«مەن سىزدەردى سۇيەمىن، مەن ءمادريدتى سۇيەمىن، مەن يسپانيانى سۇيەمىن. بارلىعى ءۇشىن راحمەت سىزدەرگە. بۇل مەنىڭ ءومىرىم ءۇشىن وتە ماڭىزدى». بۇل سيريادان قاشقان بوسقىن اكە، فۋتبول باپكەرى وساما ابدۋل موحساننىڭ ەۋروپالىقتارعا ايتقان ريزاشىلىق سوزدەرى.

ەستەرىڭىزدە مە؟ جاقىندا بالالى بوسقىندى اياعىنان شالىپ قۇلاتقان ۆەنگرلىك جۋرناليست تۋرالى الەمدىك بۇقارالىق اقپارات قۇرالدارى جارىسا جازعان بولاتىن.

ۆەنريانىڭ  مەملەكەتتىك «N1TV»   تەلەارناسىنىڭ وپەراتورى پەترو لاسلو بالاسىمەن قاشىپ بارا جاتقان بوسقىننىڭ اياعىنان شالىپ قۇلاتقان جانە بوسقىنداردى تەۋىپ جۇرگەن ۆيدەوسىن الەۋمەتتىك جەلىگە جاريالاعانى ءۇشىن قىزمەتىنەن قۋىلعان ەدى.  الەۋمەتتىك جەلىگە تارالعان ۆيدەودان كوگىلدىر جەيدەدەگى وپەراتور  پوليسيادان قاشىپ بارا جاتقان بوسقىندى بالاسىمەن قوسا شالىپ قۇلاتقانى انىق كورسەتىلگەن.  ال قولىنا كىشكەنە بالاسىن كوتەرگەن ەر ازامات «بالا، بالا»،-دەپ جانۇشىرا داۋىستاعانى ەت جۇرەگىمىزدى سىزداتقانى وتىرىك ەمەس. وقيعا ۆەنگريانىڭ وڭتۇستىگىندە ورنالاسقان رەسكە بوسقىندار لاگەرىندە بولعان ەدى.

الەمدىك باق-تىڭ  جانە ەۋروپالىق وداقتىڭ نازارىن اۋدارعان بۇل وقيعاعا قاتىستى الەۋمەتتىك ورتادا قىزۋ پىكىر-تالاس ورناعان. كوپشىلىك قاۋىم ونسىز دا باس ساۋعالاپ بارا جاتقان بوسقىنداردى تەۋىپ جۇرگەن جۋرناليست قىزدى اعاش ەسەككە وتىرعىزىپ قويىپ، سىباپ بەرگەنى دە راس.

«N1TV»   ارناسىنىڭ باس رەداكتورى دا، «ءبىزدىڭ ارىپتەسىمىز بۇگىن ءوزىن عانا ەمەس، ءبىزدى دە ماسقارالادى.  ءوزىن لايىقتى كورسەتە المادى»،-دەگەن بولاتىن.

وسى وقيعادان كەيىن سيريادان قاشقان بالالى بوسقىن اكەنىڭ بۇرىن تانىمال فۋتبول باپكەرى بولعاندىعى انىقتالعان. ال يسپانياداعى فۋتبول باپكەرلەرىن وقىتاتىن ۇلتتىق ورتالىقتىڭ وكىلى ميگەل انحەل گالان  سيريالىق وساما ابدۋل موحساننىڭ وقيعاسىنا بەي-جايلىق تانىتپاعان. ءتىپتى، ءبىراز كۇن بۇرىن كەلەشەگى بۇلىڭعىر بولىپ تۇرعان وساما ابدۋل موحسانعا يسپانياداعى فۋتبول كلۋبىنا باپكەر بولۋعا ۇسىنىس تا بىلدىرگەن.

ميگەل انحەل گالان،  يسپانياداعى فۋتبول باپكەرلەرىن وقىتاتىن ۇلتتىق ورتالىقتىڭ وكىلى:

-موحسەن مەن ونىڭ ەكى ۇلى سيريادان ەۋروپاعا دەيىن اۋىر دا قيىن جولدى ءجۇرىپ ءوتىپ، مىنە مادريدكە كەلدى. ءبىز دە مۇندا موحسان مەن ونىڭ وتباسىنا جىلى قۇشاعىمىزدى اشامىز. ەۋروپا وداعى ساياساتكەرلەرى مەن ءبىزدىڭ بيلىك بوسقىندارعا جاردەمدەسۋى كەرەك. ولار وسى جەردە جاقسى جۇمىس تاۋىپ، ازاماتتىق الۋلارىنا كومەكتەسۋىمىز كەرەك. ءبىز بۇل ادامدارعا كومەك قولىمىزدى سوزۋعا مىندەتتىمىز.

ءتۇيىن 1: ءدال وسى موحسەن مەن ونىڭ وتباسىنىڭ تاعدارى الەۋمەتتىك جەلىنىڭ ارقاسىندا الەمدىك باق-تىڭ نازارىنا ىلىكتى. اۋەلدە الەۋمەتتىك جەلىلەردە بالا قۇشاقتاعان ەر ازاماتتىڭ وماقاسا قۇلاعان ۆيدەوسى تارالدى.  كەيىن ونى ۆەنگر ءجۋرناليستىنىڭ  شالىپ قۇلاتقانى بەلگىلى بولدى. ءيا، موحسەن دە مىڭداعان بوسقىننىڭ قاتارىندا ۆەنگريا شەكاراسىن باسىپ وتپەك بولىپ، پوليسيادان قاشىپ كەلە جاتقان ەدى.

ەگەر دە سول جۋرناليست، پەترو لاسلو، سيريالىق موحسەننىڭ اياعىنان شالىپ جانە تەۋىپ قۇلاتپاعان بولسا، ول دا مىنداعان بوسقىننىڭ ءبىرى بولىپ قالا بەرەر ما ەدى؟

ەندى موحسەن ءۇشىن بۇنىڭ بارلىعى ارتتا قالدى. جاڭا جۇمىس تاپتى. ءتىپتى جەرگىلىكتى بيلىك موحسەنگە جانە ونىڭ وتباسىنا  ءۇي بەرۋگە ۋادە ەتكەن دە.

ءتۇيىن 2: «تەپكەننىڭ» بارلىعى جامان بولمايدى ەكەن. راس ايتامىن. جاقىندا قازاقستاندىق شەنەۋنىكتىڭ بالاسى دا ساتۋشى قىزدى كوكرەگىنەن تەۋىپ قۇلاتقان ەدى عوي. كىم ءبىلسىن مۇنىڭ اياعى قالاي بولادى ەكەن؟..

نۇرگەلدى ءابدىعاني ۇلى