قازاقستاندا جىل باسىنان بەرى 76 ادام سۋعا باتىپ، قازا تاپقان. كۇنى كەشە سۋ تاعى دا ەكى ادامدى جالمادى. بۇل تۋرالى ق ر ءىىم توتەنشە جاعدايلار كوميتەتىنىڭ ءتوراعاسى ۆلاديمير بەككەر مالىمدەدى دەپ حابارلايدى Qamshy.kz اقپارات اگەنتتىگى.

"جىل باسىنان بەرى 76 ادامنىڭ ءومىرىن، ونىڭ ىشىندە 40 بالانىڭ سۋ جالمادى. ءبىز ستاتيستيكا جۇرگىزۋ ءتاسىلىن وزگەرتتىك. ءبىز 2019 جىلدىڭ 1-قاڭتارىنان باستاپ شومىلۋ كەزىندە عانا ەمەس، جالپى كەز-كەلگەن جاعدايدا سۋعا باتقانداردى ەسەپكە الدىق"، - دەيدى بەككەر.

ونىڭ ايتۋىنشا، ەسەپتەۋ جۇيەسىنە وزگەرىس ەنگىزۋ ارقىلى اۋقىمدى ءجۇرىپ جاتقان اپاتتىڭ الدىن الۋعا شارالار قولدانىلادى.

"قازا تاپقان 76 ادامنىڭ 27ء-ى بالىق اۋلاۋ كەزىندە قايتىس بولعان. 22 ادام شومىلۋ كەزىندە، 2 ادام باتىپ بارا جاتقانداردى قۇتقارۋ كەزىندە، 2 ادام سۋ قويمالارىنداعى جۇمىس بارىسىندا جانە 8 بالا ارىقتار مەن كىشى كانالدارعا شومىلۋ كەزىندە قايتىس بولعان. ايتا كەتۋ كەرەك، الگى بالالاردىڭ بارلىعى اتا-انا قاراۋىنسىز قالعان كىشكەنتايلار"، - دەيدى توتەنشە جاعدايلار كوميتەتىنىڭ باسشىسى.

كوميتەت باسشىسىنىڭ مالىمەتىنە سۇيەنسەك، كۇنى كەشە ەكى ادام، ءبىرى پاۆلودار قالاسىندا، ءبىرى اقمولا وبلىسىندا سۋعا باتىپ كەتكەن.

قازىرگى تاڭدا ەلىمىزدە 50 مىڭعا جۋىق سۋ قويمالارى بار. ولار تۇرعىلىقتى ازاماتتاردىڭ بالىق اۋلاۋ ماقساتىنا، شومىلۋ ماقساتىنا، دەمالىس ماقساتىنا قولدانىلادى.

بەككەردىڭ ايتۋىنشا، قازاقستاندا قۇتقارۋشى بولىپ جۇمىس جاسايتىن ادامداردىڭ سانى – 1380 ادام. قاجەتتى مامانداردى ءار سۋ قويماسىنا بىر-بىردەن قويسا دا، بارلىق سۋلى ايماقتى قامتۋ مۇمكىن ەمەس. دەمەك، سۋ قويمالارىنىڭ 90 پايىزعا جۋىعى قۇتقارۋشىسىز جۇمىس جاسايدى.

الدا شومىلۋ ماۋسىمى كەلە جاتقانىن ەسكەرسەك، قۇتقارۋشى مامانداردىڭ سانىن ارتتىرىپ، سۋداعى قاۋىپسىزدىك شارالارىنىڭ قاتاڭدىعىن تەكسەرۋ قاجەتتىگى تۋىنداپ تۇرعانى بايقالادى.