بۇل تۋرالى  Qamshy.kz اقپارات اگەنتتىگى قازاقپارات دەرەگىنە سۇيەنە وتىرىپ حابارلايدى. 

الماتى قالالىق كاسىپكەرلىك جانە ينۆەستيسيالار باسقارما باسشىسى ەركەبۇلان ورازاليننىڭ ايتۋىنشا، قالادا ازىق-تۇلىك قورى جەتكىلىكتى.

«كەشە گيپەرماركەتتەردە، ءىرى ساۋدا نۇكتەلەرىندە ادامدار ازىق-تۇلىكتى جاپپاي ساتىپ الىپ جاتتى. ولاي جاساۋدىڭ قاجەتى جوق. تۇرعىندار وسىنداي ارەكەتتەرىمەن باعانىڭ وسۋىنە وزدەرى جول بەرەدى. بۇل نارىقتاعى قالىپتى جاعداي. سۇرانىستىڭ وسكەنىن بايقاعان جەتكىزۋشىلەر وسى ءساتتى پايدالانىپ قوسىمشا اقشا تابۋعا تىرىسادى. ارينە، ءبىز ءوز تاراپىمىزدان الدىن الۋ شارالارىن قولداندىق، بارلىعىمەن سويلەستىك. ءبىز بۇل پروسەستى بارىنشا ساقتايمىز، ءبىراق نارىقتىڭ اتى نارىق. مىسالى، قانتتىڭ باعاسى ايتارلىقتاي ءوستى»، – دەيدى ەركەبۇلان ورازالين.

سونداي-اق، ول تاۋارلاردىڭ باسىم بولىگى وتاندىق ءونىم ەكەنىن دە اتاپ وتكەن.

«دۇكەن سورەلەرىندەگى ازىق-تۇلىك ازايمايدى. ءبىز بارلىعىمەن ۇنەمى بايلانىستا بولامىز. ساۋدا ورىندارىنىڭ قويمالارىندا تاۋار جەتكىلىكتى. سوندىقتان ءبىر جىلعا تاماق الۋدىڭ قاجەتى جوق»،- دەدى ول. سپيكەردىڭ ايتۋىنشا، ەگەر قالادا كارانتين جاريالانسا، الەمدىك تاجىرتبەگەە سۇيەنەدى. ياعني ۆيرۋسقا قاراماستان ازىق-تۇلىك دۇكەندەرى جابىلمايدى. ولار قالىپتى رەجىمدە جۇمىس ىستەيتىن بولادى. حالىق وسىنى ءتۇسىنۋى كەرەك. « ازىق-تۇلىك باعاسىنا كۇندەلىكتى مونيتورينگ جۇرگىزىلىپ وتىرادى. باسقا ەلدەن كەلەتىن تاۋارلار تەمىرجول ارقىلى جەتكىزىلەدى. جالپى، قالاداعى الەۋمەتتىك ماڭىزى بار ازىق-تۇلىك ونىمدەرىنىڭ جىلدىق تۇتىنۋى 860 مىڭ توننانى قۇرايدى»،- دەيدى رەسمي وكىل.

تاعى وقي وتىرىڭىز: بوس سورە، ازىق تولى اربا. "ماگنۋمداعى" دۇربەلەڭ (فوتورەپورتاج)