جاقىن كۇندەرى ماڭعىستاۋ اۋدانىنىڭ شەتپە كەنتىندە زاماناۋي مەديسينالىق ورتالىق جۇمىسىن باستايدى. «وركەن» دەگەن اتپەن جاڭادان اشىلاتىن ورتالىق تۇرعىندارعا اقىلى تۇردە قىزمەت كورسەتپەك. جاڭا نىساندى جەكە كاسىپكەر بايقادام كۋسيمبايەۆ «بيزنەستىڭ جول كارتاسى -2020» باعدارلاماسى اياسىندا «دامۋ» قورىنىڭ كەپىلدىگىمەن الىنعان قارجىعا ىسكە قوسپاق.

ورتالىق باسشىسى «دامۋ» كاسىپكەرلىكتى دامىتۋ قورىنىڭ ماڭعىستاۋ وبلىستىق فيليالىنىڭ كەپىلدىگىمەن «قازاقستان حالىق بانكى» اق –نان 5 جىلعا 15 ملن.تەڭگە نەسيە العان.

«وتباسىلىق كاسىبىمىزدى وركەندەتۋ ماقساتىندا جەكە مەديسينالىق ورتالىقتى ىسكە قوسۋدى قولعا الدىق. بۇدان بولەك اۋدانىمىزدا ەكى جەكەمەنشىك ءدارىحانامىز جۇمىس جاسايدى. ال، بۇل جولى العان قارجىعا لابوروتوريالىق، ۋزي، جۇرەك، ءتىس تۇسىرەتىن اپپاراتتار، قاجەتتى قۇرالداردى ساتىپ الماقشىمىن. تۇرعىندارعا اقىلى تۇردە قىزمەت كورسەتەمىز، باعامىز دا قولجەتىمدى بولادى. ەندى ماڭعىستاۋ اۋدانىنىڭ تۇرعىندارى قالاعا سابىلىپ قاتىناماي، اۋدان ورتالىعىنا دا قاجەتتى مەديسينالىق كومەككە جۇگىنە الاتىن بولادى. ويتكەنى شەتپە كەنتىندە ءبىر عانا اۋداندىق اۋرۋحانا جۇمىس جاسايدى، ول جەردە ۇزىن-سونار كەزەك»،-دەيدى بايقادام كۋسيمبايەۆ.

بايقادام كۋسيمبايەۆ-مەديسينا سالاسىندا 13 جىل ابىرويلى ءارى جەمىستى ەڭبەك ەتكەن. ەلگە ەتكەن ەڭبەگى ەلەنىپ، حيرۋرگ-دارىگەر 2011 جىلى «اۋداندىق ۇزدىك دارىگەر» اتالىمىمەن ماراپاتتالعان.  اق حالاتتى ابزال جان وسى ۋاقىتقا دەيىن 700-گە جۋىق ناۋقاسقا وتا جاساپ، حالىقتىڭ ىقىلاسىنا بولەنىپتى. سوڭعى جىلدارى اۋداندىق اۋرۋحانادا حيرۋرگيا ءبولىمىنىڭ مەڭگەرۋشىسى قىزمەتىن ابىرويمەن اتقارعان. ەندى مىنە، جەكە كاسىبىن دوڭگەلەتىپ، دەنساۋلىق ساقتاۋ سالاسىنىڭ دامۋىنا جەكە كاسىپكەر رەتىندە  ۇلەسىن قوسپاق نيەتتە. كاسىپكەردىڭ باستاماسىمەن ىسكە قوسىلاتىن ورتالىقتا اۋىل تۇرعىندارى ءۇشىن تەراپيەۆت، ۋزي دارىگەرى، حيرۋرگ، نيەۆروپاتولوگ، پەدياتر، كارديولوگ دارىگەرلەر جۇمىس جاسايتىن بولادى. كەڭ دە جارىق عيماراتتا زاماناۋي قۇرال-جابدىقتارمەن تۇرعىندارعا ساپالى، مەديسينالىق قىزمەت كورسەتىلمەك.  كاسىپكەردىڭ ايتۋىنشا، ورتالىق جاقىن ارادا حالىق يگىلىگىنە جۇمىس جاسايتىن بولادى.