قوستانايلىق اتا-انالار قالاداعى جالعىز قازاق مەكتەبىنىڭ جاعدايى ناشار ەكەنىن ايتىپ شاعىمداندى. ولار مەكتەپتى كەڭەيتۋدى نەمەسە جاڭا قازاق مەكتەپ سالىپ بەرۋدى تالاپ ەتۋدە دەپ جازادى Qamshy.kz اقپارات اگەنتتىگى. 

ەڭ سوراقىسى وسىدان بىرنەشە كۇن بۇرىن قالا ورتالىعىنداعى №24 مەكتەبىن جاۋىپ، ورنىنا جاڭا بالاباقشا سالۋدى جوسپارلاعان. الايدا اتا-انالاردىڭ قارسىلىعىنان كەيىن مەكتەپتى تاراتپايتىن بولدى.

– وسىدان ءبىراز ۋاقىت بۇرىن قازاق مەكتەبىن اۋداندىق ورىس مەكتەپتەرمەن بىرىكتىرمەك بولدى. الايدا اتا-انالار نارازىلىققا شىققان سوڭ قازاق گيمنازياسىن جاپپايتىن بولدى. ەندى ءبىز قازاق مەكتەبىن جاڭارتىپ، كەڭەيتۋدى تالاپ ەتىپ وتىرمىز. سەبەبى مەكتەپ وتە تار ءارى كىشكەنتاي. ءتىپتى 0-سىنىپتىڭ وقۋشىلارى قازاق مەكتەبىنە قاراما-قارسى ورنالاسقان ورىس مەكتەبىنە بارىپ وقيدى. سىنىپتىڭ جەتىسپەۋشىلىگى سالدارىنان ورىس مەكتەبىندەگى سىنىپتاردى جالدايدى. ءبىزدىڭ قوستانايدا ورىس تىلدىلەر كوپ دەيدى. قالاي كوپ بولماسىن؟ قازاق مەكتەپتەرىنىڭ سانى از. ونىڭ وزىندە جاعداي جاسالماعان. مەن ءوزىم سول №24 مەكتەپتە وقىعانمىن. مەنىڭ مەكتەپتى بىتىرگەنىمە شامامەن 20 جىل بولدى. ءبىراق مەكتەپتە ەشقانداي وزگەرىس جوق. جاڭارماعان، سول باياعى قالپىندا تۇر، - دەيدى ءاتى-جونىن جاسىرۋدى وتىنگەن قوستانايلىق تۇرعىن. 

قوستاناي قالاسىندا جالپى 36 مەكتەپ بار.  قازاق مەكتەپتەرى ساۋساقپەن سانارلىقتاي از. كوبىسى ارالاس مەكتەپتەر.

قوستاناي رەسەيدىڭ ەمەس، قازاقتىڭ جەرى. رەسەيدىڭ وزىندە ءبىر قازاق مەكتەبى بولعان. اتالمىش مەكتەپتىڭ دە جاعدايى كەرەمەت ەمەس ەدى. كەيىن جابىلىپ قالدى دەگەن اقپارات تارادى. قوش! بۇل جاعى تۇسىنىكتى. رەسەيدە قازاق مەكتەبىن اشپاساق تا، ءوزىمىزدىڭ ەلدە قازاق مەكتەپتەرىن كوبەيتىپ، جاقسى جاعداي جاساۋعا قاۋقارىمىز جەتپەي مە؟