جاقان ءسابيت ۇلى مەديسينا ۋنيۆەرسيتەتى گيگيەنا ينستيتۋتىنىڭ پروفەسسورى، اسپيرانت جەتەكشىسى، 12 جىل جالپى گيگيەنا ينستيتۋتى باستىعىنىڭ  ورىنباسارى بولىپ ٴقىزمەت ىستەگەن، قازىرگى كەزدە شىڭجاڭ مەديسينا ۋنيۆەرسيتەتى باقىلاپ-تەكسەرۋ كوميتەتىنىڭ مۇشەسى. ول موري قازاق اۆتونوميالى اۋدانىندا دۇنيەگە كەلگەن.1975 جىلى بەيجىڭ مەديسينا ۋنيۆەرسيتەتىنە قابىلدانىپ، سول جەردە كاسىپتىك بىلىممەن قاتار اعىلشىن ءتىلىن، جاپون ءتىلىن قوسىمشا ۇيرەنەدى.

1978 جىلى وقۋىن ۇزدىك ءبىتىرىپ، شىڭجاڭ مەديسينا ۋنيۆەرسيتەتىندە وقىتۋشىلىق ءومىرىن باستايدى. قازىرگە دەيىنگى 30 جىلدىق ۇستازدىق ومىرىندە «ورتانى قورعاۋ ءىلىمى»، «ساپالى تۋۋ»، «ورتا گەوحيمياسى»، «ورتانى تەكسەرۋ»، «ورتا ىقپالىن باعالاۋ»، «ورتا ساپاسىن جالپىلىق باعالاۋ» سياقتى ساباقتاردى جۇرگىزدى. جاقان سونىمەن بىرگە عىلىمي-زەرتتەۋ تاقىرىپتارىنا دا بەلسەنە اتسالىسىپ، «فتور جانە ارسەنمەن ۋلانۋدىڭ الدىن الۋ»، «شىڭجاڭداعى 100 جاستان اسقان قارتتارعا زەرتتەۋ»، «شىڭجاڭداعى جوعارى قان قىسىم اۋرۋى كوپ كەزدەسەتىن جانە سيرەك كەزدەسەتىن ۇلتتاردىڭ تۇقىم قۋالاۋ قاينارىن زەرتتەۋ»، «ماي قۇرامىنىڭ الماسۋى جانە ۆيتاميندەردىڭ اتقاراتىن ءرولى» سياقتى 7 زەرتتەۋ وبەكتىسىن تابىستى ورىندادى.

جاقان عىلىمي كىتاپ جازۋدى دا قاعىس قالدىرمادى . ونىڭ «مەديسينالىق ستاتيستيكا» (شىڭجاڭ حالىق باسپاسى)، «الەۋمەتتىك تازالىق» (شىڭجاڭ عىلىمي-تەحنيكا، دەنساۋلىق ساقتاۋ باسپاسى)، «ءۆيتاميننىڭ زەرتتەلۋى» (توكيودا جاپون تىلىندە)، «قوعامدىق مەديسينا جانە دەنساۋلىق» (شىڭجاڭ  عىلىمي-تەحنيكا، دەنساۋلىق ساقتاۋ باسپاسى)، ت.ب كىتاپتارى جارىق كوردى.

ول 1996 جىلدان 1998 جىلعا جانە 2003 جىلدان 2004 جىلعا دەيىن جاپونيادا ماگيسترلىك وقۋ كەزىندە جازعان «ۋلى حيميالىق زاتتاردىڭ ۇلكەن مي، باۋىر، جۇرەك، وكپە جانە بۇيرەگىندەگى 30 ٴتۇردەن استام مايلى قىشقىلىنا اسەرى جانە ولاردى ۆيتامين E مەن تىزگىندەۋ ءرولىن زەرتتەۋ»، «جۇڭگو مەن جاپونياداعى 100 جاستان اسقان قارتتاردىڭ ورتاق عۇمىر كەشۋىن سالىستىرىپ زەرتتەۋ» سياقتى ماقالالارى جاپون تىلدەرىندە شىعاتىن بەدەلدى باسىلىمداردا جاريالانىپ، شەتەل ماماندارىنىڭ جوعارى باعالاۋىنا يە بولدى. «شىڭجاڭداعى 100 جاستان اسقان قارتتاردىڭ ۇزاق جاساۋ ساپاسىن زەرتتەۋ»، «شىڭجاڭداعى بۋ اراسانىنىڭ فتور قۇرامى جانە ونىڭ شيپالى اسەرىن زەرتتەۋ»، «شىڭجاڭداعى ٴتابيعي ۇزاق جاساعان ۇيعىر قارتتارىنىڭ جاسىن تۇراقتاندىرۋ جانە قاتىستى فاكتورلاردى زەرتتەۋ» عىلىمي زەرتتەۋلەرى  ءساتتى ورىندالىپ، اۆتونوميالى ايماقتىڭ عىلىمي-تەحنيكا سالاسىنىڭ 2، 3، 4-دارەجەلى سىيلىقتارىن ەنشىلەدى.

ول جاپونيادا ءۇش جىل ارناۋلى وقۋدان تىس، نانجيڭ مەديسينا ۋنيۆەرسيتەتى سياقتى ەلىمىزدەگى ايگىلى مەديسينا ۋنيۆەرسيتەتتەرىندە الدەنەشە رەت ءبىلىم الدى. 1998 جىلى اسپيرانت جەتەكشىسى بولعاننان بەرى ءار ۇلتتان 12 اسپيرانت تاربيەلەپ شىعاردى. جاپونيانىڭ ءوز ىشىندە بولعان حالىقارالىق عىلىمي تالقى جيىنىنا 4 رەت قاتىسىپ، قۇندى عىلىمي ماقالالار وقىدى. وسىنداي ەڭبەكتەرى ءۇشىن شىڭجاڭ مەديسينا ۋنيۆەرسيتەتى جاعىنان «وزات قىزمەتكەر»، «ۇلتتار دوستىعىنىڭ ۇلگىسى»، «تاڭداۋلى وقىتۋشى» بولىپ 13 رەت سايلاندى. سونىمەن قاتار 1992 جىلى اۆتونوميالى اۋداننان «از ۇلتتىڭ تىرەكتى وقىتۋشىسى» بولىپ داڭق تورىنەن ورىن الدى. 1994 جىلى دوسەنت، 1998 جىلى اسپيرانت جەتەكشىسى، 2001 جىلى كاسىپتىك-تەحنيكالىق پروفەسسور اتاعىن الدى.

بۇل كۇندەرى جاقان ءسابيت ۇلى جۇڭگو قورشاعان ورتانى قورعاۋ عىلىمي قوعامىنىڭ، شىڭجاڭ ساقتىق مەديسينا ءىلىمى قوعامىنىڭ، شىڭجاڭ  سپيد اۋرۋى جانە جىنىستىق اۋرۋىنان ساقتانۋ قوعامىنىڭ تۇراقتى مۇشەسى؛ جۇڭگو ساقتىق، مەديسينا ءىلىمى قوعامىنىڭ، جۇڭگو فتور زەرتتەۋ قوعامىنىڭ مۇشەسى؛ ءۇرىمجى قالاسى عىلىمي-تەحنيكا سالاسى بويىنشا سىيلىعىنىڭ يەگەرى، شىڭجاڭ مەديسينا ۋنيۆەرسيتەتى  اسپيرانتتاردىڭ عىلىمي ماقالالارىن باعالاۋ كوميتەتىنىڭ باعالاۋشىسى.