اتالمىش دومەننىڭ يەسى قايرات الماتوۆ قازاقستاننىڭ استاناسىمەن اتتاس دومەن نەگە 25 ميلليون تەڭگە تۇراتىنىن ءتۇسىندىرىپ بەردى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

قايرات الماتوۆ — فريلانسەر ءارى باعدارلاما جاساۋمەن اينالىساتىن ازامات. ول باس قالانىڭ اتى وزگەرگەنىن ەستىگەن بويدا نۇر-سۇلتان قالاسىمەن اتتاس دومەندى 3300 تەڭگەگە ساتىپ العان. ءوزى جاريا ەتكەندەي، قايرات العاشىندا nursultan.kz دەگەن دومەندى العىسى كەلگەن-مىس. ءبىراق تىركەۋ سايتىنان ىزدەگەن ۋاقىتتا، ول دومەننىڭ بوس ەمەس ەكەنىن كورىپ، سان سوعىپ قالىپتى.

"مەن nursultan.kz دەگەن دومەندى العىم كەلگەن. ءبىراق ول بوس ەمەس ەكەن. سوسىن ويلانا كەلە دەفيس قويىلعان دومەندى ساتىپ الدىم. ارتىنشا باس قالانىڭ نۇر-سۇلتان بولىپ جازىلاتىنىن ەستىگەندە قاتتى قۋاندىم. مەن بۇل كاسىپپەن 23-24 جاسىمدا دا اينالىسقانىمىن. ءبىراق كەيىن قويىپ كەتىپ ەدىم. ەندى مەنىڭ تەڭىز جاعاسىنان ءۇي العىم كەلگەن ارمانىم ورىندالاتىن سياقتى"، - دەيدى اتىشۋلى دومەننىڭ 29 جاستاعى يەسى.

قازاقستان استاناسىنىڭ نۇر-سۇلتان دەپ اتالاتىنى ناقتىلانعان ۋاقىتتان كەيىن جارتى ساعات وتكەندە قايراتقا رەسەيدەن بازبىرەۋلەر حابارلاسىپ، 40 مىڭ دوللار، كەلەسى كۇنى 60 مىڭ دوللار ۇسىنىپتى. ءبىر اي ىشىندە اتالمىش دومەندى ساتىپ الۋ ماقساتىندا ونىڭ يەسىنە 30-دان اسا ادام قوڭىراۋ شالعان.

"دومەندى ساتىپ العىسى كەلەتىن قازاقستاندىقتار دا جوق ەمەس. ءبىراق ولار رەسەيلىكتەرگە قاراعاندا الدەقايدا از قاراجات ۇسىنۋدا. ءبىراق مەن ونى ساتۋعا اسىقپايمىن. ءالى دە ۇسىنىستاردى قاراۋ ۇستىندەمىن. بۇل دومەن باس قالامەن اتتاس بولعاندىقتان، الدەقايدا قىمبات تۇرۋى ءتيىس. ەگەر قازاقستاندىقتار مەن قالاعان قاراجاتتى ۇسىنباسا، ونى شەتەلدىكتەرگە ساتاتىن شىعارمىن"، - دەيدى قايرات الماتوۆ.

دومەن يەسى ءوزىنىڭ قولىنداعى دۇنيەسىنىڭ ەڭ قىمبات دومەن رەتىندە تاريحتا قالعانىن قالايتىنىن جاسىرمادى. ءبىرشاما ۋاقىت بۇرىن اتالمىش دومەننىڭ 24 ميلليون تەڭگەگە ەلەكتروندى ساتىلىمعا شىققانى جاريا بولعان.

3300 تەڭگەلىك دومەن ءوزىن 25 ميلليون تەڭگەگە ساتىپ الاتىن يەسىن ىزدەۋ ۇستىندە. يەسى دە تەڭىز جاعاسىنان ءۇي الۋعا اسىعىپ وتىرعان كورىنەدى.

اۋدارعان: ادىلەت مادەنيەت