وزبەكستان ازاماتى ءبىر تۇندە بىرنەشە استانالىقتى توناپ كەتتى، - دەپ حابارلايدى Tengrinews.kz ءتىلشىسى استانا ءىىد باسپا ءسوز قىزمەتىنە سىلتەمە جاساپ.

باسپا ءسوز قىزمەتىنىڭ مالىمەتىنشە، 24 ماۋسىمدا استانانىڭ ىشكى ىستەر دەپارتەمەنتىنە 22 جاستاعى استانالىق بەلگىسىز بىرەۋدىڭ ونى پىشاقپەن قورقىتىپ، كۇش كورسەتۋ ارقىلى جەكە مۇلكى مەن اقشاسىن الىپ كەتكەنىن ايتىپ، ارىزداندى. تەرگەۋ ءىس-شارالارىن جۇرگىزۋ بارىسىندا 24 ماۋسىمعا قاراعان ءتۇنى ابىلاي حان داڭعىلى قيىلىسىندا، ساۋدا ءۇيىنىڭ ماڭىندا، بەلگىسىز بىرەۋدىڭ اۆتوكولىك سالونىنا باسىپ كىرىپ، مويىنىنا پىشاق توسەپ، جابىرلەنۋشى مەن ونىڭ تانىسىنىڭ التىن بۇيىمدارى مەن اقشاسىن الىپ، قىلمىس ورنىنان جاسىرىنعانى انىقتالدى.

"ەلوردالىق ءىىد قىزمەتكەرلەرى "ءىزىن سۋىتپاي" قالا اۋماعىندا توناۋمەن جانە قاراقشىلىقپەن اينالىسقانى ءۇشىن وزبەكستان رەسپۋبليكاسىنىڭ 31 جاستاعى ازاماتىن ۇستادى. سول ءتۇنى قاسكۇنەم جاساعان ارەكەتىن توقتاتپاي، كۇيشى دينا كوشەسىندە كۇش قولدانىپ، 26 جاستاعى ايەلدىڭ قۇنى 120 000 تەڭگە تۇراتىن (ۇيالى تەلەفون) جەكە مۇلكىن اشىق تۇردە ۇرلاپ كەتكەن"، - دەيدى باسپا ءسوز قىزمەتىندەگىلەر.

ايتا كەتەيىك، بۇل دەرەكتەر سوتقا دەيىنگى تەرگەۋلەردىڭ ءبىرىڭعاي تىركەۋىنە الىندى. ق ر قك "قاراقشىلىق" جانە "توناۋ" باپتارى بويىنشا سوتقا دەيىنگى تەرگەۋ امالدارى ءجۇرىپ جاتىر، كۇدىكتى كىناسىن مويىندادى. سونىمەن قاتار، كۇدىكتىنىڭ استانا قالاسىنىڭ اۋماعىندا جاسالعان باسقا دا قىلمىستارعا قاتىستىعى انىقتالىپ جاتىر. استانا قالاسى الماتى اۋداندىق سوتىنىڭ شەشىمەن كۇدىكتىگە قاتىستى قاماۋعا الۋ بۇلتارتپاۋ شاراسى قولدانىلدى. كۇدىكتى تەرگەۋ يزولياتورىنا قامالدى.