باتىس قازاقستاندا 17 جاستاعى قىز جەزوكشەلىككە جەگىلدى، - دەپ حابارلايدى "موي گورود".

بقو ءىىد باسپا ءسوز قىزمەتىنىڭ مالىمەتىنشە، 13 ماۋسىمدا تاسقالا اۋداندىق پوليسيا بولىمىنە ءبىر ايەل بارىپ، وتكەن جىلدىڭ جەلتوقسان ايىندا كامەلەت جاسقا تولماعان قىزىنىڭ ۇيدەن شىعىپ كەتىپ، ءالى كۇنگە ورالماعانىن ايتقان. پوليسەيلەر سول كۇننەن باستاپ قىزدى ىزدەۋگە كىرىستى.

"ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جۇرگىزگەن جەدەل-ىزدەستىرۋ شاراسى بارىسىندا جوعالىپ كەتكەن 17 جاستاعى قىزدىڭ وبلىس ورتالىعىندا جەزوكشەلىكپەن اينالىسىپ جۇرگەنى انىقتالدى. سونىمەن قاتار، ونى مۇنداي ارەكەتكە ورالدىڭ 27 جاستاعى تۇرعىنىنىڭ تارتقانى بەلگىلى بولدى"، - دەيدى باسپا ءسوز قىزمەتىندەگىلەر.

ايتا كەتەيىك، كەيىن ورالدىق ايەلدىڭ كامەلەت جاسقا تولماعان قىزدىڭ ماتەريالدىق جاعدايىن پايدالانعانى انىقتالدى. قىز جاعدايى تومەن وتباسىنان شىققان، ەش جەردە وقىمايدى جانە جۇمىس ىستەمەيدى. قازىرگى تاڭدا ۇستالعان ايەلگە قاتىستى ق ر قك 134-بابى "كامەلەتكە تولماعان ادامدى جەزوكشەلىكپەن اينالىسۋعا تارتۋ" بويىنشا سوتقا دەيىنگى تەرگەۋ باستالدى.