1-ماۋسىم حالىقارالىق بالالاردى قورعاۋ كۇنىنە وراي انشى-سازگەر روزا ءالقوجا العاش رەت استانا جۇرتشىلىعىن ءان بەسىگىندە تەربەتۋدى جوسپاراۋدا. تەك جاڭا اندەرى عانا شىرقالاتىن كەشتەن ءبىر كۇن بۇرىن «قازاق تولقىنى» ستۋدياسىنان دايىندالىپ شىققان روزانىڭ ءوز ورىنداۋىنداعى جاڭا اندەرىنىڭ، اۆتورلىق اندەرىنىڭ، وبلىس ورتالىقتارىندا، الماتى قالاسىندا وتكەن ءان كەشتەرىنىڭ جانە ولەڭدەرىنىڭ تاسپاسىنىڭ تۇساۋى كەسىلمەك. تۇساۋكەسەر كەشىنىڭ قوناقتارى: انشى-سازگەر روزا ءالقوجا، ايتىسكەر اقىن اينۇر تۇرسىنبايەۆا، اقىن باقىتگۇل باباش، جۋرناليست ايدىن قابا، ۆيزاجيست-ستيليست ەرجان ايتقالي جانە تاعى باسقالار. ماقساتى — ونەر سۇيەر جۇرتشىلىقتىڭ الدىندا بۇگىنگە دەيىن اتقارعان جۇمىستارىنا ەسەپ بەرۋ، شىعارماشىلىعىنداعى جاڭالىقتارىمەن ءبولىسۋ. 

  مۋزىكا مەن اقىندىق ءسوز بىر-بىرىمەن جىمداسا وتىرىپ، جۇرەككە جىلى، ۇنامدى بىرلىك جاسايتىنى سەكىلدى، روزانىڭ ورىنداعان ءاربىر ءانى تىڭداۋشى جۇرەگىنەن ورىن الىپ، عاشىقتاردىڭ سەزىم پەرنەسىن شەرتتى. ونىڭ ورىنداۋىنداعى «مەن سىيعا تارتقان ورامال»، «ىزدەمەيسىڭ»، «اقبەرەن»، «ول كوكتەم ورالمايدى»، «مىنا ءومىر عاجاپ قانداي»، «جۇرەك نازى» اندەرى ءاربىر كورەرمەن قوسىلا شىرقايتىن انگە اينالدى. ءاسانالى ءاشىموۆ: «مەنىڭ جانرىم – كۇندەلىك» دەسە، روزا: «مەنىڭ جانرىم – سمس»، - دەيدى. «عۇمىرىمداعى سايكەسىم» دەپ اتاعان، ونەردە ورنى بولەك اپاسى اقمارال لەۋبايەۆامەن جىل بويى جازىلعان سمس حاتتارى ولەڭ بوپ ءورىلدى. وزگەگە بىلدىرمەي، ءوزىم دەپ بىر-بىرىنە سىر ايتقان قوس ونەر يەسىنىڭ بۇل ءتاسىلى كوپكە ۇنادى. وسى ارقىلى روزاعا ادەبيەت وكىلدەرى اقىن دەپ  باعا بەرە باستادى.

    جاستايىنان جانىنا ولەڭدى سەرىك ەتىپ وسكەن روزا العاشقى شىعارماشىلىق كەشىن تۋعان ولكەسى – ماقتارال وڭىرىندە وتكىزىپ، ەلدىڭ باتاسىن الدى. سودان بەرى ەلىمىزدىڭ تۇكپىر-تۇكپىرىنە ءان ساپار جاساپ، جانى دا، ءانى دە جارىق نۇرلارعا تولى، نازىك جۇرەك پەن اسەم داۋىستىڭ يەسى كوپتىڭ كوڭىلىنەن شىعىپ كەلەدى. بۇگىنگە دەيىن انشى-سازگەر رەتىندە كوپشىلىككە تانىس روزا ءالقوجانىڭ تاعى ءبىر قىرى اشىلماق. اقىندار ءوزارا ۇقساستىعىمەن ەمەس، وزگەشەلىگىمەن دە قىزىق. روزانىڭ جىرلارىنا كوز جۇگىرتىپ كورسەڭىز، شىنايى ءومىردى اڭعاراسىز. ونىڭ تىرشىلىگىن، مۇڭىن، كۇيىن، قۋانىشىن ولەڭنەن تاباسىز.

بايلانىس تەلەفونى: 8 702 907 44 72