تۇركىستان وبلىسىنىڭ اكىمى ءومىرزاق شوكەيەۆ بريفينگ بارىسىندا ارىس قالاسىنداعى جارىلىس سالدارىنان ءبىر ادام قازا تاپقانىن ايتتى دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساپ.
"ارىس قالاسىنداعى جارىلىس سالدارىنان زارداپ شەككەندەر سانى - 31. ونىڭ ەكەۋى اۋىر حالدە جاتىر. ءبىر ادام قازا تاپتى. سنارياد ونىڭ كولىگىنە تۇسكەن"، - دەدى وبلىس اكىمى.
ارىستا ورىن العان اپاتتان 23 ادام ءارتۇرلى دەنە جاراقاتتارمەن تۇركىستان وبلىسىنا قاراستى اۋرۋحانالارعا جەتكىزىلگەنى حابارلاندى.
ولاردىڭ باسىم بولىگى وبلىستىق كلينيكالىق اۋرۋحانادا جاتىر. ولارعا بارلىق قاجەتتى مەديسينالىق كومەك كورسەتىلىپ جاتىر.
وسىعان دەيىن، ارىستاعى توتەنشە جاعدايعا وراي ورداباسى اۋدانىندا مەديسينالىق شتاب قۇرىلعانى حابارلاندى.
"تۇركىستان وبلىسى دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆتىڭ باسقارۋىمەن شۇعىل جۇمىستار جۇرگىزىلىپ جاتىر. ورداباسى اۋداندىق ورتالىق اۋرۋحاناسىنان جانە وبلىستىق كلينيكالىق اۋرۋحاناسىندا 200-دەن اسا ناۋقاسقا ارنالعان ورىن دايىندالدى. 30 جەدەل جاردەم كولىكتەرىن شىمكەنت قالاسىنا كىرەر 3 جولعا قويىلدى. تاعى دا قاجەت بولعان جاعدايدا بىرنەشە اۋدانداردان الدىرىلعان قوسىمشا جەدەل جاردەم كولىكتەرى دايىن"، - دەلىنگەن حابارلامادا.
ارىستاعى جارىلىس: 34 ادام دارىگەردىڭ كومەگىنە جۇگىندى وبلىستىق كلينيكالىق اۋرۋحانادان تراۆماتولوگ، حيرۋرگ، رەانيماتولوگ دارىگەرلەر قۇرىلعان مەديسينالىق شتابقا جينالدى. قازىرگى كەزدە جاراقات العاندار جوق. ەۆاكۋاسيا جۇمىستارى جۇرگىزىلىپ جاتىر. ارىس قالالىق ورتالىق اۋرۋحاناسى مەن ەمحاناسىنان ناۋقاستار ەۆاكۋاسيا جاسالدى. ماماندار دا جەدەل جاردەم كولىكتەرى دە وبلىس بويىنشا جەتكىلىكتى.
