حالىقارالىق «ماعجان جۇماباي» اتىنداعى ادەبي بىرلەستىكتىڭ ءداستۇرلى ۋنيۆەرسيتەتارالىق ايتىسى ءوز مارەسىنە جەتتى. تۇركى حالىقتارىنىڭ ىنتىماقتاستىعىن جانە ەلىمىزدەگى، الەمدەگى ءبىلىم جۇيەسىن ءسوز ەتەتىن ايتىستىڭ ءار جىلعى جەڭىمپازدارىنىڭ قاتارىندا ءال-فارابي اتىنداعى قازۇۋ، قاراعاندى مەملەكەتتىك ۋنيۆەرسيتەتى، سۇلەيمەن دەميرەل ۋنيۆەرسيتەتتەرى كورىنگەن ەدى. بيىلعى اۋەن جىلداعىدان وزگەرەك بولدى. مۇنى ەندى رەت-رەتىمەن بايان ەتەيىك.

حالىقارالىق سۇلەيمەن دەميرەل ۋنيۆەرسيتەتىنىڭ قاسكەلەڭدەگى جاڭا كورپۋسىندا باستالعان ءدۇبىرلى دوداعا رەسپۋبليكامىزدىڭ ءار ايماعىنان، اتاپ ايتقاندا  تاراز، سەمەي، شىمكەنت، استانا، الماتى، ورال، اقتاۋ قالالارىمەن قاتار جۇڭگو حالىق رەسپۋبليكاسى كۇيتىڭ قالاسىنان دا ستۋدەنت اقىندار كەلدى. بۇل ايتىسقا داۋلەتبەك بايتۇرسىن ۇلى، اقەدىل تويشان باستاعان قازىلار القاسى تورەلىك ەتتى.

جاس اقىندار ساحنادا كورەرمەن تاڭداۋى بويىنشا جاسىرىن كونۆەرتتەر ارقىلى جۇپتالىپ، ىرىكتەلىپ ەڭ مىقتى اقىندار جۇلدەلى ورىندارمەن ماراپاتتالدى. بۇل ايتىستى سۇلەيمەن دەميرەل ۋنيۆەرسيتەتى "ماعجان" ادەبيەت جانە ونەر بىرلەستىگى مەن ق ر پرەزيدەنت قورى بىرلەسىپ ۇيىمداستىرىپ،  ايتىستىڭ جۇلدە قورىنا 700 مىڭ تەڭگە ءبولىندى. ايتىستىڭ باس جۇلدەسى قحر-دان كەلگەن جاس اقىن ەرلان امانجولۇلىنا بۇيىردى. ءبىرىنشى جۇلدەنى دە قىتايدان كەلگەن ستۋدەنت قانداسىمىز، كورەرمەن كوزايىمىنا اينالعان انارگۇل بادەلحان يەلەندى (Galaxy Tab2).

ال، ەكىنشى ورىنداردى ەۋرازيا ۋنيۆەرسيتەتىنەن كەلگەن سىرىم اۋەسحان مەن سۇلەيمەن دەميرەل ۋنيۆەرسيتەتىنىڭ كەنجەسى التىنبەك يبراگيموۆ ءوزارا بولىسكە سالدى. ەكىنشى ورىن جۇلدەگەرلەرىنە  سوڭعى ۇلگىدەگى نوۋتبۋكتەر سىيعا تارتىلدى.

ايتىستىڭ ءۇشىنشى جۇلدەلەرى كۇيتىڭ قولدانبالى-تەحنيكالىق ينستيتۋتىنىڭ قوس تۇلەگى ارزىگۇل قايىمبەك قىزى مەن ءنۇرزيا اسحابۇلقىزىنا بۇيىردى.  ايتىس قورتىندىسىندا ءسوز العان پرەزيدەنت قورىنىڭ باسشىسى ەركىن داۋلەت ۇلى: " قازىرگى تاڭدا تانىلماي جۇرگەن جاس دارىندار جەتكىلىكتى. سۇلەيمەن دەميرەل ۋنيۆەرسيتەتىنىڭ بۇل يگى باستاماسى ۇلتتىق ونەردى دارىپتەۋدى، تالانتتى اقىندارعا قولداۋ كورسەتۋدى كوزدەيدى. سوندىقتان دا، بۇنداي باستاماعا ءبىز ءاردايىم وڭ كوزقاراستامىز،"- دەپ  ۇيىمداستىرۋشىلار مەن جاس اقىندارعا ءوز ريزاشىلىعىن ءبىلدىردى.

وسىلايشا س.دەميرەل ۋنيۆەسيتەتىندە ۇيىمداستىرىلعان  حالىقارالىق ايتىسقا مىڭنان تۇلپار بولىپ ىرىكتەلىپ كەلگەن 16 اقىننىڭ التاۋى ايتىس بايگەسىن قانجىعالارىنا بايلاپ قايتتى. قۇرالاقان قايتقان اقىن بولمادى. ايتىسقا قاتىسقان بارلىق اقىندارعا ارناي العىس حاتتار مەن سەرتيفيكاتتار تاپسىرىلدى.

ايتىستىڭ ۇيىمداستىرۋ كوميتەتىنىڭ ءتوراعاسى ۇلان ەركىنباي: «سۇلەيمەن دەميرەل ۋنيۆەرسيتەتىندە جىل سايىن ءداستۇرلى تۇردە ۇيىمداستىرىلىپ كەلە جاتقان ءسوز ونەرىنىڭ ءدۇبىرلى دوداسى ۇدايى  ءوز جالعاسىن تابارى ءسوزسىز. كەلەر جىلعى سايىسقا الەمدەگى بارلىق قانداستارىمىزدى جانە تۇركى حالىقتارىنىڭ ىشىندە قازاقتىڭ ءتول ونەرىنە تۋىستاس وسى جانردى ءتىرىلتىپ جۇرگەن ونەرپازداردى قاتىستىرامىز. جالپى ءبىزدىڭ ماقسات – بابالار قۇندىلىعىن ارقالاعان ايتىسىمىزدى حالىقارالىق دەڭگەيدە ناسيحاتتاۋ» دەدى.

ايگەرىم ابىشيەۆا