تانىمال ماتەماتيك اسقار جۇمادىلدايەۆ "شىڭعىس حاننىڭ قازاق بولۋى ماڭىزدى ما؟" دەگەن سۇراققا جاۋاپ بەردى دەپ جازادى Qamshy.kz اقپارات اگەنتتىگى. بۇل تۋرالى اسقار جۇمادىلدايەۆ "پاراسات مايدانى" باعدارلاماسىندا ايتقان. 

"شىڭعىس حاندى ءبىر مينۋت قازاق دەپ ەسەپتەيىك. نە وزگەرەدى سوندا؟ مارستا الما گۇلدەيدى مە؟ يۋپيتەردە جەل تۇرا ما؟  ەكى جەردەگى ەكى بەس بولا ما؟ الدە سىزدەن ءمۇيىز شىعا ما؟ ءمۇيىز شىقسا قانشا سانتيمەتر شىعادى؟ مەن وسى ماسەلەنى تۇسىنبەيمىن. ءسىز ارتقا قاراپ جۇرمەڭىز، كەرىسىنشە العا قاراپ ءجۇرىڭىز. بۇگىنگىنى ويلاڭىز، ەرتەڭگىنى ويلاڭىز. ءبىز مىسالى ماڭگىلىك ەل دەگەندى ءجيى ايتامىز. ماڭگىلىك ەل دەگەن قانشا جىل؟ 1 جىل، 10 جىل ما؟ قالاي ءبىز ول كەزگە دەيىن ءومىر سۇرەمىز؟ مەنىڭ ويىمشا، ءبىلىم ىزدەسەڭىز ءسىز ەرتەڭگىنىڭ تىرلىگىمەن شۇعىلدانىڭىز. ەگەر ءسىز بىرەۋدى مويىنداتامىن دەسەڭىز تەحنولوگيا جاساڭىز. تەحنوكرات بولىڭىز! ءسىز جاپوننىڭ Tayota-سى سەكىلدى كولىك ويلاپ تابىڭىزشى. بۇل قولىڭىزدان كەلمەسە موتوسيكل نەمەسە ۆەلوسيپەد ويلاپ تابىڭىز. ول دا قولىڭىزدان كەلمەسە دوڭگەلەك ويلاپ تابىڭىز. سوندا عانا ءسىزدى مويىندايتىن بولادى. ءسىز تاريحىم تەرەڭ دەپ ايتاسىز. ءبىراق تاريحىڭىز وزىڭىزدەن باسقا ەشكىمگە كەرەك ەمەس. ءسىز تاريحىم تەرەڭ ەمەس دەپ ايتقان قاي ەلدى بىلەسىز؟ ءسىز مەنىڭ ءتىلىم باي ەمەس دەپ ايتقان قاي ەلدى بىلەسىز؟ سوندىقتان ءتىلىم باي، تاريحىم تەرەڭ دەگەننىڭ ءبارى بوس ءسوز! ءبىراق بۇدان كەيىن وزىڭىزدەن كەمشىلىك ىزدەمەڭىز. ءسىز بۇدان دۇرىس قورىتىندى شىعارىڭىز. ءسوز بەن ءىستىڭ الشاقتىعى بار. مىسالى جاپوندار ءۇشىن ءسوز بەن ءىستىڭ ارا قاشىقتىعى 1 سم. گەرمانيا ءۇشىن — 2سم. ال امەريكا ءۇشىن 5 سم دەلىك. ال قازاق ءۇشىن قانشا سم؟ مەنىڭ ويىمشا مىڭداعان شاقىرىم سەكىلدى. ءسوز ءبىر بولەك ال ءىسى ەكىنشى بولەك"، - دەيدى اسقار جۇمادىلدايەۆ. 

ۇسىنعان: اسەل بولات قىزى