قازاقستاندا پەدوفيلدەرمەن كۇرەس ناۋقانى باستالىپ كەتتى. قوعام بەلسەندىلەرى باس بولىپ كوتەگەن پەدوفيلدەرگە شارا قولدانۋدا  جازانىڭ ەڭ اۋىر ءتۇرى  تۋرالى ۇسىنىسقا ەندى حالىق قالاۋلىلارى دا ءۇن قوستى.

بۇل تۋرالى «قامشى» پورتالى كتك ارناسىنا سىلتەمە جاساي وتىرىپ جازادى.

ەندىگى ءارى قازاقستانداعى پەدوفيلدەردى «ءپىشتىرۋ» (كاستراسيا) ارقىلى جازالاۋدى  ەنگىزۋ تۋرالى ۇسىنىستى  ق ر پارلامەنتى سەناتىنىڭ دەپۋتاتتارى قولدادى.  بەلسەندىلەردىڭ ق ر قىلمىستىق كودەكسىنە پەدوفيلدەرگە قاتىستى جازانى اۋىرلاتۋ تۋرالى ۇسىنىسىن وسىعان دەيىن ق ر باس پروكۋراتۋراسى دا قولدايتىندىقتارىن جەتكىزگەن.

پسيحولوگيالىق اۋىتقۋشىلىققا ۇشىراعاندار نەمەسە قاساقانا بۇلدىرشىندەردىڭ ومىرلەرىن ويران ەتۋشىلەردى «ءپىشتىرۋ» ارقىلى تىيۋعا بولاتىن بولسا، نەگە قولداماسقا؟! ايتپەگەندە وسىعان دەيىن قولدانىلىپ كەلگەن ۇزاق مەرزىمدى باس بوستاندىعىنان ايىرۋ جازاسىنان بوي تارتىپ، ۇرەيلەنىپ وتىرعان «پەدوفيل» جوق بولىپ تۇرعانى جاسىرىن ەمەس.

وسىنى ەسكەرگەن سەنات دەپۋتاتتارى بۇگىن، پەدوفيلدەرگە قولدانىلاتىن جازا قاتاڭ ءارى جان تۇرشىگەرلىك بولۋى ءۇشىن، جەدەل تۇردە ق ر قىلمىستىق كودەكسكە وزگەرتۋلەر ەنگىزىلىپ، جابىرلەنۋشى تاراپتىڭ كەشىرىمى ارقىلى جازادان سىتىلىپ كەتەتىندەردىڭ جولىنا بوگەت قويۋ كەرەك  دەپ وتىر.

كەيبىر دەرەككوزدەرىنە سۇيەنسەك، سوڭعى 5 ايدىڭ قورىتىندىسى بويىنشا پوليسيا مەن پروكۋراتۋرا  كامەلەت جاسقا تولماعان جانە كىشكەنە بۇلدىرشىندەرگە سەكسۋالدىق كۇش كورسەتكەندەرگە قاتىستى 100-دەن استام ءىستى توقتاتقان. كەيبىر جاعدايلاردا قىلمىسكەر جاقتىڭ تۋىسقاندارى جابىرلەنۋشى تاراپتىڭ تۋىستارىمەن ءوزارا كەلىسىمگە كەلىپ، كەشىرىم سۇراۋ ارقىلى جازادان بوساتىلىپ جۇرگەن. ال كەلەسى ءبىر جاعدايلاردا ءجاي عانا زاڭدى بەلشەدەن باسۋشىلىقتار بولعان.

ەندى مىنە، دەپۋتات مىرزالار دا مۇنداي باسسىزدىقتاردى ءبىرجولاتا بولدىرماۋ ءۇشىن، پەدوفيلدەرگە قاتىستى جازانى اۋىرلاتۋ، حيميالىق جولمەن «ءپىشتىرۋ» تۋرالى ۇسىنىستى قولداعان. ءتىپتى، سەناتور مىرزالار، پرەمەر-مينيستردىڭ اتىنا ارنايى حات جولداعان.

نۇرزات توعجان