جاقىندا تاتارستاندىق «ProKazan» اقپاراتتىق سايتىندا «قازاقستاندىق ديپلوماتتار «اۆتوحامدار» اتتى ماقالا جارىق كوردى. وندا قازاقستان كونسۋلدىعىنىڭ قىزمەتكەرلەرى، جول ەرەجەلەرىن ءجيى بۇزاتىندىعى جانە اۆتوبۋس ايالدامالارىنا كولىكتەرىن قويىپ كەتەتىندىگى تۋرالى ايتىلعان. بۇل تۋرالى «قامشى» پورتالى حابارلايدى. ارينە، بۇل ءوز كەزەگىندە قوعامدىق كولىكتەردىڭ قوزعالىسىنا كەدەرگى كەلتىرەتىنى تۇسىنىكتى. اتالمىش باسسىزدىققا بايلانىستى جەرگىلىكتى تۇرعىنداردىڭ شاعىمىنان سوڭ، سايت رەداكسياسى قازانداعى قازاقستان ەلشلىگىنە حابارلاسىپ، ءمان جايدى بىلمەك بولىپ، بىرنەشە دالەل كەلتىرگەن. ال ەلشىلىكتەگىلەر بولسا، كولىكتىڭ قازاقستان ەلشىلىگىنىڭ ساتۋ جونىندەگى كەڭەسشىسىنە تيەسى ەكەندىگىن، ازىرگە جەكە اۆتو تۇراق جوق بولعاندىقتان، ءبىر جىل كولەمىندە اتالمىش كوشە بويىنا كولىك قويىپ جۇرگەندىكتەرىن جانە بۇل ورەسكەل جول ەرەجەسىن بۇزىشىلىققا جاتپايتىنىن جەتكىزگەن. سونداي-اق، قازاقستان ەلشىلىگىنە تيەسىلى، شەتەلدىك ءنومىرلى تاعى ءبىر كولىك قازان قالاسىنداعى ۋنيۆەرسيتەتسكايا كوشەسىندە دە تىركەلگەن. ازىرگە جەرگىلىكتى پوليسيا قىزمەتكەرلەرى قازاقستاندىق ديپلوماتتاردىڭ كولىكتەرىنە تەكسەرۋ، ولارعا ايىپپۇل سالا المايتىندىقتان، ديپلوماتتار جول ەرەجەسىنە مۇلدە باعىنبايتىندىقتارىن ايتقان. ال رف ءسىم مەن باس پروكۋراتۋراسى 2014 جىلى جول ەرەجەسىن ءجيى بۇزاتىن شەتەلدىك ديپلوماتتاردى مانسابىنان ايىرۋ تۋرالى ۇسىنىس جاساعان بولاتىن. بارلىعى ولاردىڭ ەلشىلىك قىزمەتكەرلەرىنە بەرىلەتىن قۇجاتتارىنا بايلانىستى. «مەيلى، كولىك جول ەرەجەسىن بۇزسا دا، ەگەر ول ازاماتتا ەلشىلىك قۇجاتى بولسا، ءبىز ەشقانداي ايىپپۇل سالا المايمىز. حالىقارالىق كونۆەنسيادا وسىلاي بەكىتىلگەن. بۇعان ەركىنسىنىپ العاندار بولسا، جول ەرەجەسىنە باعىنباي، ەمىن-ەركىن جۇرەدى. بۇلار «اۆتوحام» ەمەي نەمەنە» -دەيدى قازان قالالىق جپق كومانديرى ورىنباسارى ميحايل ساۆين. ولار شەتەلدى بىلاي قويىپ، قازاقستاننىڭ ىشىندە دە جول پوليسيا قىزمەتكەرلەرىنە پىسقىرىپ تا قارامايدى ەكەن. قىزمەتتىك كولىكتەرمەن جۇرەتىن قازاقستاندىق شەنەۋنىكتەر جول ەرەجەسىن ءجيى بۇزادى. ونىڭ ۇستىنە ايىپپۇل دا تولەمەيتىن كورىنەدى. مىسالى، بىلتىرعى جىلى مەملەكەتتىك مەكەمەلەردىڭ تولەۋگە مىندەتتى، الايدا تولەنبەگەن ايىپپۇلدىڭ 1238 فاكتىسىن انىقتالعان. ق ر باس پروكۋراتۋراسىنىڭ مالىمەتتەرىنە سۇيەنسەك، استانا، الماتى، وقو مەن قىزىلوردا وبلىسىندا وتەلمەگەن ايىپپۇلدىڭ جالپى سوماسى 11،5 ملن. تەڭگەگە جەتكەن. بۇل كولىكتەر مەملەكەتتىك ورگانداردىڭ اتىنا تىركەلگەندىكتەن، ايىپپۇل قاعازدارى دا سول جاققا جىبەرىلگەن. الايدا بۇل دا ناتيجەسىز بولعان. ال جول ەرەجەلەرىنە باعىنباي، قوعامدىق ءتارتىپتى بۇزعان شەتەلدىك شەنەۋنىكتەردىڭ قارىزى 1،5 ملرد. تەڭگەگە جەتكەن. ال شەكپەنىندەگى شەندەرىنە ماساتتانىپ جۇرگەندەردىڭ بالالارى شە؟ دالىرەك ايتساق، جول ەرەجەلەرىن ءجيى بۇزاتىن شەنەۋنىكتەردىڭ وزدەرى ەمەس، بالالارى بولىپ شىعادى. مىسالى، ماقسات ۇسەنوۆتى الماتىلىقتار كوپكە دەيىن ۇمىتا قويماس. ۇنەمى جول ەرەجەسىن ساقتامايتىن، تەك اكىمشىلىك جاۋاپكەرشىلىكپەن عانا قۇتىلىپ كەتەتىن ۇسەنوۆتىڭ كولىكتەرى دە اركىمنىڭ قالتاسى كوتەرە بەرمەيتىن، قىمبات ماركادان بولىپ شىققان.
- BMW X6. تاپ وسى كولىكپەن ۇسەنوۆ ايالدامادا تۇرعان التى ادامدى قاعىپ كەتكەن بولاتىن. امالىن تاۋىپ جازادان قۇتىلىپ كەتكەن ول ارادا كوپ ۋاقىت ۇزاماي تاعى ءبىر قاندى وقيعانىڭ ورتاسىنان تابىلعان.
- Porshe 911. ۇسەنوۆتىڭ Porshe 911 كولىگىندە الماتى كوشەلەرىندە جۇرگەنىن Facebok قولدانۋشىلارى ءوز پاراقشالارىندا جازدى. ماقساتتى تانيتىن ادامدار دا ونىڭ كولىك تۇراعىنان وسى كولىكتى بايقاعانىن ايتقان.
- Toyota Avensis. جول اپاتىنان سوڭ ماقسات ۇسەنوۆ “تويوتوعا” وتىردى. العاشىندا بۇل كولىكتى ماقسات ءوزى جۇرگىزبەي، ارنايى كولىك جۇرگىزۋشىسىنە تاپسىرعان. الايدا، جولاۋشى بولۋدان جالىققان ول رولگە قايتا وتىردى.
- Mercedes-Benz SL. كەيىن ۇسەنوۆتىڭ بالاسى ماقسات مەرسەدەستى تىزگىندەدى. تاعى دا جول اپاتى ورىن العان.
- Mercedes-Benz S-Class W221. ۇسەنوۆ وسى كولىكپەن سوڭعى رەت جول ەرەجەسىن بۇزعان بولاتىن.
