قازاق حالقى ەجەلدەن-اق قارعىس جاۋدىرماۋ كەرەكتىگىن تىلگە تيەك ەتىپ جۇرەتىن بولعان. تاڭداۋلى حاديس شاريفتە بۇل تۋرالى: «وزدەرىڭە، بالا-شاعالارىڭا جانە مال-مۇلىكتەرىڭە بەتدۇعا(قارعىس) ەتپەڭدەر! دۇعالاردىڭ قابىل بولاتىن ۋاقىتىنا تۋرا كەلىپ بەتدۇعالارىڭ قابىل بولادى» دەگەن ەكەن.(ءمۇسليم)
ءبىزدىڭ حالىق "جۇيەلى قارعىس جۇيەسىن، جۇيەسىز قارعىس يەسىن تابادى"،- دەپ بەكەر ايتپاعان. ءابۋ داۋد (ر.ا) ريۋايات ەتكەن حاديستە "ەگەر ءبىر كىسىگە لاعنەت ايتساڭ، سوكسەڭ ول قارعىس كوككە كوتەرىلەدى، ونىڭ قاقپاسى جابىلعان سوڭ قۇلديلاپ جەرگە تۇسەدى، جەردىڭ قاقپاسى جابىلعان سوڭ، وڭدى-سولدى ىزدەپ لاعنەت ادامعا بارادى، ول وعان لايىق بولماسا، قارعىس قايتادان ايتقان جان يەسىنىڭ وزىنە بارادى".
"قويدىڭ قارعىسى قاسقىردى قاپپايدى"،-دەگەن حالىق دانالىعى تاعى بار. وزىنە زۇلىمدىق جاساعان ادامعا دا قارعىس ايتۋ وتە اۋىر. ەگەر قيامەت كۇنى ونىڭ وعان لايىقتى ەمەس ەكەندىگى دالەلدەنسە، كۇناسى ءسىزدىڭ مويىنىڭىزدا.
حاديس شاريفتە "مۇمىنگە لاعنەت ايتۋ ونى ولتىرۋمەن تەڭ"،- دەپ ايتىلعان. ال، ادام ءولتىرۋدىڭ كۇناسى تارازىدا باسىم تۇسپەك.
كۇندەلىكتى ومىردە ءوز بالامىزدى نەمەسە باسقا دا جانداردى اكەسى مەن شەشەسىنىڭ اتىنان بوقتاپ جاتامىز. بۇل دا – قارعىس. ونىڭ دا جازاسى ءدال سونداي.
ەندەشە، توقسان اۋىز ءسوزدىڭ توبىقتاي ءتۇيىنى، جاقسى امالدار جاساپ، ەكى دۇنيەدە دە العىس الۋشىلاردىڭ قاتارىنان تابىلايىق.
اۆتور: بەك بايتاس
