الماتىنىڭ ەڭسەلى كوشەلەرىنىڭ ءبىرى بۇقار جىراۋ گۇلزارىنىڭ بويىندا، ەسەنتاي وزەنىنىڭ جاعاسىندا ورنالاسقان "بۇقار جىراۋ تاۋەرس" تۇرعىن ءۇي كەشەنىن الماتىلىقتاردىڭ ءبىرقاتارى ءبىلۋى ءتيىس. بۇگىن سول كەشەن تۇرعىندارى ۇردىسكە اينالىپ كەتكەن كەزەكتى جينالىسىن جاسادى.

"تۇرعىندار جينالىس جاساعالى جاتىر"  دەگەن حاباردى ەستىپ، ءتورت بلوكتان تۇراتىن تۇرعىن ءۇي كەشەنىنە ءبىز دە جەتتىك ەنتەلەپ. بيىك ءارى الىپ قورعاندار اراسىنداعى الاڭقاي ىسپەتتى ورىندا بىرنەشە ادام قاراسى بايقالادى. ميكروفوندار، ۇستەلدەر قويىلىپتى. ۇيىمداستىرۋشىلار جاعى قاربالاس كورىنەدى. ءاربىرىنىڭ قۇشاعىندا ءبىر-بىر پاپقا قاعاز.

كوپتەن كۇتكەن جينالىسىمىز دا باستالدى. ۇزىن سانى ەلۋ-الپىس ادامدى جۋىقتايتىن جيىن مۇشەلەرى جيىن باستالىسىمەن-اق ءوز ۋاجدەرىن ايتا باستاعان. ءبىراق بۇل جيىن وتە تياناقتى ۇيىمداستىرىلعان ەكەن. ارنايى رەگلامەنتى، جارعىسى بار دەگەندەي.

رەسمي جيىنداردىڭ ىزىمەن الاڭقايدا وتكەن جينالىس تا ءوز ءتوراعاسىن سايلاۋدان باستالدى.

"قۇرمەتتى، كورشىلەر! مەن №490 پاتەر تۇرعىنىمىن. ەسىمىم – شايماعامبەتوۆ مارات. وسى جيىننىڭ ۇيىمداستىرۋشىسى رەتىندە جينالىس ءتوراعاسى ەتىپ ماحمەتوۆ ميربولاتتى جانە ونىڭ حاتشىسى قىلىپ ماكاروۆا ەلەنانى سايلاۋدى ۇسىنامىن"، - دەپ باستالدى داۋلى ماسەلەنى شەشۋگە جينالعان كوپشىلىكتىڭ باسقوسۋى.

وسىدان كەيىن جينالىس ءتورالقاسى كۇن تارتىبىندەگى ماسەلەلەر مەن تالداناتىن ماسەلەلەر ءتىزىمىن جاريالادى.

وسى تۇستا ءسوز يىرىمىندە ايتا كەتەلىك، "بۇقار جىراۋ تاۋەرس" تۇرعىن ءۇي كەشەنى 10 جىلدان استام ۋاقىت شەڭبەرىندە "ادال سەرۆيس" ج ش س باسشىلىعىندا بولعان. وسى مەرزىم ىشىندە اتالمىش جاۋاپكەرشىلىگى شەكتەۋلى سەرىكتەستىك تۇرعىنداردىڭ كوڭىلىنەن شىعۋدىڭ ورنىنا ولاردىڭ نارازىلىعىن تۋعىزعان.

ءقازىر تۇرعىن ءۇي كەشەنىنىڭ تۇرعىندارىنىڭ كوپشىلىگى ءجيى جينالىپ، وزدەرىن وزدەرى باسقارۋدى، ياعني، پيك (پاتەر يەلەرىنىڭ كووپەراتيۆى) قۇرۋ ماسەلەسىن تالقىلاپ كەلەدى.

بۇگىنگى ءبىز بارعان اۋقىمدى باسقوسۋ دا وسى ماقساتتا ۇيىمداستىرىلعان. ءقازىر تۇرعىندار پىكىرى ەكىگە جارىلىپ وتىر. ءبىر بولىگى "ادال سەرۆيس" ج ش س باسشىلىعىندا قالا بەرۋدى دۇرىس دەپ تاپسا، ەكىنشى بولىگى پيك قۇرۋدى ءجون سانايدى.

بۇگىنگى جيىننان بۇل ەكى باعىتقا قارسى ءۇشىنشى توپتىڭ دا پايدا بولعانىن بايقادىق. ءىرى توپتاردىڭ پىكىرىمەن كەلىسپەي، جيىننىڭ شىرقىن بۇزعان ءبىرلى-جارىم ادام جاڭادان قۇرىلعالى وتىرعان پيك باسشىلىعىنا "بۇقار جىراۋ تاۋەرستىڭ" تۇرعىنى بەرىك ورىنتاي ۇلىنىڭ كەلگەنىن قالامايدى. ال الگى پيك قۇرۋدى مۇددە تۇتىپ جۇرگەن تۇرعىندار توبىنىڭ ءتوراعالىققا ۇسىنىپ وتىرعان جالعىز كانديداتى – وسى بەرىك ورىنتاي ۇلى ەسىمدى ازامات.

جيىنعا تەك تۇرعىندار عانا ەمەس، جۋرناليستەر، سونداي-اق الماتى تۇرعىن ءۇي ساياساتى كوممۋنالدىق مەملەكەتتىك مەكەمەسىنەن ارنايى وكىل قاتىستى.

"زاڭناماعا سايكەس، تۇرعىنداردىڭ ءوز تاڭداۋىن جاساۋعا قۇقىعى بار. سونداي-اق، ءىرى تۇرعىن ءۇي كەشەندەرىن بەلگىلى ءبىر ج ش س نەمەسە تۇرعىندار اراسىنان قۇرىلعان پيك باسقارۋى ءتيىس. سىزدەردىڭ تاراپتان وسى عيماراتتى 10 جىلدان اسا ۋاقىت باسقارىپ كەلگەن "ادال سەرۆيس" ج ش س ۇستىنەن الماتى قالالىق تۇرعىن ءۇي ساياساتى باسقارماسىنا ارىز-شاعىم كەلىپ ءتۇستى.

اكىمشىلىك باسقارۋ مەكەمەسىنىڭ وكىلىنەن كەيىن مىنبەر تىزگىنى تۇرعىندار ۋىسىنا ءوتتى.

"قايىرلى كۇن، قۇرمەتتى كورشىلەر! مەنىڭ ەسىمىم – جومارتوۆا ءاليا. №427 پاتەر تۇرعىنىمىن. قۇرمەتتى كورشىلەر، مىنە، ءبىرشاما ۋاقىتتان كەيىن ءبىزدىڭ ءۇيىمىزدى «ادال سەرۆيس» ج ش س باسقارىپ كەلە جاتقانىنا 11 جىلدىڭ ءجۇزى تولادى. وسى ۋاقىتقا دەيىن اتالعان سەرىكتەستىك تۇرعىندارعا ەشقانداي ەسەپ بەرگەن جوق. جيناپ جاتقان قاراجاتىمىز دا از اقشا ەمەس. ءبىزدىڭ جيناعان قارجىمىز ءبىر قالتانى بايىتۋدا. ءبىزدىڭ اقشامىزدىڭ ەسەبىنەن كورشى تۇرعان "پرەستيج" جانە "مەچتا" تۇرعىن ءۇي كەشەندەرىن تۇرعىزدى. ءبىز بۇعان كوز جۇما قاراي المايمىز. مەن ءوزىمىز باسقاراتىن پيك-تى قۇرۋدى قولدايمىن"، - دەدى تۇرعىنداردىڭ ءبىرى جومارتوۆا ءاليا.

سونداي-اق، ەلەكتر جۇيەسىنىڭ كورشى عيماراتتارعا زاڭسىز تاراتىلۋى مەن كۇزەت اگەنتتىگىنىڭ سالعىرت جۇمىسى، جەدەلساتىنىڭ زاڭسىز تارتىپ الىنۋى دا تۇرعىنداردىڭ ىزاسىن كەلتىرەدى. ال بۇل سۇراقتارعا جاۋاپ بەرۋگە "ادال سەرۆيس" ج ش س باسشىلىعى قۇلىقسىز.

"مەنىڭ ەسىمىم – عالىم مەيرام. №427 پاتەر تۇرعىنىمىن. مەنى تۇرعىنداردىڭ باسىم كوپشىلىگىنىڭ پيك قۇرۋعا دەگەن قولداۋى قۋانتادى. ءبىزدىڭ 4-بلوكتاعى جاعداي ءتىپتى مۇشكىل. تۇرعىنداردان جەدەلساتى زاڭسىز تارتىپ الىندى. ال ءبىز اي سايىن "الماتى ليفت" مەكەمەسىنە جەدەلساتىنى قولدانعانىمىز ءۇشىن اقشا تولەپ كەلەمىز. بىزدەگى جۇمىس جاساپ تۇرعان جەدەلساتىنى 30 مينۋت كۇتەمىز. «ادال سەرۆيس» ج ش س باسشىلىعى بۇل ماسەلەگە باس اۋىرتقىسى كەلمەيدى. سوندىقتان، مەن بەرىكتى جانە پيك-تى قولدايمىن»، - دەدى ميكروفون العان عالىم مەيرام ەسىمدى تۇرعىن.

ماسەلەنىڭ ءتۇبىن قازبالاي بەرسە، تاۋسىلار ءتۇرى جوق. باس-اياعى ءبىر ساعاتقا جوسپارلانعان جيىن ەكى جارىم ساعاتتان استام ۋاقىتقا سوزىلدى. ايتىلۋى ءتيىس تاعى ءبىر سۇمدىق جاعداي – بىرنەشە ميلليوندار تۇراتىن ەلەكتر ەنەرگياسى جەلىسىنىڭ كورشى عيماراتتارعا زاڭسىز تاراتىلۋى.

"مەن دە پيك قۇرۋدى جانە ونى بەرىك ورىنتايەۆتىڭ باسقارۋىن قولدايمىن! ءبىز اي سايىن ەلەكتر ەنەرگياسىن قولدانعانىمىز ءۇشىن قوماقتى قاراجات تولەيمىز. بىزگە بەلگىلى بولعان اقپاراتتارعا سۇيەنسەك، جالپى كولەمى 9 ميلليون تەڭگەنى قۇرايتىن ەلەكتر ەنەرگياسىنىڭ جەلىسى كورشى عيماراتتارعا تاراتىلعان. ال ول عيماراتتار "ادال سەرۆيس" ج ش س ەنشىسىندە. ءبىزدىڭ قاراجاتىمىز وزگە قالتالارعا قۇيىلۋدا. بۇعان كەيبىر كورشىلەرىمىز سەنگىسى كەلمەيدى. مەن ايتقان فاكتىنى ءبىزدىڭ تۇرعىن ءۇي كەشەنىمىزدىڭ ارنايى ماماندارى دا راستايدى. مەن جەم بولۋدى قالامايمىن"، - دەدى ءسوز العان №190 پاتەر تۇرعىنى ۆيكتوريا ەسىمدى ازاماتشا.

ازاماتتارعا ادالدىق تانىتۋدى مۇددە ەتەتىن "ادال سەرۆيستىڭ" اتاۋىن انتونيمدىك ماعىناعا اۆتوماتتى تۇردە وزگەرتىپ بەرەتىن سوراقىلىقتاردىڭ سوڭى ەمەس بۇل.

"مەن دە پيك-تى قوس قولىمدى كوتەرىپ قولدايتىن تۇرعىنمىن. مەن مىنا نارسەنى ايتقىم كەلەدى. "ادال سەرۆيس" ج ش س جالداپ وتىرعان كۇزەت اگەنتتىگى ءبىزدىڭ كورشىمىز جانە پيك-كە قارسى ازامات شوحاننىڭ ەنشىسىندە. ءقازىر ءبىزدىڭ قاۋىپسىزدىگىمىز جەتكىلىكتى دەڭگەيدە قولدانبايدى. اۋلاعا كىم كورىنگەن كىرە بەرەدى. ال سەرىكتەستىك تاراپىنان بۇل ماسەلەگە ەشقانداي شارا قولدانىلماي كەلەدى. "قارعا قارعانىڭ كوزىن شۇقىمايتىنى" انىق قوي. وسى سەبەپتى ءبىز پيك قۇرىپ، تۇرعىندار تالابىن قاناعاتتاندىراتىن كۇزەت اگەنتتىگىن قۇرۋدى كوزدەيمىز"، - دەيدى №304 پاتەر تۇرعىنى ازيما ەسىمدى ازاماتشا.

قوس پىكىردەگى تاراپتىڭ قولداۋشىلارى بىر-بىرىمەن قىزىلكەڭىردەك بولىپ داۋلاسىپ، ورتاق مامىلەگە كەلە المادى.

جيىنعا كەلگەندەر اراسىندا "ادال سەرۆيس" ج ش س وكىلى دە بولدى. ءبىر قۇشاق قاعازىن قولتىقتاپ، حالىقتى تاعى دا وزدەرىنە يكەمدەۋگە تىرىسقان ازاماتشانى تىڭدار قۇلاق تابىلمادى.

شارا سوڭىندا كوپشىلىكتىڭ ۇسىنىسىنا يەلىك ەتىپ وتىرعان تۇرعىن بەرىك ورىنتايەۆ كورشىلەرىن سابىرعا شاقىرىپ، تۇرعىن ءۇي كەشەنىندەگى ولقىلىقتاردىڭ ورنىن تولتىرۋ بارشاعا ورتاق ماقسات ەكەنىن جاريا ەتتى.

مۇددە ورتاق، باعىت الۋان ءتۇرلى. بۇل داۋدىڭ باستالعانىنا ءبىرشاما ۋاقىت بولدى. قاشان ورتاق شەشىم تاپپاق؟!