جاقىندا اۋعانستاننىڭ ءبىرىنشى ۆيسە-پرەزيدەنتى، گەنەرال ابدۋل راشيد دۋستۋم رەسەي فەدەراسياسىنان اۋعان قاۋىپسىزدىك كۇشتەرىنە اۋە جانە اسكەري تەحنيكا بەرۋىن سۇراعان. بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.
سولتۇستىك اۋعانستاننىڭ سولتۇستىگىندەگى ۇزاق ۋاقىتقا سوزىلعان اسكەري ءىس-قيمىلدارعا قاتىسىپ، كابۋلعا ەندى ورالعان ۆيسە-پرەمەر ابدۋل راشيد دۋستام مىرزا دۇيسەنبى كۇنى كەشكە، كابۋلداعى باسپا ءسوز كونفەرەنسياسىندا ءسوز سويلەگەن سوزىندە «رەسەي باسشىلىعىنىڭ ءبىزدىڭ وتىنىشىمىزگە ۇندەمەي قالماۋى ءتيىس» دەگەن.
«ءبىزدىڭ قاۋىپسىزدىك كۇشتەرىمىز ۇشاق، تىكۇشاق جانە باسقا دا قارۋلى تەحنيكالارعا مۇقتاج. كوپ قارۋىمىز رەسەيدەن اكەلىنگەن. ولار (رەسەي) ءبىزدىڭ قاۋىپسىزدىك كۇشتەرىمىزگە كومەكتەسۋى كەرەك»، - دەدى اۋعانستاننىڭ ءبىرىنشى ۆيسە-پرەزيدەنتى.
بۇدان باسقا، ا.دۋستۋم «يسلام مەملەكەتى» ۇيىمى ماسەلەسىن ءسوز ەتىپ، راديكالداردىڭ تەك اۋعانستانعا ەمەس، بۇكىل ايماققا ءقاۋىپ ءتوندىرىپ وتىرعانىن ايتقان. ونىڭ ايتۋىنشا، اۋعانستان - ءيم-نىڭ جوسپارىنا كىرىپ وتىرعان جالعىز ەل ەمەس. «ەگەر ولاردىڭ جوسپارلارىنا تەك اۋعانستان كىرسە، «يسلام مەملەكەتىنىڭ» قاتارىندا وزبەكتەر مەن شەشەندەر نە ىستەپ ءجۇر. «دايش» (ءيم-نىڭ ارابشا اتاۋى) كاۆكاز، رەسەي جانە ورتالىق ازيانى باسىپ الۋى مۇمكىن. سيريا مەن يراكتىڭ قالاي قيراپ جاتقانىن قاراڭىز، ولار ورتالىق ازيانىڭ قاۋىپسىزدىگىن دە تۇراقسىزداندىرعىسى كەلىپ وتىر»، - دەپ اتاپ ءوتتى گەنەرال ا.دۋستۋم.
اۋعان كۇشتەرىنىڭ ەلدىڭ سولتۇستىگىندەگى ارنايى ءىس-قيمىلدارىن ءسوز ەتە وتىرىپ، ا.دۋستۋم اسكەرلەردىڭ فارياب جانە سار-ە-پۋل پروۆينسيالارىن تازارتىپ ۇلگەرىپ، ەندى كابۋلدىڭ اتالعان اۋدانداردا تۇراقتىلىقتى قامتاماسىز ەتىپ وتىراتىنىن اتاپ ءوتتى.
بۇعان دەيىن اعىمداعى جىلدىڭ تامىز ايىندا گەنەرال ابدۋل راشيد دۋستۋم سولتۇستىكتەگى فارياب پروۆينسياسىندا ەكسترەميستەرگە قارسى ارنايى ءىس-قيمىلداردى باسقارعان. اۋعان باق-تارى ءايم-نىڭ ءبىرىنشى ۆيسە-پرەزيدەنتىنىڭ ومىرىنە ەكى رەت قاستاندىق جاسالىپ، «تاليبان» توبى سودىرلارىنىڭ توسقاۋىلى ۇيىمداستىرىلعانىن حابارلادى.
