سيريادان كەلگەن ايەل ومىرىندەگى سۇمدىق وقيعالار تۋرالى ايتىپ بەردى دەپ جازادى Qamshy.kz اقپارات اگەنتتىگى. "جۋسان - 2" وپەراسياسىمەن ەلگە ورالعان ايەل بۇگىندە  قۇجاتتارىن رەتتەپ، وڭالتۋ ورتالىعىندا ورنالاسقان. قازىرگى تاڭدا پسيحولوگتار مەن دارىگەرلەردىڭ باقىلاۋىندا. 

22 جاستاعى حاديشا ءۇشىن ەمىن-ەركىن سەرۋەندەۋ، ەشتەڭەدە قورىقپاۋ ورىندالماس ارمان بولعان. ول 5 جىلدان استام ۋاقىت 2 بالاسىمەن سيريادا تۇردى. سونداي-اق ول مۇلدەم سىرتقا شىقپاعان. سەبەبى، كۇيەۋى وعان كوپتەگەن شەكتەۋ قويىپتى. حاديشا كۇيەۋىنىڭ قايدا جۇمىس ىستەپ، قالاي اقشا تاپقانىنان حابارسىز بولعان.

— مەن ينتەرنەت ارقىلى ءبىر جىگىتپەن تانىستىم. ول مەنى سيرياعا شاقىردى. سول جاقتا بارلىعى كەرەمەت ەكەنىن ايتتى. سيريادا بارلىعى مەن قالاعانداي بولاتىنىن ايتىپ، سەندىرە ءبىلدى. ال مەن بارعان كەزدە كۇيەۋىم مەنى سىرتقا شىعارمايتىن. سەبەبى، مەنىڭ نە بولىپ جاتقانىن بىلمەۋىم كەرەك بولدى. ءبىراق ول مەنى ۇنەمى قاداعالاپ وتىرا المادى. كەيىن مەن شىندىقتى ءبىلدىم. "شىن مانىسىندە نە بولىپ جاتقانىن بىلگەننەن كەيىن سيريادان قالاي كەتۋگە بولادى؟" دەگەن سۇراقتىڭ جاۋابىن ىزدەي باستادىم، - دەيدى سيريادان كەلگەن ايەل. 

حاديشاعا ۇيگە بىرەۋ-مىرەۋدى شاقىرۋعا، بوتەن ادامدارمەن سويلەسۋگە تىيىم سالىنعان. ونىڭ مىندەتىنە بالا تاربيەسى مەن ءۇي شارۋاسى عانا كىردى. 

—ول مەنىمەن اجىراسپادى دا. ال "ۇيگە قايتقىم كەلەدى، قازاقستاندى ساعىندىم" دەگەن كەزدە "اۋزىڭدى جاپ" دەپ قىسقا قايىراتىن. سيريادا بارلىعى مەن ويلاعانداي بولمادى. ءۇش ۇيىقتاسام، تۇسىمە كىرمەيتىن وقيعالارعا تاپ بولدىم. بۇل تەك بەلگىلى ءبىر ادامداردىڭ جوسپارى. ولار باسقا ادامداردى وزىنە سەندىرىپ، ولاردى قالاعانىنشا باسقارىپ، قالاعانىن ىستەتەدى ، - دەيدى حاديشا. 

حاديشا كۇيەۋى قايتىس بولعان سوڭ تۇتقىننان قاشىپ شىعۋعا مۇمكىندىگى بولدى. تەرروريستەردىڭ قۇرىعىنان قاشىپ قۇتىلۋ وڭاي ەمەسى بەلگىلى. قاشۋ كەزىندە قولعا تۇسكەن ادامنىڭ باسىن شاباتىن بولعان. ءتىپتى قاشۋ تۋرالى ويلاعان ادامدى جازالاپ وتىرعان. حاديشا تاۋەكەلگە بەل بۋىپ،  اسكەري تۇتقىندارعا ارنالعان لاگەرگە دەيىن قاشىپ قۇتىلادى. كەيىن ول قازاقستانعا اكەلگەن ۇشاقتى كۇتىپ، ەلگە ورالادى. 

اۋدارعان: اسەل بولات قىزى