الەۋمەتتىك جەلىلەردە ۇقكد ارنايى جاساعى قىزمەتكەرلەرىنىڭ اۆانگاردتاعى بەس قاباتتى ءۇيدىڭ اۋلاسىندا ءۇش ەر ادامدى شالشىققا ەتپەتىنەن جاتقىزىپ، كۇشتەپ ۇستاعانى تۇسىرىلگەن بەينەجازبا تاراپ كەتكەن. «اج»-عا بەلگىلى بولعانداي، بۇلار  ەش شىمىرىكپەستەن ادام ۇرلاپ، قۇن تالاپ ەتىپ جۇرگەن «سالافيزم» ءدىني اعىمىن ۇستانۋشىلار دەپ جازادى Qamshy.kz اقپارات اگەنتتىگى جەرگىلىكتى باق-تىڭ دەرەگىن نەگىزگە الىپ. 

اتىراۋ وبلىستىق پوليسيا دەپارتامەنتىنىڭ ەكسترەميزمگە قارسى ءىس-قيمىل باسقارماسىندا وقيعاعا قاتىستى بىلاي دەپ حابارلادى: «1990 جانە 1991 جىلعى ءۇش ازامات 16 ساۋىردە وزبەكستان ازاماتى س.يا.-نى كۇش قولدانىپ، پاتەرىنەن الىپ كەتكەن. سودان كەيىن ۇرلانعان ادامنىڭ دوسى، وزبەكستان ازاماتى م.س.-دان 300 مىڭ تەڭگە بوپسالاي باستاعان. بۇدان بۇرىن قاسكويلەردىڭ م.س.-دان 100 مىڭ تەڭگە كولەمىندە اقشا العانى انىقتالدى».

ۇستالۋشىلاردان جابىرلەنۋشىلەردىڭ اقشالارى مەن زاتتارى جانە ۇرلانعان جىگىتتى ۇرىپ-سوققان نۋنچاكي مەن جابىرلەنۋشىنىڭ بىرىنە تيەسىلى «لادا لارگۋس» كولىگىنىڭ كىلتى تاركىلەندى. ۇشەۋىنە قاتىستى ادام ۇرلاۋ جانە بوپسالاۋ فاكتىسى بويىنشا قىلمىستىق ىستەر قوزعالدى. ماتەريالدار ءارى قاراي تەرگەۋ ءۇشىن پوليسيا دەپارتامەنتىنە جولداندى.

19 ساۋىردە اتىراۋ مامانداندىرىلعان تەرگەۋ سوتى كۇدىكتىلەردى 2 اي مەرزىمگە تەرگەۋ اباقتىسىنا قاماۋعا سانكسيا بەردى. ولار قىلمىستارىن مويىنداپ وتىر.

ۇسىنعان: اسەل بولات قىزى