20  جەلتوقسان كۇنى ساعات 19:00-دە رەسپۋبليكا سارايىندا وتكەن: "جۇلدىزدار وتباسى" جۋرنالىنىڭ "جىل ءانى-2013 " كونسەرتى ءدال ۋاقىتىندا باستالدى. قازاقتىڭ تويى كەشىگۋشى ەدى، ءبىراق بۇل جولعى "جۇلدىزدار وتباسى"  جۋرنالىنىڭ 10 جىلدىق مەرەيتويى مەن "اڭىز ادام" جۋرنالدارىنىڭ وقىرماندارىنا ويناتىلعان «20 جىلقى+2 تۇيە» جانە اۆتوكولىك تابىستالاتىن كەشكە حالىق لىق تولدى.

كونسەرت باستالاردا توي يەسى تابىلماي قالعاندىقتان، كەشتى  بەلگىلى تەاتر سىنشىسى اشىربەك سىعاي ءالعىسوز ايتىپ، باستاپ بەردى: "جۇلدىزدار وتباسى جۋرنالىنا ۇلكەن ساتتىلىكتەر تىلەيمىن. ونىڭ قىزمەتكەرلەرىنە وسىنشا كىسىنى جيناۋ  وڭايعا تۇسپەگەن بولار، جاڭا كوردىڭىزدەر، باسشىسى تابىلماي جاتىر. كىسىنى كۇتۋ قاشان دا قيىن. ءاماندا جاقسىلىقتا كەزدەسەيىك. تويلارىڭىز قۇتتى بولسىن! بارلىعىڭىزعا دەنساۋلىق، تابىس تىلەيمىن!"، - دەگەن اشىربەك اعامىز  ەڭ العاشقى جىلقىنىڭ يەگەرىن اتادى.

مەرەيتويعا كەلەدى دەپ جوسپارلانعان انشىلەردىڭ  90 %  ونەر كورسەتتى. ونىڭ ىشىندە كەلۋ -كەلمەۋى كۇماندى ەكى بىردەي سۇيىكتى ءانشىمىز: ماقپال ءجۇنىسوۆا مەن قايرات نۇرتاس تا ساحنادان تابىلدى. كورەرمەننىڭ ىستىق ىقىلاسىنا بولەنگەن ماقپال اپامىز ەكى ءانىن ورىندادى. ول جۋرنال قىزمەتكەرلەرىنىڭ قالامى مۇقالماي، انشىلەردىڭ سىرلاسى بولىپ قالا بەرۋىن تىلەپ، بىلاي دەدى: "ءبىزدى وسىلاي كونسەرتكە شاقىرىپ، شىعارىپ تۇرعاندارىنا كوپ-كوپ راحمەت ايتامىن. باسقا ارنالار ەندى... ايتىپ كەتە بەرەيىن،  وتىز ءبىرىنشى ارنانى قاراڭىزدار، باسقا ارنالاردان مەنى كورمەيسىزدەر..." دەپ، "ادامدار مەنى كەشىرىڭدەر" اتتى ءانىن ايتىپ، حالىققا كوكىرەگىندەگى شەرىن ءبىر تارقاتىپ الدى.

ال قايرات نۇرتاستى ساحناعا شاقىرعان كەش جۇرگىزۋشىسى ولجاس سىدىقبايەۆپەن بىرگە حالىق 2 مينۋت ۋاقىت ونىڭ شىعۋىن كۇتتى. قايرات ءبىر عانا ءانىن ايتىپ: "قايران شىمكەنتىم-اۋ" دەپ جىلقىنى ۇتقان وقو وقىرمانىنىڭ اتىن اتادى.

كونسەرتتىڭ ورتاسىندا كەشتىڭ ۇيىماستىرۋشىسى جارىلقاپ قالىباي  بۇل تويدىڭ  رەسپۋبليكا سارايى باسشىلارىمەن وتە قيىن باستالعاندىعى جونىندە ايتىپ، كەش شىققانىنا كەشىرىم سۇرادى. ول تەك جۋرنال وقىرماندارىن عانا ەمەس، قوعام قايراتكەرلەرى مەن ەسترادا جۇلدىزدارىنا دا  سىي-سىياپات كورسەتتى. سونىڭ ىشىندە "ءححى عاسىردىڭ "ويان قازاعى" دەپ اتالعان اسىلزات ارىستانبەكتىڭ پوەزياسىنا جوعارى باعا بەرىپ،  رەسپۋبليكالىق سپورت كوللەدجىنىڭ باسشىسى امالبەك تشانوۆتىڭ جاستار سپورتىنا قوسقان ۇلەسىن ەرەكشە اتاپ ءوتتى. سونىمەن قاتار، "ءقازاقفيلمنىڭ" باسشىسى ەرمەك امانشايەۆتىڭ دا ەڭبەگى ەسكەرىلدى.  

جارىلقاپ قالىباي: ""ادام اتا- حاۋا انا" گازەتىنىڭ شىققانىنا ون ءۇش جىل بولدى. اراسىندا وقىرمانعا جۇلدە  ۇيىمداستىرىپ ءجۇرمىز. ەڭ العاشقى جۇلدەنى تەك ءبىر عانا كومپيۋتەردەن باستاعانمىن. سول كومپيۋتەر كەلەسى جىلى ەكى كومپيۋتەر بولدى، ءۇش، سودان  ءتورت كومپيۋتەر بولدى. ودان وسە كەلە، مىنە، بۇگىن اۆتوكولىككە دە جەتتىك. بۇدان كەيىن اەروپلانعا جەتە بەرەيىك. وسىدان ون جىل بۇرىن العاشقى كومپيۋتەردى ويناتقان كەزدە قاراعاندى وبلىسى بالقاش اۋدانىندا ءبىر مۇگەدەك بالا بار ەكەن. ءبىر جەردەن قۇلاپ،  قولى ءبىر اياعى ىستەمەي ۇيىندە جاتىپ وقيدى ەكەن. كومپيۋتەردىڭ ەندى-ەندى  شىعىپ جاتقان كەزى بولاتىن، سول بالا: " وسى "جۇلدىزدار وتباسىنىڭ" كومپيۋتەرىن مەن ۇتىپ السام ەكەن..." دەپ ارمانداعان ەكەن. قۇدايدىڭ قۇدىرەتى،  ۇتىس تۋرا سول بالاعا ءتۇستى. مەنىڭ ايتايىن دەگەنىم، مىنا ءبىزدىڭ جيىرما جىلقى، ەكى تۇيە جانە ءاۆتوموبيلىمىز شالقىعان باي ەمەس، الەۋمەتتىك جاعىنان جاعدايى قيىن وتباسىلارعا تۇسسە ەكەن دەپ تىلەيمىن".

ءاۆتوموبيلدى بالكەن تۇرسىنبايەۆا اتتى وقىرمان يەلەندى. ۇتىس : ماڭعىستاۋ، اتىراۋ، شىعىس قازاقستان، الماتى ، اقتوبە، وڭتۇستىك قازاقستان وبلىستارىندا تۇراتىن وقىرماندارعا بۇيىردى.  

 qamshy.kz