كەشەگى كۇننىڭ وتكىر ءسوزى پرەزيدەنتتىڭ اۋزىنان شىقتى. جوق جەردەن «قامشى ءۇيىردى». ايتقان جەرى دە - ايرىقشا. حاننان اقىرىپ تەڭدىك سۇراعان سىرىم باتىر، يساتاي مەن ماحامبەتتەر ات تۇياعىن دۇبىرلەتكەن اتىراۋ جەرىندە ايتتى. سونداعى ايتىلعان ءسوز مىناۋ: «...وسىنداي قيىن-قىستاۋ كەزەڭدە ەلدى ارانداتاتىندار شىقسا، ولاردى اكەسىن تانىتىپ زاڭمەن جازالايمىز». دۇرىس ايتادى! قازاقستاندا «اكەسىن تانىماي» كەتىپ، ەلدى ارانداتقانداردىڭ قاتارى «قويداي ءورىپ» ءجۇر. سولاردى دا وسى جازاعا ءىلىندىرۋ قاجەت. اتاپ ايتقاندا:
- تاۋەلسىزدىكتى العانىمىزعا 24 جىل بولسا دا، ەكونوميكانى ءار تاراپتاندىرۋدى جۇزەگە اسىرا الماعان ۇكىمەتتىڭ «اكەسىن تانىتۋ» كەرەك؛
- قازبا بايلىعىمىز كوپ، شالقىپ ءومىر سۇرەتىن «ەكىنشى كۋۆەيت» بولامىز دەپ ەلدى الداعان ارانداتۋشىنىڭ «اكەسىن تانىتۋ» قاجەت؛
- كورشى ەلدىڭ جەرىن تارتىپ الىپ، ونىڭ تورىندە ويران سالىپ جۇرگەن ەلمەن وداق بولۋدى قالاپ، ەلدى «قوراعا تىققان» اراندانتۋشىلاردىڭ «اكەسىن تانىتۋعا» ءتيىسپىز؛
- كورشى ەلدە ەكونوميكالىق داعدارىس باستالعاندا ونىڭ الدىن الۋمەن اينالىسۋدىڭ ورنىنا پرەزيدەنتتىك سايلاۋدى ەرتە وتكىزىپ، ەلدى دۇرلىكتىرگەن بەلسەندىلەردىڭ «اكەسىن تانىتىپ»، الدا-جالدا مۇندايدى قايتالامايتىنداي ەتۋ كەرەك؛
- بايلىقتارىن شەتەلگە اسىرىپ، ونى وزگە ەلدىڭ بانكتەرىندە شەتەلدىك ۆاليۋتامەن ساقتاپ، تەڭگەنى مەنسىنبەي وتىرعان ارانداتۋشىلاردىڭ «اكەسىن تانىتىپ» جىبەرۋگە ءتيىسپىز.
ايتا بەرسەك، كوپ سەكىلدى. وسىمەن ءبىز دوعارايىق. تاعى ارانداتۋشىلار بولسا، وسى ءتىزىمنىڭ سوڭىنا قوسۋ كەرەك. «تەمىردى قىزعان كەزدە سوق» دەمەيتىن بە ەدى؟! قۇقىق قورعاۋ مەكەمەلەرى ءارى قاراي ءىلىپ الىپ كەتەر...
داۋلەت كوپتىلەۋ
