قازاقستاننىڭ حالىق ءارتىسى تۇڭعىشباي جامانقۇلوۆ  “حالىق قارجىسىنا نەگاتيۆتى فيلمدەردى ءتۇسىرۋدى توقتاتۋعا” شاقىرعان مادەنيەت جانە سپورت ءمينيسترى ارىستان مۇحامەديدى سابىرلىققا شاقىردى. بۇل تۋرالى  «قامشى» پورتالى qazaquni.kz-كە سىلتەمە جاساي وتىرىپ  حابارلايدى.

مادەنيەت ءمينيسترى «قازاقستاندى ماسقارالايتىن» دەپ قارا تىزىمگە ەنگىزگەن كينو جايىندا پىكىرىن ءبىلدىرىپ، جۇرتشىلىقتى تاعى ءبىر دۇرلىكتىرگەن ەدى.

ايتۋىنشا، ەمير ءبايعازيننىڭ «ۇيلەسىمدىلىك ساباقتارى»، «ريەلتور»، ءادىلحان ەرجانوۆتىڭ «قوجايىندار» اتتى تۋىندالارىن شەتەل تۇگىلى ەلدە كورسەتۋگە قارسى. ءبىر ادام كورمەگەن وسى فيلمدەر حالىقارالىق بايقاۋلاردان توپ جارىپ جاتقانىن ەلەگىسى كەلمەيتىن مينيسترگە، ونەردەگى ارىپتەستەرىنىڭ وكپەسى دە قارا قازانداي.

ق ر حالىق ءارتيسى تۇڭعىشباي جامانقۇلوۆ ەلىمىزدىڭ مادەنيەت جانە سپورت سالاسىنا جاۋاپتى شەنەۋنىككە: “بالكىم، مينيستر ءىنىمىز ويلانار، تولعانار. بۇل الاشاپقىن دۇنيەمەنەن دىردۋلاپ، الا شاۋىپ، قىرىپ تاستايمىن، الىپ تاستايمىن دەگەنمەن دۇنيە بىتپەيدى. كەرىسىنشە كاسىبي مامانداردى باعالاۋ كەرەك. سولارمەن اقىلداسۋ كەرەك. ءبارىن بىلە بەرۋ مۇمكىن ەمەس قوي”، – دەگەن كەڭەسىن بەردى.

بۇدان بىلاي مادەنيەت ءمينيسترى ەندى بيۋدجەت اقشاسىنا «قازاقفيلم» تۇسىرەتىن تۋىندىلاردى جەكە ءوزى باقىلاۋعا الماق.

ارىستانبەك مۇحامەدي ۇلى جاس رەجيسسەرلەردىڭ ازعىندىقتى، قوعامنىڭ كولەڭكەلى تۇستارىن ەمەس، ەلدەگى جاقسىلىقتى كوبىرەك ناسيحاتتاعانىن قالايدى. ءتىپتى تاقىرىپتى دا ءوزى تاۋىپ بەرىپ، اتىس-شابىستىڭ ورنىنا ميلليونەرلەر جايلى كينو تۇسىرۋگە كەڭەس بەردى.

نۇرزات توعجان