بۇگىن استانا ۋاقىتى بويىنشا  ساعات 10.38-دە بايقوڭىر عارىش ايلاعىنان "سويۋز-فگ" تاسىمالداۋشى زىمىرانى "سويۋز تما-18م" عارىش كەمەسىمەن جانە جاڭا ەكيپاجىمەن ۇشتى. ەكيپاجدا قازاقستاندىق عارىشكەر ايدىن ايىمبەتوۆ، رەسەيلىك سەرگەي ۆولكوۆ جانە ەۋروپا عارىش اگەنتتىگىنىڭ استروناۆتى اندرەاس موگەنسون بار. بۇل تۋرالى «قامشى» پورتالى Tengrinews.tv-عا سىلتەمە جاساي وتىرىپ حابارلايدى. توقتار اۋباكىروۆ پەن تالعات مۇسابايەۆتاردان كەيىن تۇڭعىش عارىشقا اتتانعان قازاق عارىشكەرى ايدىن ايىمبەتوۆ بۇل ساپاردا ەكىنشى بورتينجەنەر رەتىندە اتتاندى.

ايتا كەتەيىك،  «سويۋز تما-18م» كەمەسىنىڭ نەگىزگى ەكيپاجىنىڭ ۇشۋ قارساڭىنداعى كۇن وتە قاربالاس بولعان. رەسەي فەدەراسياسى عارىش اگەنتتىگىنىڭ باسشىسى الەكساندر يۆانوۆ مىرزا باستاعان مەملەكەتتىك كوميسسيا حالىقارالىق عارىش ستانسياسىنا ۇشاتىن ەكيپاجداردى شەشۋشى باقىلاۋدان وتكىزگەننەن كەيىن تۇپكىلىكتى شەشىم قابىلداعان.

ۇشىرۋ الدىنداعى باسپا ءسوز ءماسليحاتىندا بەلگىلى بولعانداي، كوماندانىڭ ەكى مۇشەسى عارىشقا العاش رەت ۇشقالى وتىر.

كەمە كومانديرى روسعارىش عارىشكەرى سەرگەي ۆولكوۆ بۇل جولى عارىشقا ءۇشىنشى رەت ساپار شەككەلى تۇر. ول ءوز ارىپتەستەرىنىڭ ازىرلىك دەڭگەيىن جوعارى باعالادى جانە «گاگارين الاڭىنان» ۇشاتىن 500ء-شى مەرەيتويلىق ۇشىرۋ ويداعىداي وتەتىنىنە سەنىمىن ءبىلدىردى.

سەرگەي ۆولكوۆ «جاڭا» عارىشكەرلەردى الىپ ۇشۋمەن قاتار، كەلەسى جىلدىڭ ناۋرىز ايىندا كەمە كومانديرى رەتىندە ءبىر جىل بويى ستانسيادا جۇمىس جاساپ جاتقان ميحايل كورنيەنكو مەن سكوتت كەلليدى جەرگە الىپ قايتپاق.

سەرگەي ۆولكو حعس بورتىنداعى ۇلكەن عىلىمي باعدارلاما جونىندە ايتا كەلىپ، ونىڭ ەۋروپالىق، قازاقستاندىق جانە رەسەيلىك عىلىمي باعدارلامالار بويىنشا جۇرگىزىلەتىنىن اتاپ ءوتتى.

ەۋروپالىق عارىش اگەنتتىگىنىڭ استروناۆتى اندرەاس موگەنسەن باسپا ءسوز ءماسليحاتى كەزىندە عارىشقا ۇشۋدى كوپتەن بەرى ارمانداعانىن جانە دانيانىڭ العاشقى استروناۆتى بولاتىنىن ماقتان ەتەتىنىن ايتتى. بۇل تۋرالى قازاقپارات جازعان بولاتىن.

قازعارىش عارىشكەرى ايدىن ايىمبەتوۆ عارىشقا كىشكەنتاي قىزى دايانا تىككەن ويىنشىقتى وزىمەن بىرگە الا كەتەتىنىن ايتتى.  سونىمەن بىرگە، قازاقستاندىق عارىشكەر ق ر مەملەكەتتىك رامىزدەرىن الىپ ۇشتى.

ۇشۋ الدىنداعى كۇنى ەكيپاج مۇشەلەرىن «يۋبيلەينىي» اۋەجايىندا ق ر ۆيسە-پرەمەرى  ب.ساپاربايەۆ، «بايقوڭىر» عارىش كەشەنىنىڭ باسشىلارى، قازعارىش باسشىسى تالعات مۇسابايەۆ، قىزىلوردا وبلىسىنىڭ اكىمى قىرىمبەك كوشەربايەۆ قارسى الادى.

 «ءسىزدىڭ اكەڭىز الەكساندر ۆولكوۆ ءبىزدىڭ العاشقى قازاق عارىشكەرى توقتار اۋباكىروۆ  ۇشقان ەكيپاجدىڭ كومانديرى بولعان ەدى، ەندى ءسىز وسى ەستافەتانى جالعاستىرىلىپ، ءبىزدىڭ ايدىن ايىمبەتوۆ ۇشاتىن ەكيپاجدىڭ كومانديرى بولىپ وتىرسىز»، - دەدى ۆيسە-پرەمەر سەرگەي ۆولكوۆقا قاراتا ايتقان سوزىندە.

سونداي-اق، بەردىبەك ساپاربايەۆ قازاق حاندىعىنىڭ 550 جىلدىعى قۇرمەتىنە ەكيپاج مۇشەلەرىنە تاريحي مەرەيتويلىق مەدالداردى تاپسىردى.

الەمدىك كوسموناۆتيكانىڭ وتانىنا اينالعان قازاق جەرى ءوزىنىڭ ۇلدارىنىڭ عارىشتىق ميسسياسىن ويداعىداي ورىنداپ ورالۋىن اسىعا كۇتەتىن بولادى.

نۇرزات توعجان