اڭگىمە ماتايەۆتا تۇرعان جوق. اڭگىمە – الماتى دەگەن ادەمى اتاۋدى ءورىستىلدى ءوز قازاقتارىمىزدىڭ سىڭىرە الماۋىندا تۇر. كەز كەلگەن قازاقتىقتى قازاق بالاسىنىڭ قابىلداي الماۋىندا تۇر! كونستيتۋسيانىڭ جاڭا جوباسىن قابىلداعان كەزدە «قازاقستاننىڭ استاناسى – الماتى قالاسى بولىپ تابىلادى» دەپ جازىلىپ كەتىپتى-مىس. وعان «ەلباسى دا ءمان بەرمەپتى، وتباسىنداعى كۇڭكىل-شۇڭكىل اڭگىمەدە وسىعان قاتتى وكىنگەن» كورىنەدى... ەندى ورىسشا «الما-اتا»، قازاقشا «الماتى» دەپ اتاي بەرەيىك تە دەگەن ۇسىنىس تاستاپتى. نە دەگەن دانىشپاندىق، نە دەگەن كورەگەن ۇسىنىس. ءبىزدىڭ قازاق قانشا تاۋەلسىز، ەگەمەن ەل بولدىق دەپ ءوزىن الدارقاتقانىمەن ەشقانداي دا تاۋەلسىز، ەشقانداي دا ەگەمەن ەل ەمەس ەكەن. قۇلدىق سانا قازاقتىڭ ميىنا، قانىنا، جۇرەگىنە، بولمىس-بىتىمىنە ابدەن ءسىڭىپ قالعان ەكەن. اقىرى وزگەرتەتىن بولساق، الماتىنى – «نۋر الما-اتا» دەپ نەگە ءبىر-اق وزگەرتپەيمىز؟! ءتىپتى ءتولقۇجاتىمىزعا «قازاق» دەپ جازىپ، نەسىنە اۋرە بولىپ ءجۇرمىز. نەسىنە تاۋەلسىز ەلمىز دەپ تەپسىنگەندە جەردى ايىرىپ جىبەرە جازداپ، كۇشەنىپ ءجۇرمىز بوسقا؟! ودان دا اقىرى ءۇش ورىستىڭ وداعى – اقورىس، سارىورىس، قاراورىسقا نەگە كوشە سالمايمىز؟ اقورىس – بەلارۋس، سارىورىس – كادىمگى ورىس، قاراورىس – ءبىز، قازاقتار. ءتۇرىمىز – قارا، ءتىلىمىز – ورىس. تاماشا ەمەس پە؟! وتانىم دەسەم، كەڭ-بايتاق. ورىسىم تۇسەر ويىما! قۇدايبەرگەن كورچاگين "ايقىن"