22 مامىر كۇنى الماتى قالاسى، ىلە اۋدانى، ىنتىماق اۋىلىندا قازاقستان رەسپۋبليكاسى مەن وڭتۇستىك كورەيا مەملەكەتتەرى بىرلەسىپ اشقالى وتىرعان «سەدجون ەۋرازيا» اتتى كلينيكانىڭ العاشقى ىرگەتاسىن قالاۋ سالتاناتى ءوتتى. اتالمىش جوبانىڭ كەلىسىمشارتىنا ەكى ەل اراسىندا 2011 جىلدىڭ 26 تامىزدا قول قويىلعان. سالتاناتتى راسىمگە الماتى وبلىسىنىڭ دەنساۋلىق ساقتاۋ باسقارماسىنىڭ باسشىسى مارالبەك مەيىربەكوۆ، كورەيا رەسپۋبليكاسىنىڭ قر-داعى باس كونسۋلى حەن ىن، كورەيانىڭ دەنساۋلىق ساقتاۋ يندۋسترياسىن دامىتۋ ينستيتۋتىنىڭ پرەزيدەنتى كو كەن حۆا، كەنگي-دو پروۆينسياسىنىڭ دەنساۋلىق ساقتاۋ سالاسىن دامىتۋ ءبولىمىنىڭ جەتەكشىسى ريۋ ءون گول، سەدجون گوسپيتالىنىڭ ءتوراعاسى پاك ەن گۆان، سەدجون گوسپيتالىنىڭ پرەزيدەنتى چون ران حي، «سەدجون ەۋرازيا»  حالىقارالىق مەديسينالىق ورتالىعىنىڭ باس ديرەكتورى ۆياچەسلاۆ شەگاي قاتىستى.

ۆ.شەگايدىڭ ايتۋى بويىنشا كلينيكانى قازاقستاندىق قۇرىلىس مەكەمەسى سالادى. ورتالىق قۇرامىنا پوليكلينيكا، دياگنوستيكالىق ورتالىق جانە 100 كەرەۋەتكە ارنالعان ستاسيونار كىرەدى. ەمحانادا شامامەن 300-400-دەي قىزمەتكەر جۇمىس ىستەيدى. پوليكلينيكادا كۇنىگە 1000-نان استام ادامدى قاراۋ كوزدەلىپ وتىر. سونىمەن قاتار قازاقستاندىق 20 دارىگەردى كورەيادا وقىتۋ جوسپارلانۋدا. كلينيكا 2015 جىلدىڭ 2ء-شى جارتىسىندا ىسكە قوسىلادى.

 – قازاقستاندا جۇرەك اۋرۋلارى 2ء-شى ورىندا. اۋرۋحانا مۇددەسى – ادامنىڭ                               اۋرۋىنىڭ الدىن الۋ، كورەيادان بەرىلەتىن مەديسينالىق كومەك پەن جاڭا تەحنولوگيالار ارقىلى اۋرۋدىڭ بەلگىلەرى مەن ءتۇرىن تابۋ، اسقىنۋدان ساقتاۋ بولىپ تابىلادى. مىسالى، راك اۋرۋىنىڭ 1ء-شى كەزەڭىن ەمدەۋگە 150 مىڭ تگ جۇمسالاتىن بولسا، ونىڭ 3-4 كەزەڭىن تويتارۋعا 20-30 ملن تگ قارجى كەتەدى. سول سەكىلدى ەمحانا ماماندارىنىڭ ماقساتى – اۋرۋدى تەز انىقتاپ،وعان ءتيىستى شارا قولدانۋ بولماق.سونىمەن قاتار مەملەكەتتىك كۆوتا مەن قايىرىمدىلىق قورىن ۇيىمداستىرۋ جوسپاردا بار،– دەيدى ۆياچەسلاۆ شەگاي.

باس كونسۋل حەن ىن:

–«سەدجون» اۋرۋحاناسىنىڭ كومەگىمەن كوپتەگەن ادام ءومىرىن ساقتاپ قالاتىنىمىزعا سەنىمدىمىن. جوبانى جۇزەگە اسىرۋداعى ماقساتىمىز- دەنساۋلىقتى ساقتاپ، عىلىمي زەرتتەۋلەرمەن الماسۋ. قازاقستان دامىعان ەل. كورەياداعى «سەدجون» اۋرۋحاناسى 30 جىلدان بەرى جۇرەك اۋرۋلارىن ەمدەۋدە ۇلكەن جەتىستىكتەرگە جەتتى. قازاقستاندا 2015 جىلى حالىقارالىق كلينيكا اشىلعاندا جاڭا الەمدىك دارەجەگە يە بولادى دەپ سەنەمىن،– دەيدى.

مارالبەك مەيىربەكوۆ:

–        ەلىمىزدە مەديسينا قارقىندى دامۋدا.وسىدان 4-5 جىل بۇرىن كوپتەگەن اۋرۋلاردى ەمدەۋگە قاۋقارىمىز جەتپەگەن بولسا، ءقازىر ونىڭ كوبىن ءوز ەلىمىزدە ەمدەۋ مۇمكىن بولدى. ال قازاقستان مەن كورەيا اراسىنداعى بۇل جوبا ەكى ەلگە دە جەمىسىن بەرەدى دەپ ويلايمىن، – دەدى.

جاڭا كلينيكانىڭ سالىنۋى تۇرعىنداردىڭ كورەيا رەسپۋبليكاسىنىڭ جوعارى تەحنولوگيالى مەديسينالىق يندۋسترياسىنا قول جەتكىزۋىن قامتاماسىز ەتەدى. كورەيانىڭ باسقارۋ تاجىريبەسىن قولدانۋ، كلينيكا قىزمەتىنە كورەيانىڭ كەڭەسشىلەرى مەن بىلىكتى ماماندارىن تارتۋ قازىرگى ۋاقىتتا سول ەلدىڭ اۋرۋحانالارىندا ەمدەلۋدى قالايتىن شەتەلدىڭ مەديسينالىق تۋريستەر اعىنىن قازاقستانعا بۇرۋعا زور مۇمكىندىك بەرەدى.

ايجانات قازييەۆا