استانادا ءۇشىنشى رەت «حالىق سۇيىكتىسى -2013» پرەمياسىمەن ماراپاتتاۋ سالتاناتى بولىپ ءوتتى. كوپتەگەن اتالىمدار قاتارىندا ساياساتكەر، ەسترادا جۇلدىزى، شەنەۋنىك، جۋرناليست، بلوگەر، بيزنەسمەن، قوعام قايراتكەرى، ساياساتتانۋشى جانە سپورتشىلاردىڭ ۇزدىكتەرى تاڭدالدى. بارلىعى 14 اتالىم بويىنشا 367 ۇمىتكەر ب ا ق سىنادى.

ۇزدىك سپورتشى، دالىرەك ايتساق، «رەسپەكت-سپورتشى» اتالىمىندا قازاقستاندىق جاس شاحماتشى جانسايا ابدىمالىك جەڭىمپاز اتاندى. ديپلوم مەن ءداستۇرلى «حالىق سۇيىكتىسى» مۇسىنشەسىن وعان «بارىس» حوككەي كلۋبىنىڭ جاتتىقتىرۋشىسى، 6 وليمپياداعا قاتىسقان عالامشارداعى جالعىز سپورتشى رايمو حەلمينەن جانە سپورتتىق باسپا ءسوز قاۋىمداستىعىنىڭ پرەزيدەنتى ءىلياس وماروۆ تاپسىردى. سالتاناتتى ءراسىم ۇزاققا سوزىلدى. سوندا ماراپاتتاۋشىلار جانسايادان : «ال سەن سانتا كلاۋسقا سەنەسىڭ بە؟» دەپ سۇرادى. «ءيا» دەگەن جاۋاپ العان رايمو حەلمينەن سانتا كلاۋس وتانىنان كەلگەن سپورتشى رەتىندە قوسىمشا سىيلىققا شاحماتشىنىڭ سۇيىكتى 12ء-شى ءنومىرى جانە ونىڭ تەگى جازىلعان «بارىستىڭ» سپورتتىق جەيدەسىن تاپسىرىپ، سالتاناتتى راسىمگە قاتىسۋشىلاردى تاڭ قالدىردى. داۋىس بەرۋ ءبىر اي بويى ەكى كەزەڭدە وتكەنى بەلگىلى. ءبىرىنشى كەزەڭ Facebook الەۋمەتتىك جەلىسىندە ءوتتى. ەكىنشى كەزەڭ «حالىق سۇيىكتىسى -2013» ۇلتتىق پرەميانىڭ رەسمي سايتىندا وتكىزىلىپ، وندا ءبىرىنشى كەزەڭدە كوبىرەك داۋىس جيناعان ءتورت فيناليست ءوزارا جارىسقا ءتۇستى. دەرەككوز: baq.kz