ءتىل تابيعاتىنان الەۋمەتتىك قۇبىلىس بولعاندىقتان، بۇعان بەي-جاي قاراۋعا بولمايدى. فەيسبۋككە ەكى سويلەمدى قاتە جازعاننان، نەمەسە ءبىر ءسوزدى، ماقالدى، تۇراقتى تىركەستى بۇرىس قولدانىپ قويدىم دەپ، ءقازىر ەشكىمنىڭ دە باسى اۋرىپ، قينالىپ جاتقان جوق. «مەن قاتە جازعاننان قازاق ءتىلى بۇزىلىپ كەتپەيدى» دەگەن وي ءار سانادا ورىن تەپسە نە بولارمىز. سوندا ءبارىمىز دە سولاي بۇرىس جازىپ، بۇرىس قولدانىستاردى تۇراقتاتىپ، تۇراقتى تىركەستەردى ورىندى-ورىنسىز قولدانىپ، ءۆارۆاريزمدى كۇشەيتە بەرسەك، تىلدىك قولدانىس قايدا بارادى؟ دۇرىس جازىپ، دۇرىس سويلەيتىندەردى سىرتتان ىزدەيمىز بە؟ 
الەۋمەتتىك ءمانى بار كەز كەلگەن اقپارات قۇرالىنىڭ لەبىزى، الەۋمەتتىك جەلىلەردە جازىلعان اقپاراتتار، ءتىپتى ول بىر-ەر اۋىز پىكىر قوسۋ ءۇشىن جازىلعان سويلەمنەن تۇرسا دا، كەڭ اۋقىمدى قامتيتىن قاۋىمعا ارنالعاندىقتان، وزىندىك لەبىزدىك قۇندىلىققا يە. اقپاراتتى تىڭداۋشى مەن وقۋشىنىڭ نيەتى دە، دەڭگەيى دە، بىلىگى دە ءارتۇرلى بولعاندىقتان، اركىم ودان وزىنشە پىكىر تۇيەرى انىق. سوندىقتان دا ءار زامانداعى سويلەۋ ءتىلىنىڭ دەڭگەيىنە دە، جازبا ءتىلدىڭ دەڭگەيىنە دە سول تىلدە سويلەيتىن ءاربىر ادام جاۋاپتى بولادى. 
ءتىل - ۇلتتىق قۇندىلىق بولعاندا، لەبىز - الەۋمەتتىك-يدەولوگيالىق ناقتىلىق. ءار ءتۇرلى مىنبەردەن ايتىلعان ءسوز دە، ءارتۇرلى اقپارات قۇرالدارىندا جازىلعان نە ايتىلعان اقپارات تا سول ۋاقىتتا قولدانىلىپ تۇرعان ءتىلدىڭ جاعدايىنان، تىلدىك احۋالدان حابار بەرەدى. سويلەۋشىنىڭ نەمەسە جازۋشىنىڭ، عالىمنىڭ ءتىلى ساقاۋ بولسا، سول ۋاقىتتا قولدانعان ءتىل (لەبىز) ساقاۋ دەگەن ءسوز، نەمەسە تازا سويلەپ، ءسوز قولدانىسى دۇرىس بولسا، سول ۋاقىتتاعى سويلەۋ نە جازبا ءتىلدىڭ دەڭگەيى جوعارى دەگەن ءسوز. تەك اتى بەلگىلى ۇلكەن عالىم نەمەسە جازۋشى عانا تىلدىك احۋالدى انىقتاپ قويمايدى، ءبىزدىڭ كەز كەلگەنىمىز تىلدىك احۋالدى قالىپتاستىرۋعا جانە ونى دۇرىس قولدانۋعا قىزمەت ەتەمىز جانە ءوز زامانىمىزداعى ءسوزدىڭ قۇنىن ارتتىرىپ، ءمانىن كەلتىرەتىن دە ءبىز. ويتكەنى ءبارىمىز جينالىپ «حالىق» اتتى ۇلىلىقتى قۇرايمىز.

انار سالقىنباي، Facebook پاراقشاسىنان