وتكەندە 9-مامىر جاقىنداعاندا ەلىمىزدىڭ بارلىق اقپارات قۇرالدارىندا الاپات تاسقىن كوتەرىلىپ ەدى. "ۇلى جەڭىس كۇنى كەلە جاتىر"، "جەڭىس كۇنىن ساياسيلاندىرماۋ كەرەك"، "وتانىمىزدى قورعاعاندارعا تاعزىم ەتۋ كەرەك" دەپ. ءبىراق، قانداي "ۇلى وتاندى" قورعاپ قالدىق، كىمنەن قورعادىق دەگەن سۇراققا بىردە-بىر دۇرىس جاۋاپ كورگەن جوقپىن. ول سوعىستا ميلليونداعان ادام قازا بولعانى راس: ءبىراق سول قىرعىننىڭ باستالۋىنا گيتلەرمەن قاتار كسرو-نىڭ جەرىن ودان ءارى ۇلعايتىپ، قان توگۋدى باستى ساياسي قاعيداتىنا اينالدىرعان ءستاليننىڭ دە جاۋاپتى ەكەنىن نەگە ايتپايدى؟ سول "ۇلى جەڭىسكە اكەلگەن" سوعىسقا دەيىن-اق ءستاليننىڭ ءوز ازاماتتارىن مالشا قىرعانىن نەگە جازبايمىز؟ وسىعان بايلانىستى رەپرەسسيا قۇرباندارىن ەسكە الاتىن 31 مامىر جاقىنداپ قالعانىن دا بىلەمىز. از-مۇز ب ا ق بولماسا، ستاليندىك قۋعىنعا ۇشىراپ، جاقىسزى اتىلىپ، قامالىپ، ايدالىپ كەتكەن ميلليونداعان قازاقتىڭ تاعدىرى تۋرالى ايتىپ جاتقاندار كوپ ەمەس. ال شىن مانىنە كەلسەك، بۇل قازاق حالقىنا جاسالعان گەنوسيد بولعان جوق پا؟ جانە ەڭ اۋىرى تەك قازاق حالقىنا قارسى جاسالعان جوق، كوممۋنيستەردىڭ گەنوسيدىنە ورىستىڭ ءوزى دە، ۋكراين حالقى دا، باسقالارى دا تەڭ دارەجەدە ۇشىرادى. ءبىراق، سونى ءالى كۇنگە دەيىن گەنوسيد دەپ اتاپ، ارنايى زاڭ قابىلداپ، سول وقيعالارعا تاريحي باعا بەرە الماي كەلە جاتىرمىز. بەيبىت زاماندا ميلليونداعان ادامدى قىرىپ جاتسا، بۇل گەنوسيد ەمەي نە ەندى؟! مىنە، بۇل كۇندى بارلىعىمىز بىرگە اتاپ ءوتىپ، كوممۋنيستىك رەجيمنىڭ جازىقسىز قۇرباندارىن ەسكە الۋىمىز ءتيىس. وسى سەبەپتى، 31-مامىر كۇنى، ساعات 11-00-دە ناۋرىزباي باتىر مەن قاراساي باتىر كوشەلەرىنىڭ قيىلىسىنداعى ساياباقتا ورنالاسقان رەپرەسسيا قۇرباندارىنىڭ ەسكەرتكىشى الدىنا جينالىپ، ولاردىڭ رۋحىنا تاعزىم ەتىپ، ەسكە الساق دەگەن ۇسىنىس بار. بارلىقتارىڭىزدى سوعان شاقىرامىز.

جانبولات ماماي، facebook