باياعىدا ءبىر اتاقتى سامۋراي بولىپتى. بىردە ول ق ۇلى ەكەۋى جولعا شىعادى. جازدىڭ اپتاپ ىستىعىندا كەنەزەسى كەۋىپ كەلە جاتقان سامۋرايدىڭ كوزى قاۋىن باقشاسىنا تۇسەدى. سايدىڭ تاسىنداي تەڭكيگەن قاۋىنداردىڭ ءپىسىپ تۇرعان شاعى ەكەن. سامۋراي ويلانباستان بىرەۋىن قىلىشىمەن جارىپ جىبەرىپ ءشولىن قاندىرادى. قاۋىندى جەپ بولعاندا بۇل ارەكەتىنىڭ ۇرلىق ەكەنىن سەزەدى. سامۋراي ق ۇلى ەكەۋى ارى قاراي جۇرە بەرەدى. «ەكەۋمىز بىرەۋدىڭ باقشاسىنان قاۋىن ۇرلاپ جەگەنىمىزدى ەشكىمگە ايتپا» دەيدى سامۋراي قۇلىنا. قۇل «ءتىس جارمايمىن» دەپ ۋادە بەرەدى. كۇن ۇياسىنا باتىپ، ءتۇن بولعاندا ەكەۋى ءبىر تاۋعا جەتەدى. تاۋدا تۇنەمەك بولادى. سامۋراي «قۇلدىڭ اۋزىندا ءسوز تۇرماس. ەرتەڭ-اق مەنىڭ يەم ۇرلىق جاسادى دەپ ەلگە جايىپ جىبەرەر. ودان دا بۇنىڭ كوزىن قۇرتايىن» دەپ ويلايدى دا، ۇيىقتاپ جاتقان قۇلدىڭ باسىن شاۋىپ تاستايدى. اتاقتى سامۋرايدىڭ ق ۇلى جولدا ءولدى دەگەن حابار بۇكىل ەلگە جايىلادى. قۇلدىڭ شەشەسى ەڭىرەگەندە ەتەگى جاسقا تولىپ، بالاسىنىڭ باسى شابىلعان جەرگە كەلەدى. انانىڭ زارلاعانداعى داۋسى بۇكىل ەلدىڭ ساي-سۇيەگىن سىرقىراتىپتى دەيدى. بالاسىنىڭ باسىن قۇشاقتاعان ايەل وزەننىڭ جاعاسىنا كەلىپ، «ەگەر ءوز كىناڭنان ولسەڭ، سۋعا بات، كىناسىز بولساڭ سۋ بەتىندە قالقىپ اق» دەپ، باستى وزەنگە تاستاپتى. باس سۋعا باتپاي، بىردەن وزەن اعىسىنا قارسى جوعارى قاراي قالقىپ بارادى ەكەن. بۇل كورىنىسكە كۋا بولعان جۇرت قاتتى تاڭقالىپتى دەيدى. سول ءتۇنى باس شابىلعان جەردە وتتىڭ ۇشقىنى پايدا بولىپ، اۋەگە كوتەرىلىپتى. سامۋرايدىڭ اۋىلىنىڭ توبەسىندە كۇركىرەگەن ءۇن شىعارعان ۇشقىن ەلدىڭ زارەسىن الىپتى. تىلسىم قۇبىلىس سامۋرايدىڭ ءۇيىنىڭ توبەسىندە نايزاعايداي كۇركىرەپ تۇرىپ الىپتى. كۇندىز كۇلكى، تۇندە ۇيقىدان ايىرىلعان سامۋراي كوپ ۇزاماي جىندانىپ ءولىپتى دەيدى. شارافات جىلقىبايەۆا
