وسكەلەڭ ۇرپاقتى وتانسۇيگىشتىككە تاربيەلەۋ ۇلت بولاشاعى ءۇشىن جاسالاتىن مىندەتتى جۇمىستاردىڭ ءبىرى. وسى رەتتە، مەملەكەتكە، تۋعان جەرگە دەگەن سۇيىسپەنشىلىگىن، قۇرمەتىن ءوز ىسىمەن كورسەتە بىلگەن پاتريوت ازاماتتاردىڭ ىستەرى «رۋحاني جاڭعىرۋ» باعدارلاماسىنىڭ «تۋعان جەر» ارنايى جوباسى اياسىندا جۇزەگە اسىرىلىپ كەلەدى.
كاسىپكەر-مەسەناتتاردىڭ قولداۋىمەن اۋدان، قالا مەن اۋىلدارعا قامقورلىق جاسالىپ، ازاماتتاردى تۋعان ولكەسىن دامىتۋعا تارتۋ ارقىلى الەۋمەتتىك ماسەلەلەردى شەشۋ باعىتىندا ناتيجەلى جۇمىستار جۇرگىزىلدى. اقتوبە وڭىرىندە 2017-2020 جج. ارالىعىندا «تۋعان جەر» ارنايى جوباسى «تۋعان جەرگە تاعزىم» اكسياسى اياسىندا جالپى قۇنى 10،4 ملرد. تەڭگە تۇراتىن 2 020 الەۋمەتتىك جوبا جۇزەگە اسىرىلدى. اكسيا اياسىندا 461 مەسەناتتىڭ دەمەۋشىلىگىمەن 318 الەۋمەتتىك-مادەني نىساندار پايدالانۋعا بەرىلدى.
2020 جىلى «تۋعان جەرگە تاعزىم» اكسياسى اياسىندا جەرلەس-مەسەناتتارىنىڭ كومەگىمەن بارلىعى 945 ملن. 835 مىڭ تەڭگەگە 368 جوبا جۇزەگە اسىرىلدى.
ونىڭ ىشىندەگى ءىرى جوبالار – اقتوبە قالاسىندا «ەر ەدىگە» قوعامدىق قورىنىڭ دەمەۋشىلىگىمەن جوبا قۇنى 40 ملن. تەڭگە تۇراتىن ەر ەدىگە باتىردىڭ ەسكەرتكىشى جانە جوبا قۇنى 120 ملن. تەڭگەنى قۇرايتىن ەسەت باتىر كوكى ۇلىنىڭ ەسكەرتكىشى، جوبا قۇنى 7 ملن. تەڭگە تۇراتىن «تاۋكە حان» سپورت الاڭى اشىلدى. 
سونىمەن قاتار، اۋىل كاسىپكەرلەرىنىڭ دە تۋعان ولكەسىن كوركەيتسەم دەگەن يگى تىلەكپەن قولعا العان باستامالارى جۇزەگە اسىرىلىپ، حالىق يگىلىگىنە جاراتىلۋدا. اۋدانداردا اۋىل حالقىنىڭ تۇرمىس-تىرشىلىگىنە قاجەتتى كوپتەگەن الەۋمەتتىك ماڭىزدى نىساندار بوي كوتەردى.
بايعانين اۋدانى قاراۋىلكەلدى اۋىلىندا «بايعانين اۋداندىق دامۋ جانە قولداۋ قورى» قق-نىڭ دەمەۋشىلىگىمەن 13 ملن. تەڭگەگە اۋداندىق مادەنيەت ۇيىنە كوشپەلى ساحنا بارلىق جابدىعىمەن الىندى. 
تەمىر اۋدانى شۇبارقۇدىق اۋىلىندا اۋىل كاسىپكەرلەرىنىڭ دەمەۋشىلىك كومەگىمەن قۇنى 10 ملن تەڭگەگە گەنەرال-لەيتەنانت ج. كەرەيەۆتىڭ ەسكەرتكىشى ورناتىلسا، ءوندىرىستى حرومتاۋ اۋدانىنىڭ «قىزىلسۋ اۋىلىندا يۋجپرومسناب» ج ش س دەمەۋشىلىگىمەن مادەنيەت ۇيىنە قۇنى 15 ملن. تەڭگە قارجىعا كۇردەلى جوندەۋ جۇمىستارى جۇرگىزىلدى.
جالپى العاندا، «تۋعان جەر» ارنايى جوباسىنىڭ اۋقىمى وتە كەڭ. بۇگىن ءبىز بۇل جوبانىڭ قازاقستانداعى ءپاتريوتيزمنىڭ ۇلعايۋىنا، تۋعان جەرگە دەگەن سۇيىسپەنشىلىكتىڭ ارتۋىنا، اسىرەسە جاستاردىڭ وتانعا دەگەن ماحابباتىن ارتتىرۋعا ۇلەس قوسقانىن كوردىك. شىن مانىندەگى بۇل ۇلكەن جۇمىس ءوڭىردىڭ الەۋمەتتىك-ەكونوميكالىق تىنىسىن كەڭەيتتى دەپ ايتا الامىز.
ءپاتريوتيزمنىڭ ناعىز وزەگىنە اينالعان «تۋعان جەر» ارنايى جوباسىنىڭ «تۋعان جەرگە تاعزىم» اكسياسى ءالى دە جالعاسىن تابۋدا.
اقتوبە وبلىسىنىڭ «رۋحاني جاڭعىرۋ» باعدارلاماسىن باسقارۋ ورتالىعى
پىكىر قالدىرۋ