زامان تالابىنا ساي باسەكەگە قابىلەتتى ۇرپاق تاربيەلەۋ ماقساتىندا بىلتىرعى وقۋ جىلىندا جامبىل وبلىسى جۋالى اۋدانىندا «ءبىلىمدى ۇرپاق» ءبىلىم ورتالىعى اشىلعان بولاتىن. ورتالىقتىڭ بۇگىندە 200-گە جۋىق شاكىرتتەرى بار. ەندى جۋىردا نۇرلىكەنت اۋىلىنىڭ ورتالىعىنان اۋىلداعى اتا-انالاردىڭ سۇرانىسى بويىنشا «ءبىلىمدى ۇرپاق» وقۋ ورتالىعىنىڭ فيليالى اشىلدى، دەپ جازادى Qamshy.kz اقپارات اگەنتتىگى. 

-بۇل اۋىلدان جازعى دەمالىستا ورتالىعىمىزعا كوپتەگەن بالالار كەلىپ، ءتىل ۇيرەنىپ ءجۇردى. ارينە، بالالارى كۇندەلىكتى بارىپ-كەلەتىن بولعاندىقتان اتا-انالارعا ولاردىڭ جولاقىسى دا وڭاي ەمەس. سوندىقتان اتا-انالار تاراپىنان «اۋىلىمىزدا 900-دەي وقۋشى بار. سول سەبەپتەن ءبىزدىڭ اۋىلدان ورتالىقتىڭ فيليالىن اشساڭىزدار» دەگەن ۇسىنىس ءتۇستى. ارى-بەرى ويلانا كەلىپ، اشۋدى ءجون سانادىق. ەلىمىزدىڭ بولاشاعى – جاستار. ولاردىڭ كەلەشەگىن ويلاۋىمىز كەرەك.

بۇل عيمارات بۇرىن دۇكەن بولعان. بوس تۇرعان سوڭ جالعا الىپ، ءىشىن جوندەپ، قاجەتتى قۇرال-جابدىقتارمەن قامتاماسىز ەتتىك. ەندى جىلۋ جۇيەسىن جۇرگىزەمىز. بۇگىنگى تاڭدا 100 بالا وقۋعا جازىلىپ وتىر. ءالى دە جازىلۋدا. 100 بالانى ون توپقا بولدىك. ولار اپتاسىنا ءۇش كۇن وقيدى. ءبىلىم الۋشىلارعا اتا-انالاردىڭ سۇرانىسى بويىنشا جوعارى ساناتتى ۇستازدار اعىلشىن تىلىنەن گۇلبانۋ سارسەنبييەۆا مەن ورىس تىلىنەن ايگۇل ساتتىبايەۆا ساباق بەرەدى،- دەيدى ورتالىقتىڭ يەسى كاسىپكەر ءنۇريلا مالىبەكوۆا.

ورتالىقتىڭ اشىلۋىنا اۋىلدىق وكرۋگ اكىمى نۇرجىگىت بولەكبايەۆ، اۋداندىق ىسكەر ايەلدەر كەڭەسىنىڭ ءتورايىمى ءاسيما شەكەيەۆا، مۇشەلەرى گۇلميرا اسەموۆا، ايناگۇل احمادبەكوۆا، وقۋشىلار مەن اتا-انالار، ۇستازدار قاتىستى.

اشىلۋ سالتاناتىن م.لومونوسوۆ اتىنداعى ورتا مەكتەپتىڭ وقۋشىلارى ديانا راحماتۋللايەۆا، داريعا ەرەجەپباي جانە داياربەك سانجار ءۇش تىلدە جۇرگىزدى.

قۇتتىقتاۋ ءسوز كەزەگى اۋىلدىق وكرۋگ اكىمى نۇرجىگىت بولەكبايەۆقا، اۋداندىق ىسكەر ايەلدەر كەڭەسىنىڭ ءتورايىمى ءاسيما شەكەيەۆاعا، ارداگەر ۇستاز، اۋىل تۇرعىنى تامارا رايسوۆاعا بەرىلدى. ءسوز سويلەۋشىلەر اۋىلدان وسىنداي ءبىلىم ورتالىعىن اشىپ جاتقان كاسىپكەرگە ريزاشىلىعىن ءبىلدىرىپ، ەڭبەكتەرىنە تابىس تىلەدى. وقۋشىلاردىڭ زامان تالابىنا ساي اعىلشىن، ورىس ءتىلىن جەتىك مەڭگەرۋلەرىنە، الايدا «وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» دەمەكشى، ءوز انا تىلدەرىن قۇرمەتتەۋگە شاقىردى.

ورتالىقتىڭ لەنتا قيۋ ءراسىمىن اۋىلدىق وكرۋگ اكىمى نۇرجىگىت بولەكبايەۆ پەن ىسكەر ايەلدەر كەڭەسىنىڭ ءتورايىمى ءاسيما شەكەيەۆا جاسادى. تاتتىدەن شاشۋ شاشىلىپ، جينالعان قاۋىم ىشكە كىرىپ، وقۋ كابينەتتەرىمەن تانىستى.