شەتپەنى شاڭعا كومگەن كارەرلەردىڭ تاس ۋاتۋ قوندىرعىلارى اۋىلدان 10 شاقىرىم قاشىقتىققا كوشىرىلەدى.
-«شەتپە اۋىلى ماڭىندا ورنالاسقان كارەرلەردىڭ قورشاعان ورتانى لاستاۋى، شاڭىتۋى ماسەلەسى تۇرعىندار تاراپىنان بىرنەشە جىلداردان بەرى كوتەرىلىپ كەلەدى. ماسەلەنى قوعامدىق كەڭەستىڭ قاراۋىنا سالدىق. جاقىندا وبلىس اكىمىنىڭ ورىنباسارى ب.كاشاقوۆتىڭ توراعالىعىمەن شەتپە اۋىلىندا وسى كارەرلەردىڭ شاڭ شىعارۋ ماسەلەسى جونىندە ۇلكەن كەڭەيتىلگەن جيىن ءوتتى. وعان وسى ماسەلەگە قاتىستى وبلىستىق باسقارما، دەپارتامەنت باسشىلارى قاتىستى. جيىن قورىتىندىسىمەن ارنايى ءىس-شارالار جوسپارى جاساقتالدى»، - دەدى ماڭعىستاۋ اۋدانىنىڭ اكىمى ت.جەتكىزگەن ۇلى.
جالپى كارەرلەرگە جەر تەلىمى وبلىستىق جەر قاتىناستارى باسقارماسى ارقىلى بەرىلەدى. كارەرلەر كەلىسىم شارتقا سول وبلىستىق جەر قاتىناستارى باسقارماسىمەن وتىرعان. ءبىز ءوز كەزەگىمىزدە وسى ماسەلەلەردى تولىقتاي شەشۋ جونىندە ولارعا حات جولدادىق، ۇسىنىستارىمىزدى بەردىك. جەر قاتىناستارى باسقارماسى، ەكولوگيا دەپارتامەنتى تاراپىنان كارەرلەردىڭ جۇمىسىنا، قورشاعان ورتانى لاستاۋ، شاڭ شىعارۋ فاكتىلەرىنە بايلانىستى بىرنەشە رەت تەكسەرۋلەر دە ۇيىمداستىرىلدى. قازىرگى تاڭدا وسى شەتپە ماڭىندا جۇمىس جاساپ تۇرعان كارەرلەردىڭ تاس ۋاتۋ قوندىرعىلارىن اۋىلدان 10 شاقىرىم قاشىقتىققا ، بۇرىنعى قىزىلتۇران تاس كارەرىنىڭ قارسى بەتىنە كوشىرۋ جۇمىستارى ۇيىمداستىرىلۋدا. كارەر يەلەرى تاس ۋاتۋ قوندىرعىلارىن كوشىرگەن جاعدايدا شەتپەنىڭ شاڭى 70 پايىزعا ازايادى. بۇل ماسەلەمەن تىكەلەي وبلىستىق جەر قاتىناستارى باسقارماسى مەن ەكولوگيا دەپارتامەنتى اينالىسىپ جاتىر. ماسەلە ءبىزدىڭ قاتاڭ باقىلاۋىمىزدا، دەدى بريفينگتە ماڭعىستاۋ اۋدانىنىڭ اكىمى.
پىكىر قالدىرۋ