادامنىڭ سونداي ءبىر كوڭىلىنىڭ بەلگىسى. بۇل ءار ادامنىڭ قولىنان كەلە بەرمەيدى»، دەيدى تاريح عىلىمىنىڭ كانديداتى بوتاگوز قايىپوۆا.

90-شى جىلداردىڭ باسى ەدى. تەلەارنالاردان نۇرسۇلتان نازاربايەۆ ءسوزىن، بەكبولات تىلەۋحان ءانىن جازعان تۋىندى كورسەتىلە باستايدى. ءدال وسى ءان شىرقالعاندا ەلباسى كوزىنە جاس الادى ەكەن. مۇنى ءاننىڭ اۆتورى ايتىپ وتىر.

«بۇل ءبىرىنشى رەت ەمەس، ەڭ ءبىرىنشى وسى ءاندى 1996 جىلدىڭ 8 مايىندا الاتاۋدىڭ باۋىرىندا ءبىر شاتقالدا تۇرىپ ەستىگەنى بار-تۇعىن. سوندا ءبىرىنشى ەستىگەندە، وسى ولەڭدى انىمەن ەستىگەندە كوزىنە جاس كەلگەن ەلباسىمىزدىڭ. ودان كەين بىرنەشە جينالىستاردا، كونسەرتتەردە بولعان كەزدە ەلگە قاراپ وتىرعان جوق، ساحناعا قاراپ وتىرعان كەزدە دە تولقىعان، مەن كۋا بولدىم»، - دەيدى ق ر پارلامەنت ءماجىلىسىنىڭ دەپۋتاتى بەكبولات تىلەۋحان.

بەكبولات تىلەۋحان «ءوزىم ءبىر داۋرەننىڭ وتكەنىن سەزىنىپ جىلادىم»  دەسە، ەلباسى ءبىر شەتى ساياساتكەر، ءبىر شەتى شىعارماشىل ادام بولعان سوڭ كوزىنە جاس الدى دەپ وتىر.

«لاۋازىمىن بوساتىپ بەرگەن كەزدە دە ايتتى «قازاقستان سەندەرگە امانات»،- دەپ، «سەندەرگە تاپسىردىم»،- دەپ. سوندا تاۋەلسىزدىكتىڭ ءقادىرىن بىرەۋ بىلسە، ول نازاربايەۆ بىلەدى. ول تولقۋدىڭ سەبەبىن ەل-جۇرت تۇسىنۋگە ءتيىستى. بۇل ءبىر جاعىنان شىعارماشىلىققا جاقىن ادام بولعاننان كەيىن، ونىڭ جۇرەگىنىڭ جۇمساقتىعىنىڭ وزىندە دە قازاقتىڭ سيپاتى جاتىر»، - دەيدى بەكبولات تىلەۋحان.

قالاي دەگەنىمەن، 23 ساۋىردە بولعان جيىن كوپتىڭ ەسىندە ءالى ۇزاققا ساقتالاتىن ءتارىزدى. كوبىنە ونى ءدال وسى، ەموسياعا تولى كادرمەن بايلانىستىراتىنا كۇمان جوق.

ۇسىنعان: نازەركە لابيحان