بۇگىنگى ارىستاعى جارىلىسقا بايلانىستى ءومىرزاق شۇكەيەۆ شۇعىل تۇردە بريفينگ وتكىزدى دەپ جازادى Qamshy.kz اقپارات اگەنتتىگى.  

ءسوز باسىندا ءومىرزاق شۇكەيەۆ ارىس قالاسىندا جارىلىس بولعانىن، جارىلىستىڭ سەبەبى ءوق-دارى ساقتالعان قويماداعى ءورت ەكەنىن ايتتى. 

"بۇگىن ارىس قالاسىندا توتەنشە جاعداي ورىن الدى. ءبىز 9:20-دا توتەنشە جاعداي تۋرالى اقپاراتتى ەستىپ، قورعانىس مينيسترلىگىمەن بىرگە قاجەتتى شارالاردى جاساپ جاتىرمىز. ەڭ ءبىرىنشى قالا تۇرعىندارىن ەۆاكۋاسيالاۋ كەرەك بولدى. قازىرگى تاڭدا قالاداعى تۇرعىنداردىڭ بارلىعى دەرلىك ءقاۋىپسىز جەرگە كوشىرىلدى. سونىمەن قاتار قالادا قالىپ قويعان تۇرعىنداردى ىزدەستىرىپ، ءقاۋىپسىز جەرگە كوشىرەتىن بولامىز. ال ازىرگە ءورت تولىقتاۋ اۋىزدىقتالعان جوق "، - دەپ مالىمدەمە جاسادى ءومىرزاق شۇكەيەۆ. 

ايتا كەتسەك، ءومىرزاق شۇكەيەۆتىڭ كۇندىزگى مالىمدەمەسى دە ورىس تىلىندە بولعان ەدى. وعان اسا ءمان بەرمەدىك. سەبەبى كوبىمىزدى ارىستاعى اعايىننىڭ جاعدايى الاڭداتتى. كەشكە دەيىن الاڭداۋمەن بولعان حالىق رەسمي مالىمدەمەنى كۇتتى. كەيىننەن تۇركىستان وبلىسىنىڭ اكىمى مەن قورعانىس ءمينيسترىنىڭ قاتىسۋىمەن بريفينگ وتەتىنىن بەلگىلى بولدى. تۇركىستان وبلىسىنىڭ اكىمى ءسوز باسىن قازاق تىلىندە باستاپ، كەيىن ورىس تىلىندە جالعاستىردى. قورعانىس ءمينيسترى دە قازاق تىلىندە 2-3 سويلەم ايتۋدان ءارى اسا المادى. ارىستا بولعان اپات تۋرالى بريفينگتىڭ جارتىسىنان كوبى ورىس تىلىندە ءوتتى. 

بالاسىن قۇشاقتاپ قايدا قاشارىن بىلمەي جۇرگەندەردىڭ بارلىعى دەرلىك قازاق ەكەنىن الەۋمەتتىك جەلىدە تارالعان ۆيدەولاردان-اق اڭعارۋعا بولادى. سوڭعى جىلعى رەسمي دەرەكتەرگە سۇيەنسەك، ارىس قالاسىنىڭ حالقىنىڭ سانى  74 مىڭنان اسادى. بۇگىنگى جارىلىستان زارداپ شەككەندەر دە، ءار وڭىردە ارىستىقتاردىڭ تىلەۋىن تىلەپ، اماندىعىن قۇدايدان سۇراپ وتىرعاندار دا  — قازاقتار. بۇعان ەشكىم داۋ ايتا الماس. ال شۇكەيەۆ پەن ەرمەكبايەۆ ورىستانعان جەردە ەمەس، قازاقى قايماعى بۇزىلماعان ايماقتا بولعانىن ۇمىتقان سەكىلدى. بريفينگتى دە، كۇندىزگى مالىمدەمەسىن دە قازاق تىلىندە جاساسا بولماس پا ەدى؟! الدە شۇكەيەۆ ءوزى باسقاراتىن وبلىستىڭ 70 پايىزدان استامىن قازاقتار قۇرايتىنىنان حابارسىز با؟ جالپى شۇكەيەۆ قاي ەلدىڭ اكىمى، ەرمەكبايەۆ شە؟!