اقىن ميشەل چەن براۋن (Michelle Chan BROWN) جۋىردا الەم حالىقتارى جازۋشىلارى وداعىنا مۇشە بولىپ قابىلدانعان. امەريكاندىق قالامگەر فۋلبرايت باعدارلاماسىنىڭ (پروگرامما) ستيپەندياتى. ول جازۋشى رەتىندە ادەبيەت سالاسىندا ءبىرشاما ماراپاتتارعا يە بولعان. ماسەلەن، 2012 جىلى قالامگەردىڭ «ەكى جاقتى تىڭشى» (Doble Agent - دۆوينوي اگەنت) اتتى جىر جيناعى تانىمال امەريكا وقىتۋشىسى ءارى جازۋشىسى بحانۋ كاپيل تاراپىنان جوعارى باعالانىپ،  Kore First Book Award – سىيلىعىن جەڭىپ العان. ال، «وتان. قاسقىرلارمەن» (رودينا. س ۆولكامي) اتتى جيناعىمەن 2014 جىلى جان فەلدمان اتىنداعى پوەزيالىق سىيلىققا قول جەتكىزدى.

ميشەل لوندون قالاسىندا دۇنيەگە كەلگەن. ونىڭ بالالىق جانە جاستىق شاعى پراگا، بەلگراد، كراكوۆ، كييەۆ جانە ماسكەۋ قالالارىندا وتكەن. بۇگىنگى تاڭدا ول الماتى قالاسىندا تۇرىپ ەڭبەك ەتۋدە.

اقىننىڭ ولەڭدەرى مەن شىعارماشىلىعىنا ارنالعان پىكىر، ەسسەلەر اعىلشىن تىلىندە جارىق كورەتىن كوپتەگەن ادەبي جۋرنالداردا جاريالانىپ كەلەدى.

ميشەل چەن براۋن ميچيگان جانە ۆيردجينا شتاتىنداعى ۋنيۆەرسيتەتتەردە ادەبيەت پەن شىعارماشىلىق حات (تۆورچەسكوە پيسمو) ءپانى بويىنشا ءدارىس بەرىپ، جاس قالامگەرلەر كونفەرەنسياسىندا بايانداما جاساعان. سونىمەن قاتار، پومفرەت مەكتەبىندە جازۋشى رەتىندە قىزمەت ەتىپ، «سىنعان كوپىر» (سلوماننىي موست) اتتى جازعى شىعارماشىلىق شەبەرحاناسىنىڭ ديرەكتورى قىزمەتىن اتقارعان.

ميشەل چەن براۋن بۇىنگى ارنايى كەزدەسۋ سوڭىندا (12.08.2015) الەم حالىقتارى جازۋشىلارى وداعىنىڭ امەريكا قۇراما شتاتتارىنداعى باس وكىلى بولىپ تاعايىندالدى. سونىمەن «ءاحجو» قوعامدىق بىرلەستىگى جەتىنشى مەملەكەتكە ەسىگىن ايقارا اشتى.

قوسىمشا ايتا كەتسەك، ءاحجو مۇشەلەرى كۇن ساناپ ارتىپ كەلەدى. ماسەلەن، جۇڭگو حالىق رەسپۋبليكاسىندا بۇعان دەيىن قحر مەملەكەتتىك سىيلىعىنىڭ لاۋرەاتى جازۋشى اكپار ماجيت مۇشە بولىپ قابىلدانسا، بۇگىندە جۇڭگو مەملەكەتىنەن اقىن، جازۋشى اسان ابەۋ ۇلى مەن دالەلحان سمايىل ۇلى مۇشەلىككە قابىلدانىپ وتىر.