9 وڭىردە جالپى كولەمى جىلىنا 3،6 ملرد. م3 بولاتىن 39 جاڭا سۋ قويماسىن سالۋ جوسپارلانعان. بيىل تۇركىستان وبلىسىنداعى كەڭساي-قوسقورعان سۋ قويماسىنىڭ قۇرىلىسى اياقتالادى. بۇل تۋرالى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆ حالىق الدىنداعى ەسەپتىك كەزدەسۋىندە ايتتى.
– سۋ قويمالارىن سالۋ 70 ەلدى مەكەن (137 مىڭ ادام) ءۇشىن سۋ تاسقىنى ءقاۋپىن ازايتۋعا، 394 مىڭ گا جاڭا سۋارمالى جەرلەردى اينالىمعا ەنگىزۋگە، اۋىل شارۋاشىلىعىندا 129 مىڭنان استام جۇمىس ورنىن قۇرۋعا، ترانسشەكارالىق وزەندەردىڭ سۋ كولەمىنە تاۋەلدىلىكتى الىپ تاستاۋعا مۇمكىندىك بەرەدى. بۇل قىرعىزستانعا تاۋەلدىلىكتى 30%-عا دەيىن، وزبەكستانعا 25%-عا دەيىن، رەسەيگە 15%-عا دەيىن تاۋەلدىلىكتى تومەندەتەدى، – دەدى م.مىرزاعالييەۆ.
ونىڭ ايتۋىنشا، بىلتىر تۇركىستان وبلىسى ماقتاارال اۋدانىندا ۇزىندىعى 12 كم "ك-19" ماگيسترالدى كانالىن سيفرلاندىرۋ بويىنشا پيلوتتىق جوبا ىسكە اسىرىلعان.
– كانالدى سيفرلاندىرۋدىڭ ارقاسىندا سۋ سۋارۋ نورمالاردان قىرىق بەس (45%) پايىزعا كوپ جۇمسالاتىنى انىقتالدى. بيىل 16 ارنا سيفرلاندىرىلادى. تاياۋداعى بەس جىل ىشىندە ۇزىندىعى 2،8 مىڭ كم-دەن اساتىن 119 ارنانى سيفرلاندىرۋ جوسپاردا بار، – دەدى ول.
پىكىر قالدىرۋ