وسكەمەندە كەمشىلىكتەردى كوزبە-كوز، وقيعا ورنىنا بارىپ تۇرىپ سىناپ ايتاتىن ەرەكشە اقىن پايدا بولدى دەپ حابارلايدى Qamshy.kz اقپارات اگەنتتىگى altaynews.kz سايتىنا سىلتەمە جاساپ.
الەۋمەتتىك جەلىلەردە ءوزىن «اقىنكەلدى» دەگەن اتپەن تانىستىرعان ايان قالىمبەك ەسىمدى جىگىت بۇدان بىلاي قوعامداعى كوزگە ۇرىپ تۇرعان كەمشىلىكتەردى وسىنداي جولمەن قالىڭ كوپشىلىككە جەتكىزگىسى كەلەتىنىن ايتادى.
قولىنا دومبىرا ۇستاعان ول وسكەمەن ۆوكزالىنا كەلىپ، عيماراتتىڭ ەسكى جانە ءسانسىز ەكەندىگىن ايتا كەلە پەرروننىڭ جوقتىعىن جىرعا قوسىپ:
وسكەمەن شىعىستاعى گۇلدى قالا،
ال مىنا ۆوكزال بولعان ءتۇردى قارا.
پويىزعا مىنەتۇعىن پەررونى جوق،
باسشىلار ءبىر پايدالى ءىس تىندىرا ما؟
ۆاگوننىڭ بيگىنە ورمەلەگەن،
قاريالار جامباستارىن سىندىرا ما؟
قويىپ قويعان، ورىندىق شەلەگى نە؟
مۇنداي جەرگە تۋريستەر كەلەدى مە؟
ۆوكزال دەگەن قالانىڭ بەت بەينەسى،
مۇنداي سوراقىلىقتىڭ سەبەبى نە؟
جولاۋشى مەن قوناقتان ۇيات بولدى اۋ،
باسشىلار قۇلاق سالعىن ولەڭىمە... دەپ جىرلايدى.
اقىنكەلدى الداعى ۋاقىتتا دا عايىپتان پايدا بولىپ ايتىپ-ايتىپ كەتەتىن الەۋمەتتىك جەلىلەردەگى شىعارماشىلىعىن جالعاستىرا بەرمەكشى.
ۇسىنعان: ماقپال سەمباي
