بۇگىنگى تىرشىلىك جارمەڭكەسى قىزۋ قايناپ، ادام بالاسى ءومىردىڭ بارلىق سالاسىنا بىردەي ۇلگەرۋگە تىرىسقان قوعامدا بالا تاربيەسىنىڭ دە ماڭىزى اسا ەرەكشە. دانا ويشىل ج. بالاسۇعىن «ونەر-بىلىم بەرەم دەسەڭ باسىنان، وقۋعا بەر بالاڭدى جاسىنان» دەگەندەي، - جاس وسكىنگە قازىرگى زامان تالابىنا ساي تاربيە بەرىپ، مەكتەپكە دايارلاۋ بارىسىندا بالاباقشانىڭ ايرىقشا ءرول اتقاراتىندىعىن باسا ايتقىمىز كەلەدى. بالا دۇنيەگە كەلگەننەن كەيىن، تۋۋ تۋرالى كۋالىگىن راسىمدەگەن ساتتەن باستاپ، بالانى مەملەكەتتىك بالا باقشاعا كەزەككە قويامىز. ولاي بولسا، اتا-انالار نازارىنا بالالاردى بالاباقشاعا قويۋ كەزەگى تۋرالى مالىمەتتەردى ۇسىنباقپىز. بالاباقشاعا تىركەلۋگە ءوتىنىشتى حالىققا قىزمەت كورسەتۋ ورتالىعىنا بارىپ وزىنە-وزى قىزمەت كورسەتۋ سەكتورى نەمەسە ءموبيلدى قوسىمشا egov.kz، www.egov.kz پورتالى ارقىلى بەرۋگە بولادى. جاس انالار مەن اكەلەر ءۇشىن كەزەككە ونلاين قويۋ ءتاسىلى قولايلى، سەبەبى بۇل ۇيدەن شىقپاي-اق جۇزەگە اسىرىلادى. بالاباقشاعا ءبىرىنشى كەزەكتى الۋ قۇقىعىنا: مۇگەدەكتەردىڭ بالالارى؛ اتا-اناسىنىڭ قامقورلىعىنسىز قالعان بالالار؛ جەتىم بالالار؛ كوپبالالى وتباسىنىڭ بالالارى؛ جەڭىلدىكتەر جانە كەپىلدىكتەر بويىنشا سوعىسقا قاتىسۋشىلار جانە سوعىس مۇگەدەكتەرىنە تەڭەستىرىلگەن تۇلعالاردىڭ بالالارى يە بولادى. ەسكەرە كەتەتىن جايت، پورتال ارقىلى قىزمەتتى الۋ ۋاقىتىندا تۇلعالاردىڭ ەلەكتروندىق سيفرلىق قولتاڭباسى بولۋى قاجەت. ال، حقكو ارقىلى قىزمەتتى الۋ ءۇشىن: بەلگىلەنگەن نىسانداعى ءوتىنىش؛ اتا-انالاردىڭ ءبىرىنىڭ نەمەسە زاڭدى وكىلدەرىنىڭ جەكە باستى كۋالاندىراتىن قۇجاتى؛ بالانىڭ مەكەنجاي پاراعى نەمەسە قىزمەتتى الۋشىنىڭ تۇرعىلىقتى جەرىن راستايتىن وزگە دە قۇجات ۇسىنۋى قاجەت. قۇجاتتار تەكسەرۋ ءۇشىن كوشىرمەلەردە جانە ءتۇپنۇسقالاردا ۇسىنىلادى، وسىدان كەيىن قۇجاتتاردىڭ ءتۇپنۇسقالارى الۋشىعا قايتارىلادى. بالانى بالاباقشاعا كەزەككە قويۋ بارىسىندا تۇسىنبەۋشىلىكتەر تۋىنداعان جاعدايدا ءبىرىڭعاي بايلانىس ورتالىعىنىڭ 1414 تەلەفونىنا قوڭىراۋ شالۋعا بولادى. قوڭىراۋ شالۋ تەگىن. «حقكو» رمك-نىڭ وقو بويىنشا فيليالىنىڭ وتىرار اۋداندىق ءبولىمىنىڭ ينسپەكتورى ماحانبەتوۆ نۋربول نۋريدينوۆيچ