Vesti.kz سپورت پورتالىنىڭ حابارلاۋىنشا، قازاقستاندىق بوكسەر قانات يسلام دومينيكاندىق بازيليو سيلۆانى نوكاۋتقا جىبەرىپ،  كاسىبي رينگتە قاتارىنان 16 رەت جەڭىسكە ۇستەم بولدى.

جۇدىرىقتاسۋ دومينيكان رەسپۋبليكاسىندا وتكەن بولاتىن. ءبىزدىڭ  بوكسشى ۇرىس باستالعاننان-اق باسىمدىلىق كورسەتتى. ءتورتىنشى راۋندتا قاناتتىڭ قارسىلاسى نوكداۋنعا تۇسسە، التىنشىسىندا رەفەرلەر تەحنيكالىق نوكاۋتتى ايقىندادى.

قانات 1984 جىلى 13 قىركۇيەكتە قىتايدىڭ سينسزيان-ۇيعىر  اۆتونوميالىق ايماعىندا دۇنيەگە كەلگەن. 2010 جىلى ول قازاقستانعا تۇرعىلىقتى ورنالاسقان. كەيبىر  مالىمەتتەرگە قاراعاندا، بۇگىندە ول وتباسىمەن الماتى وبلىسىنىڭ قاراساي اۋدانىندا  تۇرادى.

 كاسىبي بوكسقا 2012 جىلدىڭ قىركۇيەگىنەن باستاپ ارالاسقان. قازىرگى ۋاقىتتا  امەريكانىڭ فلوريدا شتاتىندا  Pahokee بازاسىنىڭ نەگىزىندە جاتتىعىپ ءجۇر.ءبىرىنشى ورتا سالماقتا جۇدىرىقتاسادى. كاسىبي بوكستا ەشقاشان جەڭىلىپ كورمەگەن. 16 ۇرىستىڭ 14ء-ىن نوكاۋتپەن اياقتاپ وتىر.

ەستەرىڭىزگە سالا كەتسەك، قانات يسلام 29 قاراشا كۇنى كولۋمبيالىق ەميليو حۋليونى نوكاۋتقا تۇسىرگەن بولاتىن.

qamshy.kz