الماتى قالالىق ءماسليحاتىنىڭ دەپۋتاتى، عالىم-پروفەسسور، «تۇران» ۋنيۆەرسيتەتىنىڭ رەكتورى راحمان الشانوۆ ميتينگ تۋرالى پىكىر ءبىلدىردى.
جەر بەتىندە ءمىنسىز مەملەكەت جوق. ءيا، راس، قوعام بولعان سوڭ، بىزدە دە پروبلەما بار. ءبىراق ونى ميتينگپەن شەشەمىز دەۋ دۇرىس ەمەس.
الەمدە سوعىستان كوز اشپاي وتىرعان، بالالارى ءارىپ تە تانىمايتىن ەلدەر بار. ال ءبىزدىڭ تاۋەلسىز قازاقستاندا حالىقتىڭ الەۋمەتتىك جاعدايى ءارقاشان ءبىرىنشى كەزەكتە تۇرادى. الماتىنىڭ كوپبالالى انالارىنا پاتەر بەرىلىپ جاتىر. مۇعالىمدەر مەن دارىگەرلەردىڭ جالاقىسى كوتەرىلدى. كاسىپ اشقىسى كەلەتىن جاستار دا ءتۇرلى گرانتقا قول جەتكىزۋدە. ديپلومىم جوق دەگەن قىز-جىگىتتەردىڭ ءوزى ءتۇرلى كاسىبي، جۇمىسشى ماماندىقتارىنا تەگىن وقىتىلۋدا. ماسەلەن، ءبىزدىڭ ۋنيۆەرسيتەتتە وقۋىن دا وقىپ، قوسىمشا جۇمىس كوزىن دە تاۋىپ، ءوز-وزىن اسىراپ جۇرگەن جاستار كوپ. باياعىدا ءبىز دە اۋىلدان كەلگەن، ەشتەڭەمىز جوق ستۋدەنت بولعانبىز. اتا-انامىزدان دا اقشا سۇراماي، سالماق سالعىمىز كەلمەي، ايتەۋىر تىرشىلىك ەتتىك، ءقازىر تاڭقالامىن، سول كەزدەگى قيىندىقتاردى قالاي ەڭسەرگەنبىز دەپ.
بۇل ميتينگكە كوپشىلىكتى، بالكىم، الدەكىمدەر اقشا بەرەمىز دەپ ۇگىتتەپ، ءبىزدىڭ بەرككە-بىرلىگىمىزدى ىدىراتقىسى كەلىپ ادەيى شىعارىپ وتىرعان بولار. ءبىزدىڭ مەملەكەتتىڭ ىشكى تۇراقتىلىعىن بۇزۋعا ەشكىمنىڭ قۇقى جوق. بۇل كەلەڭسىز جاعدايدى كەشە نۇر-سۇلتان قالاسىندا پرەزيدەنتتى ۇلىقتاۋ راسىمىندە بولعاندا ەستىدىم. ەستۋىمشە، كوشەگە شىققانداردىڭ كەيبىرى قىزۋ سياقتى، قولدارىنا ۇستاعان الدەبىر زاتتارى بار كورىنەدى. سول زاتپەن ابايسىزدا بىرەۋدى جازىم ەتىپ الساڭ، ءومىرىڭ نە بولادى، سونى ويلاۋ كەرەك. بىرەۋلەردىڭ ايتاعىنا ەرەمىن دەپ جۇرگەندە، ەرتەڭگى كۇنى «ايران ىشكەن قۇتىلىپ، شەلەك جالاعان تۇتىلىپتىنىڭ» كەرى بولماسىنا كىم كەپىل. كەشە پرەزيدەنت قاسىم-جومارت توقايەۆ الاڭعا بىلمەستىكپەن شىققان ادامدار بولسا، ۇستاماڭدار، بوساتىڭدار دەگەن تاپسىرما بەردى. شىنىمەن دە، كوبىسى ماسەلەنىڭ بايىبىنا دا بارماي، كوشەگە نەگە شىققانىن دا تۇسىنبەگەن بولىپ شىقتى.
ءبىز جاڭا وزگەرىستەرگە كەلە جاتىرمىز. سونى كورە بىلەيىك. ۇكىمەت قوعامداعى الەۋمەتتىك ماسەلەلەردى كەزەڭ-كەزەڭىمەن شەشۋدە. بىزگە نە نارسەگە دە سابىر، تالعام دەگەن تارازى جانە جاقسى كۇندەرگە دەگەن سەنىم كەرەك.
پىكىر قالدىرۋ