قازاقستان 2013 جىلى قول قويعان رەسمي قۇجاتتى بەيجىڭ اعىمداعى جىلدىڭ 1ء-شى  شىلدەسىندە ماقۇلداعان بولاتىن. اتالعان كەلىسىم بويىنشا جۇڭگو تۇرمەسىندەگى قازاقستاندىق ازاماتتار جازاسىن ءوز ەلىندە وتەي الادى. بۇل تۋرالى «قامشى» پورتالى  nur.كz-كە سىلتەمە جاساي وتىرىپ حابارلايدى.

ءبىراق  قازاقستانعا اۋىستىرىلعان سوتتالۋشىلار اراسىندا 21 جاستاعى ستۋدەنت اقجارقىن تۇرلىباي جوق دەپ جازادى 7news.kz.

اقجارقىن تۇرلىباي ەسىرتكى تاسىمالداعانى ءۇشىن جۇڭگو زاڭىنا سايكەس ءومىر بويىنا باس بوستاندىعىنان ايىرىلعان بولاتىن. ول وتكەن جىلدىڭ ناۋرىزىندا گۋانچجوۋ اۋەجايىندا ۇستالدى.

باس پروكۋراتۋرانىڭ باسپا ءسوز حاتشىسى ەرنۇر ءۋاليدىڭ ايتۋىنشا، اقجارقىن ءالى قازاقستانعا اۋىسۋ تۋرالى ءوتىنىش جاساي المايدى. ويتكەنى، اتالعان قۇجات تولىعىمەن رەتتەلىپ، كۇشىنە ەنگەنگە دەيىن ءبىراز ۋاقىت كەرەك. پروكۋراتۋرا وكىلىنىڭ ايتۋىنشا، سوتتالۋشىلار قازاقستانعا كەلگەن سوڭ، تۋرا قىتايدا العان جازالارىن وتەيتىن بولادى.

ال اقجارقىن تۇرلىبايدىڭ ادۆوكاتى سۇڭقار نۇرماعامبەتوۆ قازاقستان پرەزيدەنتىنىڭ قىتايعا رەسمي ساپارى بارىسىندا قول قويىلعان قۇجاتتىڭ ۇلكەن ءۇمىت سىيلاپ وتىرعانىن جازدى.

«مەن ەكى ەل باسشىلارىنىڭ شەشىمىن قۇپتايمىن. بۇل قىتايدا سوتتالعان قازاقستان ازاماتتارىنىڭ ەلگە ەكستراداسيالانۋىنا سەپتىگىن تيگىزەدى»، – دەگەن قۇقىق قورعاۋشى.